Troos uit die Woord – Dag 19

Die Here is my herder, ek kom niks kort nie.

₂Hy laat my rus in groen weivelde.

Hy bring my by waters waar daar vrede is.

₃Hy gee my nuwe krag.

Hy lei my op die regte paaie

tot die eer van sy Naam.

₄Selfs al gaan ek deur donker dieptes,

sal ek nie bang wees nie,

want U is by my.

In u hande is ek veilig.

₅U laat my by 'n feesmaal aansit,

terwyl my teëstanders moet toekyk.

U ontvang my soos 'n eregas,

ek word oorlaai met hartlikheid.

₆U goedheid en liefde sal my lewe lank by my bly

en ek sal tuis wees in die huis van die Here

tot in lengte van dae.

₁₈As die regverdiges om hulp roep,

hoor die Here hulle

en red Hy hulle uit al hulle benoudhede.

₁₉Die Here is naby die gebrokenes,

Hy help die moedeloses.

₂₀Al word die regverdige ook deur hoeveel rampe getref,

die Here red hom uit almal.

₆God is daar; die stad sal nie wankel nie.

God sal hom help nog voor die môre kom.

₇Nasies kan raas en koninkryke wankel,

maar as God sy stem laat hoor,

smelt die aarde weg.

₈Die Here, die Almagtige, is by ons,

die God van Jakob is vir ons 'n beskutting. Sela

₉Kom kyk wat die Here gedoen het,

watter ontsettende dinge Hy op die aarde tot stand bring:

₁₀die oorloë oor die hele aarde laat Hy ophou,

pyle en boë verbreek Hy, spiese slaan Hy stukkend,

oorlogswaens verbrand Hy met vuur.

₁₁Bedaar en erken dat Ek God is,

hoog bo die nasies, hoog bo die aarde.

₁₂Die Here, die Almagtige, is by ons,

die God van Jakob is vir ons 'n beskutting. Sela

₅U omsluit my van alle kante,

U neem my in besit.

₆Dié wete oorweldig my,

dit is te hoog vir my begrip.

₇Waarheen sou ek gaan om u Gees te ontvlug?

Waarheen sou ek vlug om aan u teenwoordigheid te ontkom?

₈Klim ek op na die hemel, is U daar,

gaan lê ek in die doderyk, is U ook daar.

₉Vlieg ek na die ooste,

of gaan woon ek in die verre weste,

₁₀ook daar lei u hand my,

hou u regterhand my vas.