Sielsreis – dag 20

Die mens is gemaak vir moeilikheid. In Job 5:7 staan geskryf: Maar die mens word vir moeite gebore soos die vonke boontoe vlieg. “Die mens is nie gemaak vir geluk nie,” het Samuel Johnson in 1776 gesê, maar ʼn sielkundige wat ʼn bietjie navorsing gedoen het was verras om uit te vind dat 20% Amerikaners hulleself as gelukkig beskou. “Ek het gereken dit sou baie minder wees,” het hy gesê.

Hoe meet ʼn mens geluk? Een manier is om al die oomblikke van geluk per dag op te tel en af te trek van al die oomblikke van ongelukkigheid. Wanneer laas het jy sommetjies gemaak van jou gelukkige en ongelukkige momente? Die skrywer May Sarton sê in haar boek Endgame dat dit absurd sou wees om lang tydperke van geluk afgewissel met lang tydperke van ongelukkigheid te verwag. Ons ervaar in werklikheid momente van geluk en momente van hartseer of ongelukkigheid dwarsdeur die dag. Elke dag bevat ten minste een gelukkige moment – selfs al is dit om ʼn voëltjie in die tuin dop te hou of jou hond wat jou met “ope arms” na ʼn dag se werk verwelkom.

In ons daaglikse interaksie met ons mans, vroue of kinders ervaar ons gedurig vreugdesmomente. Ons moet net ʼn slag tyd spandeer om ons geluk raak te sien of meer geleenthede vir geluk skep, soos om vroeër op te staan en saam ontbyt te eet. Dit gaan nie oor wat gesê of gedoen word nie, maar die moment van intimiteit wat geskep word.

Geluk word nie in boeke oor geluk gevind nie. Geluk kan nie gekoop word nie. Geluk groei nie waar negatiwiteit gedy nie. Dit lê in spontane dade van liefde en omgee. Dit is om betekenis te vind in die alledaagse, die eenvoudige, die onromantiese, die gewone dinge wat ons doen. Kortom, geluk beteken om die heilige in die alledaagse te ontdek.