Die goeie ou dae - 30 Mei 2023

Dit is normaal om oomblikke en tye van vreugde en geluk in jou lewe te onthou. Indien ‘n mens egter te veel op die verlede konsentreer, kan dit jou verhoed om ten volle by die hede betrokke te wees en geleenthede wat oor jou pad kom, aan te gryp. Die skrywer van die boek Prediker moedig ons aan om die lewe met wysheid te benader en te besef dat elke dag sy eie seëninge, uitdagings en geleenthede vir groei, inhou.

Instede van om na die verlede te verlang, moet ons leer om in die oomblik teenwoordig te wees. Wanneer ons ten volle in die hede teenwoordig is, kan ons die mooiheid om ons waardeer, verhoudings met ander aangaan en die beste maak van geleenthede wat oor ons pad kom. God se goedheid en voorsiening word nie tot ‘n sekere tyd of seisoen beperk nie, maar is elke dag beskikbaar as ons oë het om dit raak te sien.

Indien ons in die verlede vashaak, verhinder dit ons om te groei en word ons beroof van die blydskap en vrede wat God vir ons vandag wil gee. God se plan vir ons lewens bevat voortdurende groei, verandering en ‘n doel. Hy nooi ons uit om elke dag sy getrouheid te ervaar, om uit ons verlede te leer, en in hoop en vertroue aan te beweeg.

Soos ons vorder op ons lewensreis, moet ons die greep van die verlede laat gaan en in God se leiding vir die toekoms vertrou. Hy is te alle tye by ons om aan ons wysheid en leiding te gee. Indien ons sy wil soek en sy tydsberekening vertrou, kan ons elke dag doelgerig leef en die geleenthede en uitdagings wat oor ons pad kom, aangryp.

Gebed: Skenk asseblief aan ons die wysheid om vandag se mooiheid en geleenthede raak te sien, eerder as om te verlang na dit wat was of nog sal kom. Mag ons tevredenheid en blydskap in die hede vind omdat ons weet dat U elke tree by ons is. Ons vra dit in u Naam alleen. Amen