Nader tot God – Dag 1

Aan die begin van 2015 het ek tydens my radioprogram die luisteraars gevra om hulle Nuwejaarsvoorneme via ons SMS-lyn te deel. Die oorgrote meerderheid se voorneme, buiten om gesonder te leef, was om God vanjaar beter te leer ken. Dit het my laat dink. Hoe doen ʼn mens dit? Hoe groei jy nader aan God? Hoe beleef jy sy teenwoordigheid meer tasbaar in jou lewe? En hoe kan ons seker weet dat dit wel Hy is wat ons in belangrike besluite lei?

Een van die Skrifgedeeltes wat gelowiges gewoonlik ter bemoediging deel wanneer iemand sê dat hul God beter wil leer ken, is die woorde in Jakobus 4:8a: “Nader tot God en Hy sal tot julle nader.” Dit is waar. Tog, wanneer laas het jy die tweede gedeelte van daardie teksvers gelees? “Was julle hande, sondaars, en reinig julle harte, huigelaars” (Jakobus 4:8b).

Die tweede gedeelte bevat die sleutel vir die eerste gedeelte van die teksvers. Hoekom? Omdat nie een van ons werklik nader aan God kan groei of sy stem duideliker in ons lewens kan ervaar as ons doelbewus aan sonde in ons lewens vashou nie. Hoekom? Omdat God heilig is en ʼn strewe na heiligheid ons selfvertroue gee om in sy teenwoordigheid te staan.

Beteken dit dat ons perfek moet wees voordat ons na Hom toe kan gaan? Natuurlik nie. Ons almal het gesondig. Juis daarom het Jesus vir ons aan die kruis gesterf. Jou begeerte om meer heilig te word, is die beginpunt waar die Heilige Gees die blokkasie wat sonde in ons verhouding met God veroorsaak, wegneem sodat ons selfvertroue om in God se teenwoordigheid te staan herstel kan word.

Wat blokkeer die vloei van die Heilige Gees in jou lewe? ʼn Buite-egtelike verhouding, ʼn duistere finansiële transaksie, ʼn kort humeur, bekommernisse, ʼn voorliefde vir skinderpraatjies, bitterheid, ʼn onvergewensgesindheid, ʼn verslawing, ʼn gebrek aan tydsbeplanning? Wanneer laas het jy hierdie ding (of dinge) in jou lewe na God geneem en Hom gevra om jou te bevry?

Onthou, God se begeerte vir ʼn verhouding met ons elkeen is selfs sterker as wat ons begeerte ooit kan wees om Hom beter te leer ken. Dit is immers hoekom Hy ons elkeen geskape het. Kom ons nader tot Hom met die wete dat sy hand reeds na ons uitgestrek is. Al wat ons moet doen, is om dit te vat. Gaan jy? Sterkte.