Bible Society of South Africa
Leesplanne
Oorlog en vrede
Oorlog en vrede – Dag 7

Oorlog en vrede – Dag 7

Leef saam in vrede

Bybelteks(te)

JESAJA 2

2Daar kom 'n tyd dat die berg

waarop die huis van die Here is,

'n blywende plek sal hê bokant die bergtoppe

en sal uitstaan bo die heuwels.

Al die nasies sal daarheen stroom,

3baie volke sal daarnatoe gaan en sê:

“Kom, laat ons optrek na die berg van die Here toe,

na die huis van die God van Jakob

sodat Hy ons sy wil kan leer,

en ons daarvolgens kan lewe,

want uit Sion kom die openbaring,

uit Jerusalem die woord van die Here.”

4Hy sal oordeel tussen die nasies,

regspreek oor baie volke.

Hulle sal van hulle swaarde ploegskare smee

en van hulle spiese snoeiskêre.

Die een nasie sal nie meer die swaard teen die ander opneem nie,

en hulle sal nie meer leer om oorlog te maak nie.

5Kom, volk van Jakob,

laat ons lewe in die lig wat van die Here af kom.

JESAJA 2:2-5AFR83Maak oop in die Bybelleser

Gister het ons gelees van die hoopvolle toekoms wat Jesaja bied. Vandag sien ons dat hy aan die begin van sy boek reeds vir ons gewys het wat vir God belangrik is. Alle nasies sal na die berg van God optrek waar Hy sal regspreek. Ná sy verhoor sal Hy ʼn einde maak aan alle oorloë en geweld. Wapens sal in landbougereedskap omskep word.

Om die aarde vrugbaar te maak en God se skepping te geniet, is wat vir God saak maak. Hy belowe dat daar ʼn tyd sal kom dat mense sal besef dat hulle nie meer geweld teen mekaar hoef te gebruik nie. Almal sal in vrede saamleef.

Die teks (Jesaja 2:4) oor swaarde wat in ploegskare omskep word, word in verskeie kunswerke uitgebeeld wat jy by die Verenigde Nasies-gebou in New York sal vind. Dit wys dat die Bybelse teks steeds dien as inspirasie om oorloë te beëindig en vrede te herstel.

Wat kan jy vandag doen om hierdie visie te help bewaarheid?

Bible Society of South Africav.4.26.9
VOLG ONS