Troos uit die Woord – Dag 8

₅Maak tog aan my bekend wanneer my einde sal wees, Here,

en hoeveel dae daar vir my oor is,

sodat ek sal weet wanneer my lewe verby is.

₆Kyk, U het bepaal dat my dae min sal wees,

in u oë is my lewensduur byna niks.

Ag, alle mense is maar verganklik. Sela

₇Die mens leef soos in 'n droom

en hy sloof hom af vir niks.

Hy gaar op, maar weet nie wie dit sal kry nie.

₈Is daar nog hoop vir my, Here?

U is my enigste hoop.

₁Ek het die Here lief,

want Hy verhoor my smeekgebede.

₂Hy het na my geluister toe ek Hom aangeroep het.

₃Bande van die dood het my omsluit,

doodsangs het my aangegryp,

ek het benoud en bekommerd geword.

₄Toe het ek die Naam van die Here aangeroep:

“Here, red my tog!”

₅Die Here is genadig en regverdig,

ons God ontferm Hom oor ons.

₆Die Here beskerm die hulpeloses:

ek was magteloos, maar Hy het my gered.

Luister tog na my, Here, verhoor my gebed,

want ek is hulpeloos en arm.

₂Beskerm my, want ek is u troue dienaar,

red my, want U is my God, op U vertrou ek.

₃Wees my genadig, Here,

ek roep die hele dag deur na U.

₄Maak my bly, Here,

ek hunker na U.

₅U is goed, Here, U vergewe altyd weer,

U is getrou teenoor dié wat na U roep om hulp.

₆Luister na my gebed, Here,

gee tog ag op my smeekgebed.

₇Op die dag van my nood roep ek na U,

U sal my gebed verhoor.

₈Daar is geen god soos U nie, Here,

niks kan met u werk vergelyk word nie.

₉U het al die nasies gemaak;

hulle sal voor U kom buig, Here,

en aan u Naam die eer gee,

₁₀want U is groot en doen magtige dade,

U alleen is God.

₁₁Leer my u pad, Here,

ek wil wandel in u waarheid;

leer my U met toewyding dien.

₁₂Met my hele hart sal ek U prys, Here my God,

u Naam altyd eer,

₁₃want u liefde vir my was groot:

uit die dieptes van die dood het U my gered.

₂Here my God wat my altyd help,

ek roep elke dag om hulp,

elke nag bid ek tot U.

₃Laat my gebed nie tevergeefs wees nie,

hoor my geroep.

₄Die swaarkry het vir my te veel geword:

ek vat al aan die doderyk,

₅ek staan al met die een voet in die graf,

ek het geen krag meer nie.

₆Dit is asof ek al tussen die dooies is,

tussen dié wat gesneuwel het en in hulle grafte lê,

dié aan wie U nie meer dink nie

en van wie U u hand teruggetrek het.

₇U het my onder in die put laat beland,

in diepe duisternis.

₈U gramskap rus swaar op my,

U laat al u golwe oor my breek. Sela

₉U laat my bekendes ver van my af staan

en maak my vir hulle iets afskuweliks;

ek sit vasgevang en kan nie uitkom nie.

₁₀My oë is al dof van ellende;

die hele dag deur roep ek na U, Here,

en steek ek my hande in gebed na U uit.

₁₁Sal U met dooies 'n wonder laat gebeur?

Kan gestorwenes opstaan en U loof? Sela

₁₂Word daar in die graf vertel van u troue liefde?

Word daar in die plek waar almal vergaan, van u trou vertel?

₁₃Sal u wondermag ondervind word in die duisternis van die dood,

u redding in die land van vergetelheid?

₁₄Ek roep na U om hulp, Here,

vroeg in die môre al bid ek tot U.

₁₅Waarom verstoot U my, Here,

waarom trek U U van my af terug?

₁₆Ek ly swaar, ek kwyn al weg van my jeug af.

Dit is 'n swaar las waarmee U my teister.

Ek weet geen raad meer nie.

₁₇U toorn rus op my,

U tref my met skrik en vernietig my.

₁₈Dit bedreig my heeldag soos vloedwater,

dit sak op my toe van alle kante af.

₁₉U laat my vriende en my bure ver van my af staan,

die duisternis van die dood is my geselskap.

₂Here, luister tog na my gebed,

hoor tog my geroep om hulp!

₃Moet U tog nie van my afsydig hou

nou dat ek in die nood is nie.

Luister tog na my wanneer ek U aanroep,

verhoor tog gou my gebed,

₄want vir my verdwyn die dae soos rook.

My liggaam brand soos vuur,

₅ek is verskroei en uitgedroog soos gras,

ek het alle eetlus verloor.

₆Ek het net vel en been geword

van al die pyn.

₇Ek voel so verlate soos 'n pelikaan in 'n woestyn,

soos 'n uil tussen murasies.

₈As ek wakker word,

voel ek soos 'n eensame voël op 'n huis se dak.

₉Die dae deur verneder my vyande my.

Dié wat my so verkleineer, gebruik my naam as 'n vloekwoord.

₁₀As is my daaglikse brood;

wat ek drink, is met my trane gemeng,

₁₁want u toorn en u gramskap het my getref,

U het my verwerp en weggegooi.

₁₂Soos 'n skaduwee wat lank word, is my lewe naby sy einde,

ek is soos verdroogde gras.

₁₃U, Here, U heers vir altyd,

U is daar van geslag tot geslag.

₁₄U sal ingryp en U oor Sion ontferm,

want die bestemde tyd het aangebreek,

die tyd om hom genadig te wees.

₁₅Ons, u dienaars, het elke klip van Sion lief,

ons is bewoë oor sy puin.

₁₆Die nasies sal die Here vrees

en al die konings van die aarde sy mag,

₁₇want die Here gaan Sion weer opbou

wanneer Hy in sy mag verskyn.

₁₈Hy luister na die gebed van dié wat alles verloor het,

Hy sal hulle gebed nie verag nie.

₁₉Laat dit opgeteken word vir die geslag wat kom,

sodat die nuut geskape volk die Here kan loof.

₂₀Hy het uit sy heilige woning na onder gekyk

en uit die hemel gesien wat op die aarde gebeur,

₂₁die gekerm van die gevangenes gehoor

en dié wat naby die dood was, bevry.

₂₂Hulle sal die Naam van die Here in Sion besing

en sy lof in Jerusalem

₂₃wanneer die volke en die koninkryke bymekaarkom

om die Here te dien.

₂₄Hy het my krag gebreek toe ek nog jonk was,

Hy het my lewe verkort.

₂₅Ek sê: “My God, moet my nie in die fleur van my lewe wegneem nie!

U is daar deur die geslagte heen.

₂₆In die voortyd al het U die aarde gevestig

en die hemele met u eie hande gemaak.

₂₇Die hemel en die aarde sal vergaan, maar U sal bly.

Soos 'n kledingstuk verslyt, so sal alles vergaan,

soos klere wat uitgedien raak, so sal U alles laat verdwyn.

₂₈Maar U bly dieselfde,

u jare het geen einde nie.”

₂₉Ons nageslag sal die land bly bewoon,

ons nakomelinge sal veilig voor U woon.

₂Ek roep na die Here om hulp,

ek smeek die Here om genade,

₃ek stort my klag voor Hom uit

en vertel Hom van my nood.

₄Ek het alle moed verloor,

U weet wat ek moes deurmaak.

Op die pad waar ek loop,

het hulle vir my 'n strik gestel.

₅Ek soek hulp, maar niemand wil help nie,

daar is vir my geen vlugkans nie

en niemand gee vir my om nie.

₆Ek roep na U om hulp, Here,

ek sê: “U is my toevlug,

buiten U het ek geen deel in die land van die lewendes nie!

₇Luister tog na my hulpgeroep,

want ek is magteloos.

Red my van my vervolgers,

want hulle is te sterk vir my.

₈Bevry my uit my gevangenskap,

dat ek u Naam kan loof.

Die regverdiges sal dankbaar om my kom staan

wanneer U aan my goed doen.”