Na die Woord – Dag 168

₂“Hoor wat ek te sê het, julle wat die wysheid het,

luister na my, julle wat die kennis het.

₃Die oor toets woorde

soos die verhemelte kos proe.

₄Laat ons uitmaak wat reg is,

self vasstel wat goed is.

₅Job het gesê: ‘Ek is onskuldig,

maar God laat nie aan my reg geskied nie.

₆Al het ek die reg aan my kant,

word ek vir 'n leuenaar gehou.

Al is ek nie skuldig nie,

is ek dodelik getref.’

₇Is daar nog 'n mens soos Job

vir wie laster is soos water drink?

₈Hy maak vriende met dié wat onreg doen,

hy gaan om met die goddeloses.

₉Hy het beweer: ‘Dit baat 'n mens nie

om die wil van God te doen nie.’

₁₀Maar luister na my, julle wat alles verstaan!

God doen nie verkeerd nie,

die Almagtige begaan nie 'n onreg nie.

₁₁Hy straf die mens net vir wat hy doen,

Hy laat hom maar net kry wat hy verdien.

₁₂Dit is vir God werklik onmoontlik om verkeerd te doen,

vir die Almagtige om die reg te verdraai.

₁₃Het iemand die aarde aan God toevertrou?

Het iemand Hom oor die hele wêreld aangestel?

₁₄As Hy sou besluit

om sy gees, sy asem, na Hom toe terug te neem,

₁₅dan sou al wat leef, sterf,

en die mens weer stof word.

₁₆As jy verstand het, luister hierna,

hoor wat ek te sê het.

₁₇Iemand wat die reg haat, durf tog nie regeer nie.

Kan jy vir God wat regverdig en magtig is, skuldig vind?

₁₈Hy sê selfs vir 'n koning:

‘Jy is niks werd nie’

en vir vername mense: ‘Julle is sleg.’

₁₉Hy is nie partydig vir leiers nie,

Hy bevoordeel die ryke nie bo die arme nie, want Hy het hulle almal gemaak.

₂₀In 'n oogwink sterf hulle,

in die middel van die nag oorval die doodsvrees hulle,

hulle sterf,

selfs die sterkes verdwyn sonder toedoen van mense.

₂₁Hy hou die pad van die mens dop

en sien elke tree wat hy gee.

₂₂Daar is nie 'n donkerte of duisternis

waar dié wat onreg doen, kan wegkruip nie.

₂₃God hoef nie verder navraag te doen

wanneer 'n mens voor Hom verskyn vir die oordeel nie.

₂₄Hy hoef nie vooraf ondersoek in te stel

voor Hy sterkes vernietig

en ander in hulle plek aanstel nie.

₂₅Hy sien alles raak wat hulle doen

en oornag maak Hy dit tot niet.

₂₆Waar almal dit kan sien,

straf Hy hulle vir hulle goddeloosheid,

₂₇want hulle het Hom nie bly dien nie

en hulle nie aan sy wil gesteur nie:

₂₈die armes moes na Hom om hulp roep,

Hy moes luister na die hulpgeroep van mense in nood.

₂₉“As Hy stilbly, wie kan Hom veroordeel?

As Hy Hom verberg, wie kan Hom sien?

Hy alleen heers oor volke en mense.

₃₀Hy wil nie dat 'n godlose oor mense regeer

en hulle ondergang bewerk nie.

₃₁“As jy vir God sou sê:

‘Ek het my teen U verhef, maar ek sal nie weer oortree nie;

₃₂leer U my wat ek self nie weet nie;

as ek verkeerd gedoen het,

sal ek dit nie weer doen nie,’

₃₃sal God jou dan nog straf

omdat jy Hom geminag het?

“Jý moet kies, nie ék nie,

jy weet hoe sake staan. Praat!

₃₄Mense met insig, enige verstandige mens

wat my hoor, sal sê:

₃₅‘Job praat sonder kennis,

sy woorde is sonder insig.’

₃₆Maar Job moet end-uit getoets word,

want sy argumente is dié

van die goddelose mense.

₃₇Hy hoop sonde op sonde,

hier tussen ons verlustig hy hom daarin,

hou hy aan met praat teen God.”

₂“Dink jy dit handel die saak af

as jy sê: ‘Ek sal my reg van God ontvang’

₃en dan aanhou om te sê: ‘Wat baat dit my,

wat kan ek wen as ek nie sondig nie?’

₄Daarop sal ek jou

en ook jou vriende by jou antwoord.

₅Kyk op, kyk na die hemel,

kyk na die wolke hoog bokant jou:

₆as jy sondig, wat doen dit aan God,

as jy baie keer oortree, hoe raak dit Hom,

₇as jy sonder sonde is, wat baat dit Hom,

wat kry Hy van jou?

₈Jou sonde raak jou medemens

en jou onskuld raak jou medemens.

₉“Mense roep om hulp onder hulle swaar verdrukking,

hulle soek hulp teen die geweld van mense met mag.

₁₀Maar hulle vra nie na God, hulle Maker,

na Hom wat selfs in die nag

'n lied kan laat sing nie,

₁₁na Hom wat aan ons meer verstand gegee het as aan die diere,

meer insig as aan die voëls.

₁₂Mense roep om hulp,

maar Hy antwoord nie,

want hulle is vol hoogmoed en boosheid.

₁₃God luister nie na hol woorde nie,

die Almagtige slaan daar geen ag op nie,

₁₄ook nie as jy sê dat jy Hom nie sien nie,

dat jou saak voor Hom is, dat jy op Hom wag nie,

₁₅as jy sê Hy straf nie in sy toorn nie,

Hy dra geen kennis van die sonde nie.

₁₆Job, wat jy praat, is wind,

jy praat en praat, maar sonder kennis.”

₂“Wag nog 'n bietjie, laat ek verder met jou praat,

daar is nog argumente vir God se saak.

₃My kennis kom van ver af,

ek wil aantoon dat my Maker regverdig is.

₄Wat ek sê, is nie versinsels nie,

ek weet wat ek praat.

₅God is magtig maar Hy sien op niemand neer nie;

Hy is magtig en sy wysheid is groot.

₆Hy laat die goddeloses nie in die lewe bly nie,

Hy laat reg geskied aan die verdruktes,

₇Hy sorg vir die regverdiges.

Hy laat konings regeer, selfs baie lank.

Maar as hulle hulle verhef,

₈word hulle gevangenes, vasgevang in boeie,

geknel deur swaarkry.

₉So laat God hulle besef wat hulle gedoen het,

hoe hulle gesondig het toe hulle hoogmoedig geword het.

₁₀Hy laat hulle ag gee op sy bestraffing,

Hy vermaan hulle om hulle van die sonde te bekeer.

₁₁As hulle luister en Hom dien,

sal hulle hulle dae in voorspoed deurbring,

hulle jare in welvaart.

₁₂As hulle nie luister nie,

sal hulle sterf,

sal hulle doodgaan omdat hulle nie tot insig wou kom nie.

₁₃Die godloses hoop die toorn van God

nog meer teen hulle op,

hulle roep selfs nie om hulp as God hulle in boeie laat vasvang nie.

₁₄Hulle gaan jonk dood,

hulle skandelike lewe is gou verby.

₁₅Maar God bevry die mense in nood uit hulle ellende,

Hy laat hulle op Hom ag gee in hulle verdrukking.

₁₆God het jou na Hom toe getrek, weg van gevaar af,

Hy het jou veilig laat lewe,

dit was rustig aan jou tafels vol oorvloed.

₁₇Maar nou het die oordeel wat die goddelose toekom,

jou voluit getref,

oordeel en straf het jou ingehaal.

₁₈Moenie dat jou grief jou tot uittarting verlei nie,

moenie jou saak wil regstel met 'n groot omkoopgeskenk nie.

₁₉Kan hulpgeroep jou help?

Nie in jou ellende nie!

Ook nie al roep jy met al die krag waaroor jy beskik nie.

₂₀Moenie smag na die donker van die nag,

die tyd wanneer mense sterf nie.

₂₁Moet ook nie jou toevlug neem tot sonde nie,

jy verkies dit immers bo swaarkry.

₂₂Die mag van God is groot,

wie kan 'n mens tot insig bring soos Hy?

₂₃Wie kan van Hom rekenskap eis oor sy dade?

Wie kan sê: ‘U het verkeerd gedoen’?

₂₄Dink liewer daaraan om sy werk te roem,

sy werk wat deur mense besing moet word.

₂₅Alle mense kan dit sien,

al neem hulle dit net van ver af waar.

₂₆God is groot, ons kan sy grootheid nie begryp nie,

sy jare kan nie bereken word nie.

₂₇Hy trek vog op uit die see,

Hy haal reën uit die groot waters uit,

₂₈dan giet die wolke water uit,

laat hulle dit op al die baie mense val.

₂₉Kan iemand verstaan hoe die wolke beweeg

en hoe die weer dreun daar in die woonplek van God?

₃₀Hy versprei die weerlig deur die lug,

en bedek die bodem van die see.

₃₁So regeer Hy oor die volke

en gee Hy kos in oorvloed.

₃₂Hy vat die weerlig in sy hand

en stuur dit op die doelwit af.

₃₃Die onweer kondig aan dat die storm kom,

die vee snuif die lug op voor die storm losbreek.

₁Dan begin ek bewe

en gaan my hart aan die ruk.

₂Hoor hoe bulder die stem van God,

hoe dreun dit uit sy mond!

₃Hy laat dit losbreek in die hemelruim,

Hy laat dit blits tot by die uithoeke van die wêreld,

₄en dan kom die donderslag.

God laat sy magtige stem hoor,

Hy stuur die onweer in volle krag

wanneer Hy sy stem laat hoor.

₅Met sy stem laat God magtige dinge gebeur.

Hy doen groot dade en ons begryp dit nie.

₆Hy beveel die sneeu om op die aarde te val;

die reëns val, stortreëns wat getuig van sy krag.

₇Hy laat alle mensewerk tot stilstand kom

sodat alle mense sy werk kan leer ken.

₈Die diere soek skuiling

en bly in hulle skuilplekke.

₉Die stormwind kom uit sy blyplek,

die yswinde wat koue bring.

₁₀As God die wind laat waai, ys dit

en vries die groot waters.

₁₁Hy laat die wolke swaar word van vog,

Hy stuur sy weerligte in die wolke in.

₁₂Hy laat die wolke in die rondte maal,

hulle doen wat Hy bepaal,

hulle gehoorsaam sy bevele die wêreld oor.

₁₃God stuur die storm

óf om te straf

óf om vir die aarde te sorg

óf om sy liefde te toon.

₁₄“Luister hierna, Job,

staan stil en dink na oor die wonderdade van God.

₁₅Weet jy hoe Hy dit alles voorberei,

hoe Hy die lig deur die wolke laat breek?

₁₆Weet jy hoe die wolke sweef?

Dit is die wonderlike werk van Hom

wie se kennis volmaak is.

₁₇Jy wat jou nie eens met klere kan beskerm teen die hitte

wanneer die aarde gloei onder die woestynwind nie,

₁₈kan jy saam met Hom die hemelruim oopspan,

stewig soos 'n spieël wat gegiet is?

₁₉Sê jý dan vir ons wat ons vir God moet sê.

In ons onkunde kan óns Hom nie antwoord nie.

₂₀Moet aan Hom vertel word wat ek sê?

Moet aan Hom meegedeel word wanneer 'n mens praat?

₂₁“Niemand kon die lig sien nie,

die wolke het dit donker gemaak.

Maar die wind het gekom en hulle weggewaai.

₂₂Uit die noorde kom die goudglans,

die majesteit van God is ontsagwekkend.

₂₃Ons kan by die Almagtige nie kom nie, sy krag is groot.

Hy laat reg en geregtigheid geskied,

Hy verdruk niemand nie.

₂₄Daarom dien die mense Hom,

en sien Hy nie dié raak wat dink dat hulle wysheid het nie.”

₁Die wil van die koning staan onder die gesag van die Here;

soos 'n stroom water lei Hy dit soos Hy verkies.

₂In sy eie oë is alles wat 'n mens doen, reg,

maar die Here toets die gesindheid.

₃Die Here verkies dat 'n mens doen wat regverdig en reg is

eerder as dat jy offers bring.

₄Die sonde van goddeloses begin altyd met selfverheffing en eiewaan.

₅Wat hardwerkende mense beplan, is nuttig,

maar elkeen wat oorhaastig is, stuur af op gebrek.

₆Skatte wat met bedrog versamel is,

verdwyn in die wind en bring die dood.

₇Die geweld van goddelose mense vernietig hulleself,

want hulle weier om reg te doen.

₈'n Slegte mens loop krom paaie;

'n eerbare mens tree eerlik op.

₉Liewer bo-op 'n dak woon

as saam met 'n twisgierige vrou onder een dak.

₁₀'n Slegte mens smag na meer kwaad;

hy het nie medelye met sy naaste nie.

₁₁As jy 'n ligsinnige mens laat boet vir sy dade,

leer onervare mense wysheid daaruit;

as jy iemand onderrig wat wysheid het,

leer hy self daaruit.

₁₂Die regverdige God sien wat in die goddelose se huis aangaan

en Hy bring die goddelose tot 'n val.

₁₃As jy jou ore sluit vir die hulpgeroep van 'n arm mens,

sal jý ook nie antwoord kry as jý roep nie.

₁₄'n Geskenk in die stilte paai 'n man wat kwaad is;

as dit versigtig aangebied word, laat dit heftige woede bedaar.

₁₅As daar reg geskied, is mense wat reg doen, bly,

en staan dié wat onreg doen, verskrik.

₁₆As iemand ophou om verstandig te lewe,

beland hy tussen die dooies.

₁₇Wie plesier voorop stel, word arm;

wie lief is vir wyn en lekker kos, word nie ryk nie.

₁₈Jy ruil maklik 'n slegte mens uit vir een wat reg doen

en 'n onbetroubare vir 'n eerlike.

₁₉Liewer in 'n woestyn woon

as by 'n twisgierige vrou wat aanhou neul.

₂₀In die woning van 'n wyse mens is daar altyd kosbare besittings en olie;

'n dwase mens bring sy goed deur.

₂₁Wie na reg en liefde strewe,

aan hom word 'n vol lewe en eer geskenk.

₂₂'n Wyse man kan selfs 'n stad vol dapper verdedigers oorwin

en die vesting waarop hulle vertrou, laat val.

₂₃Wie sy mond en sy tong in toom hou,

hou hom uit gevaar.

₂₄'n Ligsinnige mens is hovaardig en aanmatigend,

sy hovaardige optrede het geen perke nie.

₂₅'n Lui mens soek sy dood,

want hy wil nie sy hande uit sy moue steek nie;

₂₆hy sit die hele dag net en wens.

Die regverdige kan gee sonder om suinig te wees.

₂₇Die Here het 'n afsku in die offers van goddeloses,

te meer as hulle dit bring met slegte bedoelings.

₂₈'n Vals getuie gaan sy dood tegemoet.

'n Betroubare getuie se getuienis het betekenis.

₂₉'n Slegte mens gee voor dat hy weet wat hy doen;

'n eerlike mens bly by die koers wat hy gekies het.

₃₀Teenoor die Here geld geen menslike wysheid, insig of besluit nie.

₃₁Perde kan afgerig word vir oorlog,

maar dit is die Here wat die oorwinning gee.