Troos uit die Woord – Dag 7

₃₃God omgord my met krag;

Hy maak my pad voorspoedig.

₃₄Hy maak my voete soos dié van 'n ribbok;

op hoë plekke laat Hy my stewig staan.

₃₆Die redding wat U gebring het,

was vir my 'n beskerming,

u regterhand het my ondersteun,

deur u hulp het ek sterk geword.

₃₇U het my ruim vastrapplek gegee,

my enkels het nie geswik nie.

Ek wil die Here loof,

met alles wat in my is, wil ek sy heilige Naam loof.

₂Ek wil die Here loof

en nie een van sy weldade vergeet nie.

₃Dit is Hy wat al my sonde vergewe,

wat al my siekte genees,

₄wat my red van die graf

en my met liefde en ontferming kroon,

₅wat my die goeie in oorvloed laat geniet,

my die jeugdige krag van die arend skenk.

₂Met my hele hart wil ek U prys, Here,

wil ek van u magtige reddingsdade vertel.

₃Oor U wil ek my verbly en vrolik wees,

u Naam wil ek besing, o Allerhoogste.

₆Aan die Here kom die lof toe,

want Hy het my smeekstem gehoor.

₇Die Here is my sterkte en my beskermer,

op Hom het ek vertrou.

Hy het my gehelp.

Daarom is ek bly en wil ek Hom loof met my lied.

₈Die Here is 'n sterkte vir sy volk,

'n veilige beskutting vir sy gesalfde.

₉Red u volk en seën dié wat aan U behoort;

wees vir hulle 'n herder

en sorg altyd vir hulle.

Juig tot eer van God, almal op aarde!

₂Sing tot roem van sy Naam,

gee Hom die eer wat Hom toekom!

₃Bely voor God: Hoe ontsagwekkend is u werk!

U mag is groot, u vyande kruip voor U.

₄Alle mense moet voor U buig,

hulle moet sing tot u eer,

hulle moet sing tot eer van u Naam. Sela

₅Kom hoor wat God gedoen het,

kom hoor van sy magtige dade onder die mense:

₆Hy het die see in droë land verander;

sy volk het droogvoets deur die rivier getrek.

Toe het ons gejubel oor Hom

₇wat ewig heers deur sy mag

en die nasies in die oog hou.

Die vyande moet hulle nie teen God verset nie! Sela

₈Prys ons God, alle volke,

laat sy lof weerklink!

₉Dit is Hy wat ons die lewe gee

en nie toelaat dat ons struikel nie!

₁₀U het ons beproef, o God,

ons gelouter soos silwer;

₁₁U het ons in 'n net gevang,

'n swaar las op ons gelê;

₁₂U het ons deur mense laat vertrap,

ons het deur vuur en water gegaan;

maar toe het U ons uitgelei na oorvloed toe.

₁₃Ek sal u huis betree met brandoffers

en aan U die geloftes betaal

₁₄wat ek gedoen het, wat ek afgelê het

toe ek in nood was.

₁₅Ek bring vir U vet skape as brandoffers,

ramme as wierookoffers,

ek offer beeste en bokke. Sela

₁₆Kom luister, alle dienaars van God,

ek wil vertel wat Hy vir my gedoen het:

₁₇Skaars het ek na Hom geroep,

of daar was reeds 'n loflied op my lippe.

₁₈As daar sonde in my hart was,

sou die Here nie geluister het nie.

₁₉Maar God hét geluister,

Hy hét my gebed verhoor!

₂₀Die lof kom God toe wat my gebed nie afgewys

en sy trou nie van my weerhou het nie.

Ek wil die Here loof,

met alles wat in my is, wil ek sy heilige Naam loof.

₂Ek wil die Here loof

en nie een van sy weldade vergeet nie.

₃Dit is Hy wat al my sonde vergewe,

wat al my siekte genees,

₄wat my red van die graf

en my met liefde en ontferming kroon,

₅wat my die goeie in oorvloed laat geniet,

my die jeugdige krag van die arend skenk.

₆Die Here laat geregtigheid en reg geskied

aan almal wat verdruk word.

₇Aan Moses het Hy sy wil bekend gemaak,

aan Israel wat Hy van plan was om te doen.

₈Barmhartig en genadig is die Here,

lankmoedig en vol liefde.

₉Hy sal ons ons sonde nie bly toereken

en nie vir ewig toornig bly nie.

₁₀Hy handel met ons nie volgens ons sondes nie,

vergeld ons nie vir ons ongeregtighede nie,

₁₁want so groot as die afstand tussen hemel en aarde is,

so groot is sy liefde vir dié wat Hom dien.

₁₂So ver as die ooste van die weste af is,

so ver verwyder Hy ons oortredinge van ons af.

₁₃Soos 'n vader hom ontferm oor sy kinders,

so ontferm die Here Hom oor dié wat Hom dien.

₁₄Hy weet waarvan ons gemaak is,

Hy hou dit in gedagte dat ons stof is.

₁₅Die mens, sy lewensduur is soos dié van gras,

soos dié van 'n veldblom wat oopgaan:

₁₆as die woestynwind daaroor waai, is dit weg

en sy plek vir altyd leeg.

₁₇Maar onverganklik is die liefde van die Here

vir dié wat Hom dien,

sy trou vir opeenvolgende geslagte,

₁₈vir dié wat getrou bly aan sy verbond

en sy voorskrifte nakom.

₁₉Die Here het sy troon in die hemel gevestig,

sy heerskappy strek oor alles en almal.

₂₀Loof die Here, magtige engele

wat sy opdragte uitvoer,

sy bevele gehoorsaam.

₂₁Loof die Here, alle hemelwesens

wat Hom dien en sy wil doen!

₂₂Almal wat deur Hom geskep is, loof die Here

op al die plekke waar Hy heers!

Ek wil die Here loof!

₁Ek het die Here lief,

want Hy verhoor my smeekgebede.

₂Hy het na my geluister toe ek Hom aangeroep het.

₃Bande van die dood het my omsluit,

doodsangs het my aangegryp,

ek het benoud en bekommerd geword.

₄Toe het ek die Naam van die Here aangeroep:

“Here, red my tog!”

₅Die Here is genadig en regverdig,

ons God ontferm Hom oor ons.

₆Die Here beskerm die hulpeloses:

ek was magteloos, maar Hy het my gered.

₇Ek moet nou tot rus kom,

die Here het goed aan my gedoen:

₈U het my van die dood gered,

U het 'n einde gemaak aan my trane,

U het gesorg dat ek nie weer struikel nie.

₉Ek kon voor die Here bly wandel

in die land van die lewendes.

₁₀Ek het in U bly glo,

selfs toe ek gedink het dit is klaar met my

₁₁en toe ek in my vertwyfeling besef het:

ek kan op geen mens staatmaak nie.

₁₂Hoe sal ek die Here vergoed

vir al sy weldade aan my?

₁₃Met 'n drankoffer sal ek van sy redding getuig

en die Naam van die Here aanroep.

₁₄My geloftes aan die Here sal ek betaal

in die teenwoordigheid van sy hele volk.

₁₅Vir die Here is die dood van sy troue dienaars geen geringe saak nie.

₁₆Ek is u dienaar, Here,

van my geboorte af is ek al u dienaar:

U het my vrygemaak.

₁₇Ek wil U loof met 'n dankoffer,

ek wil die Naam van die Here aanroep.

₁₈My geloftes aan die Here sal ek betaal

in die teenwoordigheid van sy hele volk,

₁₉in die voorhowe van die huis van die Here,

binne-in jou, Jerusalem!

Prys die Here!

Sing 'n nuwe lied tot eer van die Here,

sing tot sy lof in die vergadering van sy troue dienaars.

₂Laat Israel hom verheug in sy Maker,

laat die volk van Sion jubel oor die Here hulle koning.

₃Laat hulle sy Naam prys met koordanse,

laat hulle speel tot sy eer op tamboeryn en lier.

₄Die Here is goed vir sy volk,

Hy kroon die hulpeloses met oorwinning.

₅Sy troue dienaars juig oor sy mag,

jubel selfs as hulle op hulle beddens gaan lê.

₆Die roem van God klink uit hulle mond,

en in hulle hand is die swaard, alkante geslyp,

₇waarmee hulle die nasies sal verslaan

en die volke sal straf.

₈Hulle sal die konings van daardie nasies met kettings vasbind,

hulle aansienlikes met ysterboeie,

₉en die vonnis aan hulle voltrek soos dit vasgestel is.

Dit sal die triomf wees van al die troue dienaars van God.

Prys die Here!

Prys God in sy heiligdom,

prys Hom hier onder sy magtige hemelgewelf!

₂Prys Hom oor sy kragtige dade,

prys Hom in sy magtige grootheid!

₃Prys Hom met die ramshoring,

prys Hom met harp en lier!

₄Prys Hom met tamboeryn en koordanse,

prys Hom met snaarinstrumente en fluite!

₅Prys Hom met simbale,

prys Hom met galmende simbale!

₆Laat alles wat asemhaal, die Here prys!

Prys die Here!