Sielsreis – dag 4
“Ek kyk net …”
Bybelteks(te)
LUKAS 19
Jesus en Saggeus
Die maklikste manier om van ʼn lastige verkoopspersoon in ʼn winkel ontslae te raak is om te sê: “Ek kyk net.” Dit beteken: Ek stel belang maar is nie gereed om te besluit nie. Moenie my druk nie.
In die Bybel ontmoet ons ook so ʼn “potensiële koper”. Toe ʼn man met die naam Saggeus hoor dat die prediker wie se naam op almal se lippe is na Jerigo toe kom, wou hy Hom ook sien. Hy klim toe in ʼn boom om uit die verte te kyk en te luister. Het hy maar geweet …
Hoe verder ons hierdie storie lees, hoe meer herinner die kort mannetjie in die vyeboom ons aan iemand wat ons ken, tot jy met ʼn skok besef: “Maar hy lyk soos ek!” Ons hou ook soms daarvan om die kat uit die boom te kyk. Ons raak nie betrokke nie; ons kyk net. Ons belangstelling is geprikkel, maar ons verkies om op ʼn afstand te bly. En as iemand ons nader, sê ons vinnig: “Nee, dankie, ek kyk net.”
Miskien is die tyd ryp vir jou om betrokke te raak, al vra dit ʼn geloofsprong. Miskien is dit tyd om op te hou wag vir die “regte plek en die regte tyd”. Doen dit net!
Saggeus het uit die boom geklim en kyk wat het met hom gebeur! Jesus het sy lewe in ʼn oogwink verander. In plaas daarvan om net te kyk, het Jesus hom gewys hoe om met nuwe oë na die wêreld te kyk.
Jesus is nie op pad na jou omgewing toe nie. Hy is reeds daar. En Hy nooi jou uit om deel van sy koninkryk, hier en nou, te wees. Al wat jy hoef te doen is om uit jou wegkruipplek te voorskyn te kom en die uitdaging te aanvaar.
