Na die Woord – Dag 169

₂“Wie is dit wat besig is om my bedoelinge te dwarsboom

met woorde wat getuig dat hy geen insig het nie?

₃Maak jou reg vir die stryd:

Ek sal vra, antwoord jy My.

₄Waar was jy toe Ek die aarde se fondamente gelê het?

Praat as jy die antwoord het.

₅Wie het die aarde afgemeet? Weet jy dit?

Wie het 'n maatlyn oor hom gespan?

₆Waarop is sy voetstukke neergesit?

Wie het hom aanmekaargesit

₇daardie oggend toe die sterre saamgesing het

en al die hemelinge gejubel het?

₈Wie het die see opgedam

toe hy begin uitborrel het?

₉Ek het hom met wolke bedek,

hom met donkerte toegemaak.

₁₀Ek het vir hom perke gestel,

hom agter slot en grendel gesit.

₁₁Ek het gesê: ‘Tot hiertoe mag jy kom, nie verder nie;

hier is die grens van jou magtige golwe.’

₁₂“Het jy, Job, in jou tyd die môre beveel om te kom?

Weet jy waar die daeraad vandaan kom,

₁₃die daeraad wat lig oor die hele aarde bring

sodat die goddeloses nie in die donker kan bly skuil nie?

₁₄Met die daeraad word die vorm van die aarde sigbaar,

dit neem vorm aan soos klere wat aangetrek word.

₁₅Dan word die goddeloses hulle bestaan ontneem

en word hulle geweld beëindig.

₁₆Het jy, Job, al gekom by die plek waar die seewater uitborrel,

en rondgestap op die bodem van die diepsee?

₁₇Het jy die ingang van die doderyk gesien,

die plek van donkerte al bekyk?

₁₈Kan jy 'n beeld vorm van die groot wye wêreld?

Praat as jy iets daarvan weet.

₁₉Hoe loop die pad na die plek waar die lig woon?

En die donkerte, waar is sy woonplek?

₂₀Kan jy die donkerte na sy gebied toe terugvat?

Ken jy die paaie na sy woongebied toe?

₂₁Jy moet dit weet, jy wat maak of jy toe al gebore was,

of jy 'n lang lewe agter die rug het.

₂₂Was jy al by die plek waar die sneeu gebêre word?

Het jy al die plek gesien waar die hael gebêre word,

₂₃wat Ek opgegaar het vir 'n tyd van rampe,

vir die dag as Ek wil oorlog voer?

₂₄Hoe loop die pad na die plek toe waar die lig sy oorsprong het

en die oostewind oor die aarde begin waai?

₂₅Wie het vir die stortreën 'n pad oopgekap

en vir die donderwolke hulle koers bepaal

₂₆sodat dit reën in 'n land waar nie mense is nie,

in 'n woestyn waar niemand woon nie

₂₇en 'n droë, dor land deurnat word,

sodat daar groen gras uitspruit?

₂₈Het die reën 'n vader?

Wie het die doudruppels in die wêreld gebring?

₂₉Wie bring die ys te voorskyn?

Wie bring die ryp in die wêreld?

₃₀Die water word so hard soos klip,

selfs die oppervlakte van die diepsee verys.

₃₁Sou jy die Sewester met 'n band kon vasknoop

of die band van Orion kon losmaak?

₃₂Kan jy die sterre op hulle tyd laat opkom,

kan jy die Beer met sy kleintjies laat uitkom?

₃₃Weet jy hoe die hemelliggame werk?

Stel jy hulle invloed op die aarde vas?

₃₄Kan jy jou stem tot by die wolke hoorbaar maak

sodat stortreën jou oordek?

₃₅Kan jy weerligstrale uitstuur

dat hulle vir jou kom sê: ‘Hier is ons’?

₃₆Wie gee verstand aan die ibis om teen die vloed te waarsku

of wie gee insig aan die haan om die dag aan te kondig?

₃₇Wie het die kennis om genoeg wolke bymekaar te bring,

om hierdie waterkruike van die hemel om te keer

₃₈wanneer die grond kliphard is

en daar net groot kluite lê?

₁Kan jy vir 'n leeu sy prooi vang?

Kan jy vir hom genoeg gee om te eet

₂wanneer hy in sy skuilplek gereed lê,

op die loer lê agter 'n bos?

₃Wie gee vir 'n kraai die kos wat hy nodig het

wanneer sy kleintjies om hulp roep na God,

rondskarrel vir iets om te eet?

₄Ken jy die tyd wanneer die klipspringers lam?

Staan jy en kyk waar die wildsbokke kleintjies kry?

₅Kan jy vir hulle die draagtyd bepaal,

weet jy presies wanneer hulle moet lam?

₆Hulle trek inmekaar, die bokkies word gebore,

die geboortepyne is gou verby.

₇Die lammers groei en word groot in die veld,

hulle gaan weg en kom nie na die ooie toe terug nie.

₈“Wie gee aan die wildedonkie sy vryheid

en laat hom ongebonde vryloop?

₉Ek het vir hom die oop veld gegee om in te bly,

die brakbossies om in te wei.

₁₀Hy bekommer hom nie oor die gewoel in die stad nie,

hy hoef nie te luister na die geskreeu van 'n drywer nie.

₁₁Hy deurkruis die berge vir weiding,

hy snuffel elke groen sprietjie uit.

₁₂“Sal die buffel gewillig wees om vir jou te werk?

Sal hy deur die nag by jou krip bly staan?

₁₃Kan jy hom inspan en ploegvore met hom trek?

Kan jy hom lei om die land agter jou te eg?

₁₄Sal jy jou op hom verlaat vir sy reusekrag?

Sal jy dit aan hom oorlaat om vir jou 'n oes te lewer?

₁₅Sal jy op hom vertrou om jou graan te oes

en op jou dorsvloer bymekaar te bring?

₁₆“Die vlerke van die volstruis klap vrolik

net soos dié van die ooievaar en die valk,

₁₇maar sy lê haar eiers op die grond

en broei hulle uit op die sand.

₁₈Sy dink nie daaraan dat hulle stukkend getrap kan word nie,

dat wilde diere haar eiers kan breek nie.

₁₉Sy maak haar kuikens hard groot, asof hulle nie haar eie is nie;

as haar moeite dan tevergeefs was, skrik dit haar nie af nie.

₂₀God het nie vir haar wysheid gegee nie,

sy het geen verstand nie,

₂₁maar wanneer sy met vlerke omhoog hardloop,

lag sy die perd en sy ruiter uit.

₂₂“Gee jý vir die perd sy krag,

sit jý vir hom maanhare aan?

₂₃Het jý gemaak dat hy kan spring soos 'n sprinkaan,

dat hy almal bang maak met sy trotse gesnork?

₂₄Hy kap die grond met sy pote en trippel rond,

met krag skiet hy vorentoe, die geveg in.

₂₅Bang wees bestaan vir hom nie, hy skrik nie,

hy deins nie terug vir oorlog nie.

₂₆In die koker aan sy sy ratel die pyle,

die spies en die swaard blink in die son.

₂₇Opgewonde en oorgehaal kap-kap hy die grond,

hy kan nie wag vir die blaas van die trompet nie.

₂₈By die blaas van die trompet runnik hy,

hy weet die geveg kom,

hy ken die offisiere se bevele en hulle krygskrete.

₂₉“Is dit deur jou insig dat 'n valk vlieg,

dat hy sy vlerke na die suide toe span?

₃₀Is dit op jou bevel dat 'n aasvoël hoog opvlieg

en sy nes in die hoogte gaan bou?

₃₁Hy woon op die rotse, hy bly daar,

op die spits en die kranse.

₃₂Van daar af soek sy oë na kos,

van ver af sien hy dit.

₃₃Sy kuikens vreet bloederige vleis,

en waar iets doodgaan, is hy.”

₃₅“Wil jy 'n saak maak teen die Almagtige en Hom bestraf?

Wil jy vir God teregwys? Antwoord Hom dan!”

₃₇“Ek is nie opgewasse teen U nie.

Hoe sou ek U kon antwoord?

Ek sal liewer stilbly.

₃₈Ek het gepraat, maar ek kon nie 'n antwoord vind nie,

ek het weer geprobeer, maar nou sal ek stilbly.”

₂“Maak jou reg vir die stryd:

Ek sal vra, antwoord jy My.

₃Wil jy my beslissing tot niet maak?

Wil jy My skuldig verklaar sodat jy vrygespreek kan word?

₄Het jy die mag wat Ek het?

Kan jy jou stem uit die onweer laat hoor soos Ek?

₅Tree dan op met jou trots en jou groot mag,

handel in jou majesteit en heerlikheid.

₆Laat brand dan jou gloeiende toorn,

sien elke trotsaard raak en sit hom op sy plek,

₇sien elke trotsaard raak en verneder hom,

trap die goddeloses plat.

₈Begrawe hulle almal,

lê hulle weg in die graf.

₉Dan sal Ek teenoor jou erken

dat jy jou deur jou eie mag kan red.

₁₀“Kyk die seekoei:

Ek het hom gemaak toe Ek jou gemaak het,

hy vreet gras soos 'n bees.

₁₁Daar is krag in sy liggaam,

die spiere in sy lyf is sterk.

₁₂Sy stert is so reguit soos 'n seder.

Sy boudspiere is inmekaar gevleg.

₁₃Die bene in sy lyf is soos bronspype,

soos stukke yster.

₁₄Onder alles wat Ek gemaak het, staan hy eerste,

net sy Maker kan hom verslaan.

₁₅Die berge lewer vir hom die water

en al die wilde diere speel daar.

₁₆Hy lê tussen waterplante,

hy skuil tussen die riete in die moeras.

₁₇Die skaduwee van die waterplante is sy skuiling,

rondom hom is rivierpopuliere.

₁₈As die rivier sterk word, skrik dit hom nie af nie,

hy bly rustig al styg die Jordaan hoe hoog.

₁₉Wie kan hom van voor af pak,

wie kan 'n vangtou aan sy neus sit?

₂₀“Kan jy 'n krokodil met 'n hoek vang

of hom 'n tou in die bek sit?

₂₁Kan jy 'n lyn deur sy neus steek

of sy kakebene met 'n hoek vastrek?

₂₂Sal hy jou soebat om genade

of by jou mooipraat?

₂₃Sal hy 'n ooreenkoms met jou aangaan

om vir altyd jou slaaf te wees?

₂₄Sal jy hom kan mak maak soos 'n voëltjie

of kan jy hom met 'n lyn vasmaak vir jou dogtertjies?

₂₅Sal handelaars oor 'n prys vir hom kan kibbel?

Sal hy onder kopers verdeel kan word?

₂₆Sal jy harpoene deur sy vel kan gooi

of hom met 'n haak aan die kop kan vang?

₂₇Pak hom gerus met kaal hande:

jy sal die geveg onthou,

jy sal nie weer probeer nie.

₂₈Jy sal die slegste daarvan afkom.

Wanneer jy hom sien,

is jy al klaar oorweldig.

₁Hy is wreed as jy hom wakker maak.

“Wie wil dan nog teen Mý standhou?

₂Wie wil aan Mý eise stel dat Ek iets aan hom verskuldig is?

Alles onder die hemel behoort aan My.

₃“Ek wil nog verder praat oor die krokodil,

oor sy krag en sy liggaamsbou.

₄Wie kan sy bek oopmaak?

Wie kan met 'n toom naby sy tande kom?

₅Wie kan sy kakebene oopbreek,

sy kakebene met die verskriklike tande?

₆Op sy rug lê die skubbe in rye

vas aan mekaar gesluit:

₇die een so teen die ander

dat die wind nie daardeur kan waai nie;

₈die een is vas aan die ander,

hulle kleef aan mekaar en kan nie geskei word nie.

₉As hy nies, spat die vonke,

sy oë is so rooi soos die daeraad.

₁₀Daar kom vuur uit sy bek,

die vonke waai deur die lug.

₁₁Daar trek rook uit sy neusgate,

soos uit 'n kokende pot op 'n vuur.

₁₂Sy asem steek vure aan,

daar skiet vlamme uit sy bek.

₁₃Daar is groot krag in sy nek;

wie hom sien, word deur angs oorval.

₁₄Sy vleis is saamgepak asof dit aan hom gegiet is,

dit gee nie mee nie.

₁₅Sy hart is so hard soos klip,

so hard soos 'n maalklip.

₁₆Sterkes vlug as hy die water roer.

By die eerste rimpeling gee hulle pad.

₁₇Wie hom met die swaard steek, rig niks uit nie,

ook nie met 'n spies, 'n pyl of 'n assegaai nie.

₁₈Yster is vir hom soos strooi,

brons soos vrot hout.

₁₉Met pyl en boog jaag jy hom nie op die vlug nie,

klippe uit 'n slingervel is vir hom niks nie.

₂₀Aan 'n knopkierie steur hy hom nie,

hy lag as 'n swaard op hom afkom.

₂₁Die skubbe aan sy onderkant het punte soos potskerwe,

soos 'n dorsslee maak dit merke op die modder.

₂₂Hy laat die diep water kook soos in 'n pot,

hy laat die water van die meer skuim.

₂₃Agter hom lê 'n blink streep op die water,

lê die diep water wit van die skuim.

₂₄Op die grond is niemand sy gelyke nie,

hy is 'n ondier sonder vrees.

₂₅Hy kyk met minagting na diere groter as hy,

hy is baas selfs oor al die groot diere.”

₂“Nou weet ek dat U tot alles in staat is

en dat U kan uitvoer wat U besluit.

₃Wie is dit wat u bedoelinge wou dwarsboom

sonder dat hy die insig gehad het?

Ek het oor dinge gepraat wat ek nie begryp het nie:

u wonderdade was te groot vir my,

ek het dit nie verstaan nie.

₄U het mos gesê: Luister terwyl Ek praat,

Ek sal vra, antwoord jy My.

₅Tot nou toe het ek net gehoor

wat mense van U sê,

maar nou het ek U self gesien,

₆en nou verag ek myself,

nou sit ek vol berou, in sak en as.”