Na die Woord – Dag 219

₁Die Here is Koning,

Hy beklee Hom met majesteit.

Die Here beklee Hom, Hy omgord Hom met krag.

Die wêreld staan vas, dit wankel nie,

₂en vas staan u troon van ouds af:

U is van altyd af daar.

₃Riviere het gedruis, Here,

riviere het gedruis,

riviere het gedreun,

₄maar hoog bo die geraas van baie waters,

hoog bo die golwe van die see,

troon die Here in sy koninklike mag.

₅U verordeninge staan baie vas.

Heiligheid versier u huis, Here,

tot in lengte van dae.

₁Here, God wat onreg straf,

U wat onreg straf, verskyn tog!

₂Kom, Regter van die aarde,

reken af met die mense wat hulle teen U verhef.

₃Hoe lank, Here,

hoe lank sal die goddeloses hulle nog verlustig

in die leed van ander mense?

₄Hulle kook oor van vermetelheid;

almal wat onreg doen, spog daarmee.

₅Hulle vertrap u volk, Here,

hulle verdruk die volk wat aan U behoort;

₆hulle vermoor weduwees en vreemdelinge,

hulle maak weeskinders dood

₇en dink die Here sien dit nie,

die God van Jakob merk dit nie.

₈Gebruik tog julle verstand, julle wat so dom optree onder die volk.

Julle dwase, wanneer wil julle dan verstandig word?

₉Sou Hy wat vir ons ore gemaak het, self nie kan hoor nie?

Sou Hy wat vir ons oë gemaak het, nie kan sien nie?

₁₀Sou Hy wat die nasies opvoed, nie ook straf nie?

Sou Hy wat die mensdom onderrig, self niks weet nie?

₁₁Die Here ken die gedagtes van die mens,

Hy weet dit beteken niks.

₁₂Dit gaan goed met die mens

wat deur U opgevoed word, Here,

vir wie U onderrig in u woord

₁₃en vir wie U rus gee na tye van teëspoed.

Maar vir die goddelose word die graf reeds gegrawe.

₁₄Die Here verstoot nie sy volk nie,

die volk wat aan Hom behoort, laat Hy nie in die steek nie.

₁₅Die regspraak sal weer regverdig wees,

alle opregtes sal hulle daaraan kan hou.

₁₆Wie staan by my teen dié wat my leed aandoen?

Wie help my teen mense wat my veronreg?

₁₇As die Here my nie gehelp het nie,

was die stilte van die graf seker al my tuiste!

₁₈Toe ek gedink het my voete gly,

het u troue liefde my regop gehou, Here.

₁₉Toe ek met baie onrus in my binneste sit,

het u vertroosting my tot rus gebring.

₂₀U duld geen korrupsie in die regspraak nie,

geen mens wat, teen u gebod in, ellende veroorsaak nie.

₂₁Hulle span saam teen die regverdige,

hulle veroordeel onskuldige mense tot die dood.

₂₂Maar vir my is die Here 'n veilige vesting,

my God is die rots waar ek kan skuil.

₂₃Hy sal hulle laat boet vir hulle dade,

Hy sal hulle verdelg oor hulle boosheid.

Die Here ons God sal hulle verdelg.

₁Kom, laat ons jubel tot eer van die Here,

laat ons juig oor die rots by wie ons redding vind,

₂laat ons na Hom toe gaan met lof,

laat ons Hom toejuig met lofsange,

₃want die Here is die magtige God,

die groot koning oor al die gode.

₄Die dieptes van die aarde behoort aan Hom,

die kruine van die berge is Syne.

₅Die see is Syne, Hy het dit gemaak;

sy hande het die land gevorm.

₆Kom ons val in eerbetoon voor Hom neer,

kom ons buig,

kom ons kniel voor die Here ons Skepper!

₇Hy is ons God en ons is sy volk,

sy kudde, sy skape, deur sy hand versorg.

As julle vandag maar na Hom wou luister:

₈“Moenie hardkoppig wees soos destyds by Meriba,

soos die dag by Massa in die woestyn nie,

₉waar julle voorvaders My uitgetart

en my geduld beproef het,

hoewel hulle gesien het wat Ek gedoen het.

₁₀Veertig jaar lank het Ek 'n weersin in daardie geslag gehad,

Ek het gesê: ‘Hulle is 'n moedswillige volk,

hulle wil my paaie nie ken nie.’

₁₁Daarom het Ek in my toorn 'n eed afgelê

dat hulle nooit sou uitkom

by die rusplek wat Ek hulle wou gee nie.”

₁Sing 'n nuwe lied tot eer van die Here,

sing tot eer van die Here, almal op aarde!

₂Sing tot eer van die Here, prys sy Naam,

verkondig elke dag sy reddingsdade!

₃Vertel die nasies van sy mag,

al die volke van sy magtige dade.

₄Die Here is groot, al die lof kom Hom toe,

ontsagwekkend is Hy bo alle gode.

₅Al die gode van die volke is niks:

dit is die Here wat die hemele gemaak het.

₆Majesteit en luister straal van Hom uit,

krag en glans vul sy heiligdom.

₇Prys die Here, alle volke,

prys die Here om sy eer en mag!

₈Prys die Here om die eer van sy Naam!

Kom na sy voorhowe toe, bring vir Hom offers!

₉Buig voor die Here by sy heilige verskyning;

betoon eerbied aan Hom, almal op aarde.

₁₀Verkondig onder die nasies: “Die Here regeer;

die wêreld staan vas, dit wankel nie;

die Here sal die volke regverdig oordeel.”

₁₁Die hemele moet bly wees en die aarde moet juig,

die see en alles daarin moet druis,

₁₂die veld en alles daarop moet jubel,

al die bome in die bos moet hulle verheug

₁₃voor die Here, want Hy kom,

Hy kom om oor die aarde te heers.

Hy sal oor die wêreld heers met regverdigheid,

oor die volke met billikheid.

₁Die Here regeer, die aarde moet juig,

al die baie eilande moet bly wees!

₂Die Here is omgewe van donker wolke;

sy troon is gebou op reg en geregtigheid.

₃'n Vuur trek voor Hom uit

en verteer sy vyande aan alle kante.

₄Sy weerligstrale verlig die wêreld;

die aarde sien dit en bewe.

₅Berge smelt soos was voor die Here,

voor die Here van die aarde.

₆Die hemel getuig dat Hy regverdig is

en al die volke sien sy magtige verskyning.

₇Almal wat beelde dien,

wat nikswerd afgode vereer, word ontnugter,

want al hulle gode moet voor die Here buig.

₈Sion is bly, die stede van Juda juig

wanneer hulle hoor wat U as regter gedoen het, Here.

₉U, Here, is die Allerhoogste oor die hele aarde,

hoog verhewe bo alle gode.

₁₀Julle het die Here lief; haat dan wat sleg is!

Hy bewaar die lewe van sy troue dienaars,

Hy red hulle uit die greep van die goddelose.

₁₁Vir die regverdiges het daar lig gekom,

blydskap vir die opregtes.

₁₂Wees bly in die Here, regverdiges,

prys sy heilige Naam.

Sing 'n nuwe lied tot eer van die Here,

want Hy het magtige dade gedoen,

deur sy krag en Goddelike mag het Hy oorwin.

₂Die Here het sy oorwinning bekend gemaak,

aan die nasies het Hy sy reddingsdade geopenbaar.

₃Aan die huis van Israel het Hy sy liefde en sy trou herbevestig;

die hele wêreld het gesien dat ons God die oorwinning behaal het.

₄Juig tot eer van die Here, almal op aarde,

wees vrolik, juig en sing!

₅Sing tot eer van die Here met begeleiding van die lier,

speel op die lier en sing.

₆Blaas die trompet en die ramshoring,

jubel tot eer van die Here, die Koning.

₇Die see en alles daarin moet druis,

die aarde en alles daarop moet juig,

₈die riviere moet hande klap,

die berge moet saam juig

₉voor die Here,

want Hy kom om oor die aarde te heers;

Hy sal oor die wêreld heers met regverdigheid,

oor die volke met billikheid.