Na die Woord – Dag 221

₁Prys die Here!

Loof die Here, want Hy is goed,

aan sy liefde is daar geen einde nie!

₂Wie kan die magtige dade van die Here onder woorde bring?

Wie kan sy lof ten volle verkondig?

₃Dit gaan goed met mense wat die reg handhaaf,

wat by elke geleentheid geregtigheid doen.

₄Dink aan my, Here, in u liefde vir u volk,

sluit my ook in by u redding,

₅dat ek die voorspoed van u uitverkorenes mag aanskou

en mag deel in die blydskap van u volk,

my mag verheug saam met dié wat aan U behoort.

₆Ons het gesondig, net soos ons voorvaders,

ons het verkeerd gedoen, ons is skuldig.

₇Ons voorvaders het in Egipte nie ag geslaan op u magtige dade nie,

hulle het nie gedink aan al u dade van trou nie,

hulle het teen U in verset gekom by die Rietsee.

₈Maar Hy het hulle gered ter wille van die eer van sy Naam

en om sy mag bekend te maak.

₉Hy het die Rietsee aangespreek en dit het opgedroog,

Hy het sy volk oor die seebodem laat trek soos oor droë grond.

₁₀So het Hy hulle gered uit die hand van hulle haters,

hulle bevry uit die mag van die vyand.

₁₁Die waters het hulle teëstanders verswelg,

nie één het oorgebly nie.

₁₂Tóé het sy volk sy beloftes geglo

en sy lof besing.

₁₃Maar hulle het gou vergeet wat Hy gedoen het

en nie op sy leiding gewag nie.

₁₄Hulle het skaamteloos meer kos geëis in die woestyn,

daar in die barre wêreld het hulle die geduld van God beproef.

₁₅Toe het Hy hulle gegee wat hulle gevra het,

maar hulle van siekte laat wegteer.

₁₆Langs die trekpad het hulle hulle in afguns teen Moses verset

en teen Aäron wat aan die Here gewy was.

₁₇Toe het die aarde geskeur en vir Datan verslind,

dit het die bende van Abiram verswelg.

₁₈'n Vuur het hulle hele bende verteer,

die goddelose het in die vlamme omgekom.

₁₉By Horeb het hulle 'n kalf gemaak,

voor 'n god van metaal gekniel.

₂₀Hulle het die magtige teenwoordigheid van God

verruil vir die beeld van 'n bees wat gras vreet.

₂₁So het hulle vir God, hulle redder, vergeet,

Hy wat groot dinge in Egipte gedoen het,

₂₂wonderdade in die land van Gam,

magtige dade by die Rietsee.

₂₃Die Here wou hulle verdelg,

maar Moses, sy uitverkorene,

het by Hom vir hulle in die bres getree

om sy gramskap af te keer,

sodat Hy hulle nie vernietig het nie.

₂₄Hulle het 'n waardevolle land versmaai

en die belofte van die Here nie geglo nie;

₂₅hulle het in hulle tente gesit en mor

en nie na die Here geluister nie.

₂₆Toe het Hy 'n eed afgelê

dat Hy hulle in die woestyn sou laat omkom,

₂₇hulle nageslag sou laat sterf onder heidense nasies,

hulle oor die wêreld sou verstrooi.

₂₈Hulle het Baäl-Peor aangehang

en geëet van wat aan die dooie afgode geoffer is.

₂₉Hulle het die Here uitgetart met wat hulle gedoen het,

en 'n plaag het onder hulle uitgebreek.

₃₀Pinehas het opgetree en die skuldiges gestraf,

en die plaag het opgehou.

₃₁Dié optrede is deur al die geslagte heen

vir Pinehas as 'n daad van geregtigheid toegereken.

₃₂Die volk het die Here se toorn by die Meribawaters laat ontvlam,

en Moses het die wrange vrugte van hulle optrede gepluk:

₃₃hulle het hom so verbitterd laat raak

dat hy onbesonne dinge gesê het.

₃₄Hulle het nie die ander volke uitgeroei

soos die Here hulle beveel het nie,

₃₅maar hulle met die heidene vermeng

en húlle praktyke aangeleer:

₃₆hulle het die afgode van die heidene begin dien

en daarin verstrik geraak.

₃₇Hulle het hulle seuns en dogters aan veldduiwels geoffer

₃₈en onskuldige bloed vergiet,

die bloed van hulle seuns en dogters

wat hulle aan die afgode van Kanaän geoffer het.

So is die land met bloed bevlek.

₃₉Die volk het hulle verontreinig deur hulle optrede

en het troubreuk gepleeg deur hulle dade.

₄₀Die toorn van die Here het teen sy volk ontvlam,

Hy het 'n weersin gekry in die volk wat aan Hom behoort

₄₁en hulle aan heidene oorgegee,

sodat hulle haters oor hulle geheers het.

₄₂Hulle vyande het hulle verdruk

en hulle onder hulle gesag laat buig.

₄₃Talle kere het die Here sy volk gered,

maar hulle het opstandig gebly

en dieper in hulle sonde weggesink.

₄₄Tog het Hy sy oë nie vir hulle nood gesluit nie;

Hy het hulle smeekgebede verhoor.

₄₅Ter wille van hulle het Hy aan sy verbond gedink,

en in sy groot liefde was Hy genadig.

₄₆Hy het hulle medelye laat vind

by dié wie se gevangenes hulle was.

₄₇Red ons, Here ons God,

maak ons bymekaar tussen die volke uit,

dat ons u heilige Naam kan loof

en ons in u lof kan verheug.

₄₈Aan die Here die God van Israel kom die lof toe

tot in die allerverste toekoms.

Die hele volk moet sê: “Amen!

Prys die Here!”

₁“Loof die Here, want Hy is goed,

aan sy liefde is daar geen einde nie!”

₂So moet die mense sê wat deur die Here bevry is,

dié wat Hy uit hulle nood bevry het

₃en uit baie lande versamel het,

uit die ooste en die weste,

die noorde en die suide.

₄Party was verdwaal in die woestyn, in 'n barre wêreld,

en kon die pad na 'n bewoonde stad nie kry nie.

₅Hulle was honger en dors,

hulle was uitgeput,

₆maar in hulle nood het hulle na die Here geroep om hulp

en Hy het hulle gered uit hulle ellende.

₇Hy het hulle op die regte pad gebring

en by 'n bewoonde stad laat uitkom.

₈Hulle moet die Here loof vir sy troue liefde,

vir sy wonderdade wat Hy aan mense doen.

₉Hy het die dors geles van dié wat versmag het,

Hy het die goeie in oorvloed gegee

aan dié wat honger gely het.

₁₀Party het in die donker gesit, in diep duisternis,

hulle was gevangenes, in ellende en in boeie,

₁₁want hulle het hulle verset teen die bevele van God,

hulle het die leiding van die Allerhoogste in die wind geslaan.

₁₂Hy het hulle laat knak onder swaarkry,

hulle het inmekaar gesak, en niemand het gehelp nie.

₁₃Maar in hulle nood het hulle na die Here geroep om hulp,

en Hy het hulle bevry van hulle ellende.

₁₄Hy het hulle uit die donker, uit die diep duisternis, laat uitkom,

Hy het hulle boeie stukkend gebreek.

₁₅Hulle moet die Here loof vir sy troue liefde,

vir sy wonderdade wat Hy aan mense doen,

₁₆want Hy het koperdeure oopgebreek,

ystergrendels stukkend geslaan.

₁₇Party het dwaas opgetree,

en deur hulle rebelse optrede, hulle sonde,

het hulle in die ellende beland.

₁₈Alle kos het hulle laat walg,

en hulle het by die dood omgedraai,

₁₉maar in hulle nood het hulle na die Here geroep om hulp,

en Hy het hulle bevry van hulle ellende.

₂₀Hy het hulle met 'n enkele woord gesond gemaak,

hulle aan die dood laat ontkom.

₂₁Hulle moet die Here loof vir sy troue liefde,

vir sy wonderdade wat Hy aan mense doen.

₂₂Hulle moet dankoffers bring

en met blydskap van sy dade getuig.

₂₃Party het met skepe die see bevaar

en hulle bestaan op die groot waters gemaak.

₂₄Hulle het die werk van die Here ervaar,

sy wonderdade op die diep waters.

₂₅Op sy bevel het 'n stormwind opgesteek

en die golwe opgejaag.

₂₆Die skepe het hemelhoog gestyg

en na die dieptes afgeduik.

Die bemanning was radeloos van angs

₂₇en het soos dronk mense gesteier en gewaggel;

al hulle seemanskuns het niks gehelp nie.

₂₈Maar in hulle nood het hulle na die Here geroep om hulp,

en Hy het hulle veilig uit hulle ellende gelei.

₂₉Hy het die stormwind stilgemaak,

en die golwe van die see het bedaar.

₃₀Die seevaarders het hulle verheug oor die kalmte.

God het hulle veilig gelei na die hawe waar hulle wou kom.

₃₁Hulle moet die Here loof vir sy troue liefde,

vir sy wonderdade wat Hy aan mense doen.

₃₂Hulle moet van sy grootheid getuig in die volksvergadering,

Hom prys in die byeenkoms van die leiers.

₃₃Hy verander waterryke gebied in woestyn,

fonteinwêreld in dorsland,

₃₄Hy maak vrugbare grond brak

oor die slegte dade van dié wat daar woon.

₃₅Hy verander woestyngebied in rietvlei,

dor land in fonteinwêreld

₃₆en laat honger mense hulle daar vestig

dat hulle stede kan stig om in te woon.

₃₇Hulle bewerk lande en plant wingerde,

en dié lewer hulle oeste.

₃₈Hy seën hulle en hulle word vinnig meer,

Hy laat hulle vee nie minder word nie.

₃₉En as die mense minder word en wegkwyn

onder die druk van teëspoed en moeilikheid,

₄₀dan is dit die magtiges wat Hy tref met vernedering

en wat Hy laat ronddwaal in 'n wilde wêreld sonder pad.

₄₁Hy beskerm die armes teen verdrukking

en maak hulle nakomelinge so talryk soos kleinvee.

₄₂As die opregtes dit sien, is hulle bly:

alle onreg het tot 'n einde gekom.

₄₃Wie verstandig is, moet op hierdie dinge ag gee,

hulle moet let op die Here se dade van trou.

₂Ek voel weer veilig, o God,

ek wil 'n lied sing, ja, ek wil sing,

₃ek wil vroeg opstaan,

met harp en lier wil ek die rooidag wakker maak!

₄Onder die volke wil ek U loof, Here,

onder die nasies u lof besing,

₅want u liefde reik tot in die hemel,

u trou tot in die wolke.

₆Toon u grootheid, o God, hoog bo die hemel,

hoog bo die aarde u mag.

₇Verlos ons deur u groot mag, en help ons,

sodat hulle vir wie U liefhet, gered kan word.

₈God het in sy heilige woning gesê:

“As oorwinnaar sal Ek Sigem verdeel

en die Sukkotlaagte uitdeel!

₉Aan My behoort Gilead,

aan My behoort Manasse!

Efraim is my vernaamste vesting,

Juda my koninklike gebied.

₁₀Moab is tot my beskikking,

Edom neem Ek in besit,

oor Filistea juig Ek as oorwinnaar.”

₁₁Wie sal ons na Edom toe lei,

ons bring na sy goed beskermde stad?

₁₂U het ons verstoot, o God,

U trek nie saam met ons leërs uit nie, o God!

₁₃Help U ons tog teen die vyand,

want die hulp van mense – dit is niks.

₁₄Met God aan ons kant sal ons oorwin,

Hy self sal ons vyande vertrap.

U is die God wat ek altyd loof,

moet tog nie my gebede onverhoord laat nie!

₂Dit is goddelose mense en leuenaars wat my aankla.

Hulle getuig vals teen my,

₃met woorde vol haat tref hulle my van alle kante,

sonder enige rede val hulle my aan.

₄My liefde beantwoord hulle met vyandskap,

en dit terwyl ek nog altyd vir hulle gebid het.

₅So vergeld hulle my met kwaad vir goed

en haat vir liefde, en hulle sê:

₆“Stel 'n misdadiger aan as sy regter,

laat een wat vyandig is, hom aankla;

₇sorg dat hy skuldig bevind word,

laat selfs sy gebed teen hom tel as 'n misdaad.

₈Laat sy lewe kort wees

en laat 'n ander sy amp oorneem!

₉Mag sy kinders wees word,

sy vrou 'n weduwee!

₁₀Laat sy kinders as bedelaars rondswerf

en tussen die puinhope van hulle huise kos soek.

₁₁Laat die skuldeiser beslag lê op al sy besittings,

laat vreemdes plunder wat hy met moeite bymekaargemaak het!

₁₂Laat niemand aan hom liefde bewys nie,

laat niemand hom die lot van sy kinders aantrek nie.

₁₃Laat sy nageslag uitgeroei word,

laat hulle naam binne een geslag uitgewis wees!

₁₄Mag die Here die ongeregtigheid van sy voorvaders nie vergeet nie,

mag die sonde van sy moeder nooit uitgewis word nie!

₁₅Laat dit voortdurend vir die Here bly bestaan,

maar laat hulle naam van die aarde af gevee word

₁₆omdat hy nie daaraan gedink het om liefde te bewys nie:

hy het die mens in nood en die arme,

dié wat plat geslaan is, tot die dood toe vervolg.

₁₇Hy het graag vervloek, laat die vloek hóm tref!

Hy het nie graag geseën nie, laat seën ver van hóm af wees!

₁₈Om mense te vervloek, is vir hom soos klere dra,

soos water drink,

soos lyfolie aansmeer.

₁₉Laat sy vloek hom aankleef soos sy klere,

soos 'n gordel wat hy deurentyd dra!”

₂₀Mag die Here dit alles oor my teëstanders laat kom,

oor dié wat my sulke vreeslike dinge toewens.

₂₁U is die Here my God,

handel met my só dat u Naam geëer sal word.

U is goed en getrou, red my tog.

₂₂Ek is hulpeloos en arm,

my hart is inmekaargekrimp in my.

₂₃Soos 'n skaduwee wat lank word, is my einde naby,

en ek word weggevee soos 'n sprinkaan.

₂₄My knieë knak al soos ek gevas het,

my liggaam is uitgeteer en maer.

₂₅Ek het die spot van die mense geword;

hulle kyk met veragting na my

en knik met voldoening die kop.

₂₆Help my, Here my God,

red my in u troue liefde,

₂₇dat mense kan weet dat dit u hand is,

U, Here, wat dit gedoen het.

₂₈Húlle vloek my, maar U sal my seën.

Hulle kla my aan, maar hulle sal verloor,

en ek, u dienaar, sal bly wees.

₂₉Laat my teëstanders met skande oordek word,

laat vernedering hulle aankleef soos hulle klere.

₃₀Dan sal ek my lof aan die Here laat weerklink

en Hom voor 'n groot skare prys,

₃₁want Hy staan by die arme

en red hom van dié wat hom ter dood wil veroordeel.

Die Here het vir my heer die koning gesê:

“Kom sit aan my regterhand,

en Ek sal jou vyande aan jou onderwerp.”

₂As die Here die septer, simbool van u mag,

uit Sion aan u oorhandig,

heers dan oor u vyande!

₃U volk is gereed

vir die dag waarop u u magte monster.

U jongmanne is u krag

as hulle teen dagbreek aantree,

geklee vir die heilige stryd.

₄Die Here het 'n eed afgelê

en Hy sal dit nie herroep nie:

“Jy sal altyd priester wees

in die priesterorde van Melgisedek.”

₅Die Here gee u die oorwinning,

Hy verdelg konings die dag as Hy sy toorn laat losbreek.

₆Hy straf die nasies,

Hy verdelg hulle leiers,

Hy laat die wêreld vol lê van hulle lyke.

₇Die koning drink water uit die stroom langs die pad,

hy sal die oorwinning behaal.

Met my hele hart wil ek die Here loof

in die samekoms van die opregtes, in die gemeente.

₂Die werke van die Here is groot,

almal wat daarin vreugde vind, dink daaroor na.

₃Sy dade is vol majesteit en luister,

sy trou staan vir altyd vas.

₄Hy sorg dat sy magtige dade nie vergeet word nie.

Genadig en barmhartig is die Here.

₅Hy voed dié wat Hom dien,

Hy hou sy verbond altyd in stand.

₆Hy het sy volk die krag van sy dade laat ervaar,

Hy het aan hulle die land van ander nasies gegee.

₇Wat Hy doen, getuig van trou en reg,

al sy voorskrifte staan vas,

₈hulle is vir altyd geldig,

hulle is gegee in trou en regverdigheid.

₉Hy het vryheid vir sy volk bewerk,

sy verbond vir altyd ingestel.

Sy Naam is heilig, dit wek ontsag.

₁₀Wysheid begin met die dien van die Here;

almal wat dit doen, het ware insig.

Die roem van die Here hou altyd stand.