Na die Woord – Dag 98

₁Ellende wag vir Ariël, Ariël, die stad

wat deur Dawid beleër is.

Laat die jare maar op mekaar volg,

laat die feestye hulle verloop neem,

₂Ek sal Ariël beleër

en daar sal ellende op ellende in hom wees,

hy sal vir My 'n vuurmaakplek wees.

₃Ek sal jou van alle kante af beleër,

Ek sal wagposte inrig rondom jou

en beleëringswalle teen jou opgooi.

₄Jy sal val, jy sal uit die grond uit praat,

jou woorde sal dof uit die stof uit opklink,

jou stem sal uit die grond uit kom

soos dié van 'n spook,

jy sal uit die stof uit mompel.

₅Maar die hordes vyande wat jy het, sal word soos fyn stof,

dié wrede hordes sal soos kaf weggewaai word.

Skielik, in 'n oogwink,

₆sal die Here die Almagtige Hom oor jou ontferm

met donderslae en aardbewings, met 'n magtige dreuning,

met storms en orkane, met verterende vuur.

₇Dit sal met al dié nasies gaan soos in 'n slegte droom,

dié hordes wat teen Ariël oorlog maak,

almal wat hom en sy vestings aanval

en hom beleër:

₈dit sal met hulle gaan soos wanneer iemand wat honger is

en droom hy eet, nog honger is as hy wakker word;

soos wanneer iemand wat dors is

en droom hy drink water, nog kragteloos is,

nog versmag van dors as hy wakker word.

So sal dit gaan met al dié nasies,

dié hordes wat oorlog maak teen Sionsberg.

₉Nou staan julle verdwaas en verstom;

julle sien niks, julle oë is toe;

julle is dronk maar nie van wyn nie,

julle waggel sonder dat julle iets gedrink het,

₁₀want die Here het julle in 'n diep slaap laat wegsak:

die profete moes julle oë wees

en die sieners julle koppe,

maar julle oë is nou toe

en daar is 'n doek oor julle koppe.

₁₁Elke openbaring is nou vir julle

soos die woorde in 'n verseëlde boek:

jy gee dit vir iemand wat kan lees

en jy vra: “Lees dit asseblief vir my,”

en hy sê: “Ek kan nie, die boek is verseël.”

₁₂Of jy gee die boek vir iemand wat nie kan lees nie

en jy vra: “Lees dit asseblief vir my,”

en hy sê: “Ek kan nie lees nie.”

₁₃Die Here het gesê:

Hierdie volk is naby My met die mond,

hulle eer My met wat hulle sê,

maar hulle hart is ver van My af,

hulle dien My soos mense dit wil hê,

nie soos Ek wil nie.

₁₄Daarom gaan Ek nog ongehoorder dinge doen met hierdie volk:

die een ongehoorde ding na die ander,

sodat die wysheid van sy wyse manne sal verdwyn,

die verstand van sy verstandige mense tot niet sal gaan.

₁₅Ellende wag vir dié wat dink

hulle kan hulle planne diep wegsteek vir die Here,

hulle wat besig is om dinge in die donker te doen

en dink: wie sien ons? Wie weet van ons?

₁₆Julle is agterstevoor met alles,

asof die pottebakker die klei is.

Die maaksel kan mos nie van sy maker sê:

“Hy het my nie gemaak nie”;

die kleipot kan mos nie van die pottebakker sê:

“Hy weet nie wat hy doen nie.”

₁₇Nog net 'n baie kort tydjie,

dan verander die Libanon in 'n vrugteboord

en word die vrugteboord so dig

dat dit vir 'n bos aangesien word.

₁₈Daardie dag sal die dowes kan hoor

wat daar in die boek staan,

en sal die blindes weer kan sien

uit die donker, uit die duisternis uit.

₁₉Die mense in nood sal weer bly wees oor die Here,

die arm mense sal juig oor die heilige God van Israel.

₂₀Daar sal nie meer wreedaards wees nie;

dit sal klaar wees met die ligsinniges,

elkeen wat altyd gereed was om onreg te doen,

sal uitgeroei word,

₂₁ook dié wat sommer mense tot oortreders verklaar het,

strikke gespan het vir dié wat reg wou laat geskied,

en onskuldige mense hulle reg ontneem het

deur vals getuienis.

₂₂So sê die Here, Hy wat vir Abraham verlos het,

Hy sê oor Jakob:

Die nageslag van Jakob sal hulle nie meer hoef te skaam nie,

hulle sal nie meer bleek van verleentheid hoef te word nie,

₂₃want wanneer hulle die kinders sien wat Ek aan hulle gee,

sal hulle my heilige Naam eer;

hulle sal die heilige God van Jakob eer,

hulle sal ontsag hê vir die God van Israel.

₂₄Dan sal dié wat gedwaal het, insig kry,

en dié wat gedurig foutgevind het, sal hulle laat leer.

₁Ellende wag vir die rebelse mense

wat planne uitvoer wat nie van My af kom nie, sê die Here,

dié wat verdrae sluit wat nie volgens my wil is nie

en so sonde op sonde stapel.

₂Hulle gaan af na Egipte toe

sonder om My te raadpleeg,

hulle gaan soek steun by die mag van die farao,

hulle wil beskerming by Egipte hê,

₃maar hulle sal teleurgestel staan met die farao se mag en al,

die beskerming deur Egipte sal hulle niks baat nie.

₄Die leiers van Juda is al in Soan,

sy boodskappers het al in Ganes aangekom,

₅maar hulle sal almal teleurgestel word

deur dié volk wat nie kan help nie,

wat nie hulp en bystand kan verleen nie

maar wat skande en vernedering bring.

Die gesante van Juda bring hulle ryk geskenke, hulle skatte,

op die rûe van hulle donkies en hulle kamele;

hulle bring dit deur 'n gebied vol gevaar en angs

waar leeus en slange boer en waar drake rondvlieg,

hulle bring dit na 'n volk toe wat nie kan help nie.

₇Egipte is niks, sy hulp beteken niks!

Ek noem hom Rahab, die een wat niks kan doen nie.

₈Gaan skryf dit nou op waar Juda by is,

teken dit aan dat dit altyd teen hulle kan getuig

in die dae wat kom.

₉Hulle is 'n weerbarstige volk,

hulle is mense wat lieg

en wat weier om te luister

na wat die Here wil.

₁₀Hulle sê vir die sieners:

“Moenie gesigte sien nie!”

Hulle sê vir dié wat gesigte sien:

“Moenie gesigte sien oor wat ons moet doen nie,

vlei ons liewer,

sien liewer dinge wat ons mislei!

₁₁Gee pad voor ons, moenie voor ons kom staan nie;

laat die Heilige van Israel

uit ons teenwoordigheid verdwyn!”

₁₂So sê die Heilige van Israel:

Julle het my waarskuwing verwerp,

julle het julle vertroue gestel in geweld en bedrog

en daarop gesteun.

₁₃Daarom word hierdie sonde vir julle

'n hoë stuk muur wat oorhang en dreig om te val

en dan skielik, onverwags inmekaarstort

₁₄en in stukke spat soos 'n groot kleipot

wat meedoënloos fyn geslaan word

sodat daar onder al sy skerwe nie een oor is

om mee kole uit 'n vuurmaakplek te krap

of water uit 'n opgaarput te skep nie.

₁₅So het die Here my God, die Heilige van Israel, gesê:

As julle julle bekeer en tot rus kom,

sal julle gered word.

Julle krag lê in stil wees en vertroue hê.

Maar dit wou julle nie; ₁₆julle het gesê:

“Nee, ons sal op perde wegjaag,

ons sal vinnige perde ry.”

Dan sál julle vlug,

maar julle agtervolgers sal vinniger wees.

₁₇Duisend van julle sal vlug as één julle bedreig,

en as vyf julle bedreig, sal julle aanhou vlug

totdat die paar wat van julle oorbly,

soos 'n eensame vlagpaal op 'n berg,

soos 'n enkele vaandel op 'n heuwel sal wees.

₁₈Tog is die Here gretig om julle genadig te wees

en wil Hy Hom oor julle ontferm:

Die Here is 'n God wat reg laat geskied,

en dit gaan goed met elkeen wat op Hom vertrou.

₁₉Jy, volk in Sion, jy wat in Jerusalem woon,

jy hoef nie meer te huil nie.

Die Here sal jou genadig wees as jy na Hom roep om hulp,

Hy sal jou gebed verhoor sodra Hy dit hoor.

₂₀Die Here het jou honger en dors laat ly,

maar Hy wou jou leer,

en Hy sal Hom nou nie meer afsydig hou van jou nie;

jy sal self sien dat Hy die Een is wat jou leer.

₂₁Wanneer jy die regte koers verlaat,

sal jy agter jou 'n stem hoor sê:

“Hier is die pad, loop hierlangs.”

₂₂Dan sal jy besef dat jou afgode, jou beelde

wat jy met silwer en goud oorgetrek het, onrein goed is,

en jy sal hulle weggooi soos 'n mens 'n smerige lap weggooi;

jy sal sê: “Weg met hulle!”

₂₃Dan sal die Here reën gee op die saad

wat jy in die land gesaai het,

en sal jou grond kos vir jou lewer

wat ryk en voedsaam sal wees.

Jou kleinvee sal wei in uitgestrekte grasveld.

₂₄Die beeste en die donkies waarmee jy die grond bewerk,

sal kragvoer kry om te vreet

wat met graaf en gaffel gemeng is.

₂₅Dié dag wanneer die vyand by die duisend sal sneuwel

en wanneer die torings omval,

sal daar op elke hoë berg, elke hoë heuwel,

spruite vol water wees.

₂₆Dié dag wanneer die Here die wonde van sy volk verbind

en die seerplekke genees waar Hy hulle geslaan het,

sal die maan so helder skyn as die son

en die son sewe maal so helder as die lig van sewe dae saam.

₂₇Die Here verskyn uit die verte;

sy toorn breek los, onweer dreig;

as Hy praat, is dit vol gramskap,

sy woorde is vlamme van vuur.

₂₈Sy asem is 'n siedende stroom

wat mense meesleur.

Hy kom om die nasies te sif in 'n fyn sif,

om vir hulle 'n toom aan te sit en hulle weg te lei.

₂₉Maar julle sal sing

soos in die nag voor 'n fees,

julle sal vrolik wees

soos wanneer mense met fluitspel begin loop

na die berg van die Here toe,

na die Rots van Israel toe.

₃₀Die Here sal sy magtige stem laat hoor,

Hy sal sy krag openbaar

in gloeiende toorn, verterende vuur,

storm, onweer en hael.

₃₁Assirië sal sidder vir die stem van die Here

wanneer Hy begin slaan,

₃₂en elke keer wanneer die slae op Assirië afkom

en hom tref,

sal die simbale en die liere weerklink.

Die Here sal self teen Assirië veg.

₃₃Daar is 'n brandoond gereed gemaak, lank gelede al;

dit is diep en wyd en bedoel vir die koning van Assirië.

Daar is 'n groot hoop brandhout in

en die asem van die Here steek dit aan die brand

soos 'n stroom swael.

₁Ellende wag vir dié wat by Egipte hulp gaan vra;

hulle verlaat hulle op perde,

hulle is vol vertroue as daar baie strydwaens is,

as hulle oor 'n menigte ruiters kan beskik;

maar op die Heilige van Israel vertrou hulle nie,

na die wil van die Here vra hulle nie.

₂Hý is die Een wat wysheid het;

daarom het Hy 'n ramp laat losbreek

en het Hy nie afgesien van wat Hy gesê het nie:

Hy tree op teen die volk wat altyd verkeerd doen

én teen die volk wat hulp verleen aan dié wat onreg doen.

₃Die Egiptenaars is mense, hulle is nie gode nie,

en hulle perde is maar net perde, nie bonatuurlike wesens nie.

As die Here sy hand uitsteek, val die helper én die een wat gehelp word

en gaan hulle saam onder.

Soos 'n leeu, 'n maanhaar, by sy prooi lê en grom

en hom nie laat afskrik deur die harde geskreeu van veewagters

wat teen hom saamgeroep is nie,

en hom nie steur aan hulle lawaai nie,

so sal die Here die Almagtige, wanneer Hy neerdaal,

sy oorlog veg op Sionsberg,

op die heuwel waar Sion lê.

₅Soos voëls beskermend oor hulle neste sweef,

so sal die Here die Almagtige die skild oor Jerusalem wees;

Hy sal beskermend verbykom

en so sal Hy red en bevry.

₆Israeliete, bekeer julle tot Hom

van wie julle so ver verwyder geraak het.

₇Daardie dag, wanneer julle elkeen sy afgode weggooi,

die afgode van silwer en van goud

wat julle self gemaak het en waarmee julle gesondig het,

₈sal die Assiriërs deur die swaard afgemaai word,

maar nie die swaard van 'n mens nie,

hulle sal uitgewis word deur die swaard,

maar nie die swaard van 'n mens nie.

Hulle sal voor die swaard uit moet vlug,

en hulle jongmanne sal dwangarbeiders word.

₉Die koning vir wie hulle as hulle rots beskou,

sal van angs op die vlug slaan,

en hulle leiers sal paniekbevange van die vaandel af padgee,

sê die Here ter ere van wie die vuur in Sion brand,

ter ere van wie die altaar in Jerusalem rook.

₁Daar sal 'n koning kom wat reg sal regeer

en amptenare wat reg sal laat geskied.

₂Hulle sal elkeen soos 'n skerm teen die wind,

soos 'n skuiling teen die stortreën wees,

soos strome water in 'n dor land,

soos die skaduwee van 'n groot rots in 'n kaal wêreld.

₃Dan sal die oë van dié wat moet sien, nie meer toe wees nie

en sal die ore van dié wat moet hoor, weer kan hoor.

₄Die verstand van onbesonne mense sal kennis kan verwerk

en die hakkelaars sal vlot kan praat.

₅'n Dwaas sal nie meer as eerbaar beskou word nie

en 'n skurk nie meer as edel beskryf word nie.

₆'n Dwaas laster teen God,

sy gedagtes is net met sonde besig;

wat hy doen, wys dat hy ver van die Here af leef,

wat hy vir die Here sê, is vals.

So iemand laat 'n honger mens honger bly

en weier om 'n dors mens water te gee.

₇'n Skurk se motiewe is kwaadwillig,

hy smee boosaardige planne

om met leuens die ondergang van eenvoudige, arm mense te bewerk,

ook al beroep hulle hulle op die reg.

₈'n Eerbare mens het eerbare bedoelings

en hy kom op vir wat eerbaar is.

₉Gee aandag, luister na my, julle vrouens wat so onbesorg lewe,

luister na wat ek sê, julle wat so selfversekerd is!

₁₀Julle wat nou so selfversekerd is,

sal oor iets meer as 'n jaar rede hê om te bewe:

daar sal nie druiwe wees om te oes nie,

geen vrugte om te pluk nie.

₁₁Staan maar nou al verskrik, onbesorgdes,

begin maar bewe, selfversekerdes!

Trek uit julle klere, trek rouklere aan,

₁₂slaan julle borste van smart

oor die welige landerye, die vrugbare wingerde,

₁₃oor my volk se grond

wat oortrek is met dorings en dissels,

oor al die huise waarin daar soveel vrolikheid was,

oor die stad wat altyd so uitgelate feesgevier het.

₁₄Die paleis lê verlate,

die stad wat so bedrywig was, is leeg.

Waar Ofel en die wagtoring was,

is dit vir altyd net veld

waar wildedonkies lustig vreet

en troppe vee wei.

₁₅So sal dit wees totdat die Gees

van Bo af op ons uitgestort word.

Dan word die woestyn 'n vrugteboord

en word die vrugteboord so dig

dat dit vir 'n bos aangesien word.

₁₆Maar in woestyn en in vrugteboord

sal reg geskied en reg gedoen word.

₁₇Wie reg doen, sal vrede hê;

wie volhard in regdoen, sal vir altyd rus en sekerheid geniet.

₁₈My volk sal in rustige velde woon,

in veilige wonings,

op plekke waar daar rus is en geen sorge nie.

₁₉Al slaan hael die bosse weg,

al word die stad met die grond gelyk gemaak,

₂₀met julle sal dit goed gaan:

julle sal saai langs baie waters,

julle sal julle beeste en julle donkies vry laat loop.

“'n Mens leef nie net van brood nie

maar van elke woord

wat uit die mond van God kom.”

“Hy sal sy engele oor jou opdrag gee

“Op hulle hande sal hulle jou dra, sodat jy nie jou voet teen 'n klip sal stamp nie.”

“Die Here jou God moet jy aanbid en Hom alleen dien.”

₁₅“Jy, gebied van Sebulon en gebied

van Naftali, aan die seekant

en oorkant die Jordaan,

Galilea waar die heidene woon!

₁₆Die volk wat in duisternis woon,

het 'n groot lig gesien;

hulle wat in die skemerland

van die dood lewe,

vir hulle het die lig opgegaan.”