Verandering, Advent en Kersfees – Dag 5

Ons verhouding met God is soms soos ʼn liefdesverhouding waar ons lankal die hoogtepunte en die intense belewenisse saam met mekaar verruil het vir die alledaagse. Tog bied die seisoen waarin ons die geboorte van ons Redder vier ons die moontlikheid op ʼn geestelike hergeboorte.

Hoe kan ons nuwe lewe gee aan ons geloof? Daar is so baie wat jy kan doen. Gaan kuier ʼn slag in jou binneste saam met God. Proe sy Woord opnuut deur God se liefdesbriewe aan jou te lees. Oral spreek die Bybel van God se verlange na sy skepsels. Al verlaat ons Hom of verruil ons Hom soms vir alles wat die aarde kan bied, hou Hy nooit op om sy arms uit te hou na ons om ons keer op keer terug te verwelkom nie.

Reik jou hand uit oor daardie kloof wat tussen jou en God ontstaan het. Skep vir jou ʼn gewyde ruimte by jou werk of in jou huis om jou te herinner aan die sakrale wat teenwoordig is in die alledaagse. Doen iets om jou hernude toewyding te bevestig. Besoek, bel of breek ʼn broodjie saam met iemand in nood. Of lees ʼn slag ʼn boek wat jou uitdaag om nuut te dink oor jou geloof. Steek ʼn kersie op aan die etenstafel vir die wêreld of vir iemand wat jy weet dit nodig het.

Nog makliker – glimlag vir iemand, betoon simpatie of spreek ʼn woord van bemoediging. Bo alles, wees vrygewig. Al doen jy enigeen van hierdie dinge aan die wat nie geag word nie, doen dit asof jy dit vir God doen. Dit is die ware gees van Advent – of die Verwagting.