Spreuke: Eenjaarleesplan – Dag 33
Spreuke 6:20-26
Bybelteks(te)
Die pa bou in die “negende lewensles” aan sy seun voort op die opdrag in Deuteronomium 6:7 dat ouers hulle kinders die gebooie van God moet onderrig te alle tye, selfs as hulle gaan slaap en as hulle opstaan.
Let op hoe God se woorde hom dan sal begelei en besig hou; selfs in sy slaap oor hom die wag sal hou. Gehoorsaamheid aan God se gebooie sal dus keer dat hy val vir die slegte vrou – prostitusie – of vir ’n vreemde vrou, dws ‘n ander man se vrou – owerspel (vers 24). Dit sal sy lewe vrywaar van armoede en die dood.
Let op hoe die familie as konteks vir die voorskrif van die pa geskilder word. Die seun moet ook luister na sy moeder se raad. Die gevolge van sy gehoorsaamheid word eers in positiewe terme uitgespel. Sy ouers se voorskrifte is ‘n lig op die pad na die lewe toe.
