Na die Woord – Dag 139

₁Die hele Israel het gesamentlik na Dawid toe gekom in Hebron en gesê: “Ons is tog almal u eie mense! ₂Selfs in die tyd toe Saul koning was, was u tog maar die een wat vir Israel in die oorlog aangevoer het. Die Here u God het vir u gesê:

₃So het al die leiers van Israel by die koning in Hebron gekom. Toe het Dawid in Hebron in teenwoordigheid van die Here 'n verdrag met hulle gesluit. Daarna het hulle vir Dawid daar tot koning oor Israel gesalf. Dit was in ooreenstemming met die belofte van die Here deur Samuel.

₄Dawid en die hele Israel het toe opgetrek teen Jerusalem, dit is Jebus. Die Jebusiete, oorspronklike inwoners van die land, het toe daar gewoon. ₅Die inwoners van Jebus het vir Dawid gesê: “Hier sal jy nie inkom nie.”

Tog het Dawid die Sionsvesting ingeneem: dié is nou die Dawidstad. ₆Dawid het destyds gesê: “Enigeen wat die eerste 'n Jebusiet neervel, word leier en aanvoerder!”

Joab seun van Seruja het toe eerste die stad ingegaan en hy het leier geword.

₇Omdat Dawid toe in die vesting gaan woon het, noem hulle dit die Dawidstad. ₈Hy het die stad rondom uitgebou, van die terras af verder, en Joab het die res van die stad herstel. ₉Dawid het al hoe sterker geword, en die Here die Almagtige was by hom.

₁₀Nou volg iets oor die leiers van Dawid se dapper manne. Hulle was sterk ondersteuners van sy koningskap en saam met die hele Israel het hulle hom op die troon geplaas, soos die Here aan Israel beloof het.

₁₁Hier is 'n lys van die dapper manne: Jasobam seun van Gakmoni was hoof van die dertigtal. Hy het met sy spies drie honderd man in een veldslag laat sneuwel.

₁₂Eleasar seun van Dodo uit Agoag was onder hom. Hy was een van die drie helde. ₁₃Hy was by Dawid in Efes-Dammim toe die Filistyne daar vir die geveg bymekaargekom het. Daar was 'n stuk land vol gars, en toe die manskappe op die vlug slaan vir die Filistyne, ₁₄het die drie dapper manne binne in die land stelling ingeneem en dit behou. Hulle het die Filistyne verslaan, en so het die Here vir hulle 'n groot oorwinning gegee.

₁₅Op 'n keer het drie ander van die dertig leiers na Dawid toe gekom by die rots by die Adullamgrot. Die Filistynse kamp was in die Spooklaagte opgeslaan. ₁₆Dawid was toe in 'n bergskuiling en die Filistyne het Betlehem beset. ₁₇Dawid het baie dors geword en gesug: “Ag, as iemand my tog net water uit die put in Betlehem se poort kon laat drink!”

₁₈Die drie het toe deur die Filistynse kamp geglip en water gaan skep uit die put in Betlehem se poort. Hulle het dit vir Dawid gebring, maar hy wou dit nie drink nie. Hy het dit as 'n offer vir die Here uitgegiet ₁₉en gesê: “Mag God my daarvan bewaar dat ek dit sou drink. Sou ek die bloed van hierdie manne ten koste van hulle lewens wou drink? Hulle het dit met lewensgevaar gebring, en ek durf dit nie drink nie.”

Dit is wat die drie helde gedoen het.

₂₀Joab se broer Abisai was die leier van hierdie drie. Hy het met sy spies drie honderd man laat sneuwel. So het hy vir hom onder die drie naam gemaak. ₂₁Hy het 'n ereplek gehad in die tweede drietal en was hulle aanvoerder, maar een van die driemanskap het hy nie geword nie.

₂₂Benaja seun van Jojada was die seun van 'n krygsman. Hy was 'n man van baie dade, afkomstig uit Kabseël. Dit is hy wat die twee sterk manne van Moab doodgemaak het, en hy wat op 'n sneeudag in 'n put afgeklim en die leeu wat daarin was, doodgemaak het. ₂₃Hy het ook 'n Egiptenaar wat twee en 'n kwart meter lank was, doodgemaak. Die Egiptenaar het nogal 'n spies in sy hand gehad, so dik soos die dwarsbalk van 'n weefstoel, terwyl Benaja hom net met 'n stok gepak het. Hy het die spies uit die Egiptenaar se hand geruk en hom met sy eie spies van kant gemaak. ₂₄Dit het Benaja seun van Jojada gedoen. So het hy vir hom onder die drie helde naam gemaak. ₂₅Hy het 'n hoër rang gehad as die res van die dertig, maar een van die driemanskap het hy nie geword nie. Dawid het hom oor sy lyfwag aangestel.

₂₆Die dapper manne was: Asael broer van Joab; Elganan seun van Dodo uit Betlehem; ₂₇Samma uit Garod; Geles uit Pelet; ₂₈Ira seun van Ikkes uit Tekoa; Abiëser uit Anatot; ₂₉Sibbekai uit Gusa; Ilai uit Agoag; ₃₀Marai uit Netofa; Geled seun van Baäna uit Netofa; ₃₁Ittai seun van Ribai uit Gibea in Benjamin; Benaja uit Piraton; ₃₂Hiddai uit Nagale-Gaäs; Abi-Albon uit Bet-Araba; ₃₃Asmawet uit Bagurim; Eljagba uit Saälbon, ₃₄die seuns van Jasen uit Gison; Jonatan seun van Sage uit Harar; ₃₅Agiam seun van Sarar uit Harar; Elifal seun van Ur; ₃₆Gefer uit Mekera; Agija uit Pelon; ₃₇Gesro uit Karmel; Naärai seun van Esbai; ₃₈Joël broer van Natan; Mibgar seun van Hagri; ₃₉Selek die Ammoniet; Nagrai uit Beërot, wapendraer van Joab seun van Seruja; ₄₀Ira uit Jeter; Gareb uit Jeter; ₄₁Urija die Hetiet; Sabad seun van Aglai; ₄₂Adina seun van Sisa uit Ruben, 'n Rubenitiese hoofman, in bevel van dertig; ₄₃Ganan seun van Maäka; Josafat die Mitneër; ₄₄Ussia uit Astarot; Sama en Jeïel, seuns van Gotam uit Aroër; ₄₅Jediael seun van Simri; sy broer Joga uit Tis; ₄₆Eliël uit Magawi; Jeribai en Josauja, seuns van Elnaäm; Jitma die Moabiet; ₄₇Eliël, Obed en Jaäsiël uit Soba.

₁Die volgende manne het al in Siklag by Dawid aangesluit toe hy nog verban was deur Saul seun van Kis. Hulle het tot Dawid se groep dapper manne behoort en was sy strydmakkers in die oorlog. ₂Hulle was bewapen met pyl en boog en kon ewe goed met die regter- as met die linkerhand slingervel gooi en boog skiet. Hulle was van Saul se stamgenote uit Benjamin. ₃Die leier was Agiëser; verder was daar Joas seun van Semaä uit Gibea; Jesiël en Pelet, seuns van Asmawet; Beraka, Jehu uit Anatot, ₄Jismaja uit Gibeon, 'n held onder die dertig helde en selfs beter as hulle; Jeremia, Jagasiël, Joganan, Josabad uit Gedera, ₅Elusai, Jerimot, Bealja, Semarja, Sefatja uit Garif; ₆Elkana, Jissija, Asarel, Joëser en Jasobam uit Korag; ₇Joëla en Sebadja, seuns van Jerogam, uit Gedor.

₈Daar het ook van die Gadiete oorgeloop na Dawid toe, na sy bergskuiling toe in die woestyn. Hulle was helde, krygsmanne, reg vir oorlog, bewapen met 'n groot skild en 'n spies, vreesaanjaend soos leeus en so vinnig soos wildsbokke op die berge. ₉Eser was die hoof, Obadja tweede in rang, Eliab derde, ₁₀Mismanna vierde, Jeremia vyfde, ₁₁Attai sesde, Eliël sewende, ₁₂Joganan agste, Elsabad negende, ₁₃Jeremia tiende, Makbannai elfde. ₁₄Hulle was van die mense uit Gad, hoofmanne van die leër; die kleinste van hulle kon man-alleen staan teen honderd, die grootste teen duisend. ₁₅Dit was hulle wat in die reëntyd die Jordaan oorgesteek het toe hy vol was tot oor altwee sy walle en al die laagtes oos en wes volgestoot het.

₁₆Toe daar van die Benjaminiete en Judeërs na Dawid toe gekom het in die bergskuiling, ₁₇het hy na hulle toe uitgekom en geroep: “As julle in vrede na my toe gekom het om my te help, is ons bondgenote en is ek bereid om julle leier te wees, maar as julle gekom het om my aan my vyande te verraai, terwyl ek geen misdaad begaan het nie, mag die God van ons voorvaders dit dan raaksien en julle straf.”

₁₈Daarna het die Gees vir Amasai, die leier van die dertig, in besit geneem, en hy het gesê:

₁₉Uit Manasse het mense na Dawid toe oorgeloop toe hy saam met die Filistyne op die veldtog teen Saul uitgetrek het. Hy het egter nie die Filistyne gehelp nie, want hulle regeerders het hom doelbewus weggestuur. Hulle het gesê: “Hy sal na sy koning Saul toe oorloop met ons koppe.”

₂₀Dawid is toe na Siklag toe en daar het die volgende mense uit Manasse na hom toe oorgeloop: Adnag, Josabad, Jediael, Migael, Josabad, Elihu en Silletai, leiers van afdelings in Manasse. ₂₁Hulle het Dawid gehelp en het aanvoerders van sy bende geword, want hulle was almal strydbare manne. ₂₂Daar het van dag tot dag mense by Dawid aangekom om hom te help, totdat dit 'n groot leër geword het, 'n magtige leër.

₂₃Hier volg die getalle van die hoofmanne van die gewapende mag wat in Hebron na Dawid toe gekom het om die koningskap van Saul op hom oor te dra volgens die wil van die Here:

₂₄Judeërs, gewapen met grootskild en spies: 6 800, ten volle gewapen; ₂₅van die Simeoniete, strydbare manne gereed vir aktiewe diens: 7 100; ₂₆van die Leviete: 4 600; ₂₇ook nog Jojada, die Aäronitiese vors met 3 700 man by hom, ₂₈en die jong Sadok, 'n strydbare man, met sy familie onder 22 aanvoerders; ₂₉van die Benjaminiete, Saul se stamgenote: 3 000. Tot in dié stadium het die meeste van hulle trou gebly aan die huis van Saul.

₃₀Van die Efraimiete was daar 20 800, almal strydbare manne, gesiene mense in hulle families; ₃₁van die halwe Manassestam: 18 000 wat afgevaardig was om Dawid te kom koning maak; ₃₂van die Issaskarstam, die mense wat die tekens van die tye verstaan het en geweet het wat Israel te doen staan: 200 van hulle hoofmanne en al hulle stamgenote onder hulle bevel; ₃₃van Sebulon: 50 000 man wat slaggereed was en met alle wapens toegerus was vir die oorlog. Sonder om twee keer te dink, het hulle saam in 'n geveg ingestorm. ₃₄Van Naftali was daar 1 000 aanvoerders en saam met hulle 37 000 man met grootskild en spies; ₃₅van die Danniete: 28 600 gewapende man; ₃₆van Aser: 40 000 man, slaggereed en gewapen; ₃₇van oorkant die Jordaan af, van die Rubeniete, Gadiete en die halwe Manassestam: 120 000, toegerus met alle wapens. ₃₈Al hierdie krygsmanne het saamgestaan en met volle oorgawe na Hebron toe gekom om Dawid koning oor die hele Israel te maak. Die hele res van Israel was dit daarmee eens dat Dawid koning gemaak moes word. ₃₉Drie dae lank was hulle daar by Dawid en het hulle geëet en gedrink, want hulle volksgenote het hulle onthaal. ₄₀Hulle verwante selfs van Issaskar, Sebulon en Naftali af het kos aangebring op donkies, kamele, muile en beeste. Daar was volop meel, vyekoeke, rosyntjiekoeke, wyn en olie, grootvee en kleinvee, want daar was groot vreugde in Israel.

₁Daarna het Dawid met die aanvoerders van duisend en dié van honderd beraadslaag, met elke leier. ₂Hy het vir die volle volksvergadering van Israel gesê: “As julle dink dit is goed, en as die Here ons God sy goedkeuring gee, laat ons die saak nou aanpak en boodskappers stuur na ons ander volksgenote toe in al die gebiede van Israel, dat hulle, en saam met hulle die priesters en die Leviete wat in hulle dorpe met weivelde woon, hier by ons moet bymekaarkom. ₃Dan bring ons die ark van ons God na ons toe terug; in Saul se tyd het ons ons nie daaroor bekommer nie.”

₄Die volle vergadering het hom bereid verklaar om dit te doen, want die hele volk het gedink dis reg. ₅So het Dawid dan die hele Israel, van Sigorspruit aan die Egiptiese grens af tot by Lebo-Hamat, bymekaargebring om die ark van God in Kirjat-Jearim te gaan haal.

₆Dawid en die hele Israel het opgetrek na Baäla toe, na Kirjat-Jearim toe wat in Juda lê, om die ark te gaan haal. Dit is die ark van die Here God wat oor die gerubs troon; sy Naam is oor die ark uitgeroep. ₇Hulle het die ark van God op 'n nuwe wa vervoer van die huis van Abinadab af. Ussa en Agjo het die wa gedrywe. ₈Dawid en die hele Israel het uitbundig voor die ark van God uit gedans, begelei deur liedere, liere, harpe, tamboeryne, simbale en trompette.

₉Toe hulle by Nakon se dorsvloer kom, het Ussa die ark met sy hand teëgehou, want die osse het gestruikel. ₁₀Die toorn van die Here het teen Ussa ontvlam; die Here het hom getref omdat hy met sy hand aan die ark geraak het, en hy het daar langs die ark gesterf. ₁₁Dawid was diep ontsteld omdat die Here vir Ussa so weggeskeur het en hy het daardie plek genoem Ussa-se-Skeur. Dit is nou nog die naam. ₁₂Dawid het daardie dag bang geword vir God en gesê: “Hoe kan ek die ark van God nou na my toe bring?”

₁₃Hy het toe nie die ark na hom toe in die Dawidstad laat inkom nie en het dit laat wegdraai na die huis van Obed-Edom toe wat uit Gat afkomstig was. ₁₄Die ark van God het drie maande in Obed-Edom se huis gestaan, en God het hom en alles wat hy gehad het, voorspoedig gemaak.

₁Koning Hiram van Tirus het 'n afvaardiging na Dawid toe gestuur, en ook sederhout, geskoolde messelaars en skrynwerkers om vir hom 'n huis te bou. ₂Dawid het toe besef dat die Here hom as koning oor Israel bevestig het, want sy koningskap het hoë aansien gekry ter wille van die Here se volk Israel. ₃In Jerusalem het Dawid met nog vrouens getrou en het hy die vader van nog seuns en dogters geword. ₄Hier is die name van die kinders wat in Jerusalem vir hom gebore is: Sima, Sobab, Natan, Salomo, ₅Jibgar, Elisua, Elpelet, ₆Noga, Nefeg, Jafia, ₇Elisama, Eljada en Elifelet.

₈Toe die Filistyne verneem dat Dawid tot koning oor die hele Israel gesalf is, het hulle almal teen hom opgetrek. Dawid het dit gehoor en hulle tegemoet getrek. ₉Die Filistyne het in die Spooklaagte aangekom en daar ontplooi. ₁₀Dawid het God geraadpleeg en gevra: “Moet ek teen die Filistyne opruk? Sal U hulle in my mag oorgee?”

Die Here het hom geantwoord: “Trek op, Ek gee hulle aan jou oor.”

₁₁Die Filistyne het toe opgetrek na 'n groot kloof en daar het Dawid hulle verslaan. Dawid het daarna gesê: “God het my vyande met my hand gekloof soos water 'n wal kloof!”

Dit is waarom hulle daardie plek Grootkloof noem. ₁₂Die Filistyne het in hulle haas selfs hulle gode daar gelos. Dawid het opdrag gegee dat die gode verbrand moet word, en dit is gedoen.

₁₃Toe die Filistyne weer 'n keer in die laagte ontplooi, ₁₄het Dawid God weer geraadpleeg. God het vir hom gesê: “Moenie agter hulle aan optrek nie; maak 'n omsingelingsbeweging van hulle af weg en val hulle aan regoor die melkbosse. ₁₅Wanneer jy 'n geritsel in die toppe van die melkbosse hoor, moet jy aanval, want dan trek God voor jou uit om die leër van die Filistyne te verslaan.”

₁₆Dawid het gemaak soos God gesê het, en hulle het die Filistyne verslaan van Gibeon af tot by Geser. ₁₇Dawid se roem het na alle lande toe versprei, en die Here het al die nasies vir hom ontsag laat kry.

₁Dawid het vir hom huise opgerig in die Dawidstad. Hy het ook 'n plek vir die ark van God gereed gemaak en 'n tent daarvoor opgeslaan. ₂Dit was toe dat Dawid bepaal het dat niemand behalwe die Leviete die ark van God mag dra nie, omdat die Here hulle uitgekies het om sy ark te dra en vir altyd daarby diens te doen. ₃Dawid het die hele Israel in Jerusalem laat bymekaarkom om die ark van die Here na die plek toe te bring wat hy daarvoor reggemaak het. ₄Hy het die Aäroniete en die Leviete laat bymekaarkom: ₅van die Kehatgroep was daar die leier Uriël met sy honderd en twintig ampsgenote, ₆van die Merarigroep die leier Asaja met sy twee honderd en twintig, ₇van die Gersongroep die leier Joël met sy honderd en dertig, ₈van die Elisafangroep die leier Semaja met sy twee honderd, ₉van die Hebrongroep die leier Eliël met sy tagtig, ₁₀en van die Ussiëlgroep die leier Amminadab met sy honderd en twaalf ampsgenote.

₁₁Toe het Dawid die priesters Sadok en Abjatar en die Leviete Uriël, Asaja, Joël, Semaja, Eliël en Amminadab geroep ₁₂en vir hulle gesê: “Julle is die familiehoofde van die Leviete. Reinig julle en julle ampsgenote en bring die ark van die Here die God van Israel na die plek toe wat ek daarvoor reggemaak het. ₁₃Omdat julle dit nie die eerste keer al gedoen het nie, het die Here ons God iemand van ons weggeskeur, want ons het nie op die regte manier na die wil van God gevra nie.”

₁₄Die priesters en die Leviete het hulle toe gereinig om die ark van die Here die God van Israel te gaan haal. ₁₅Die Leviete het die ark van God met draaghoute op hulle skouers gedra soos Moses beveel het in ooreenstemming met die opdrag van die Here.

₁₆Verder het Dawid die hoofde van die Leviete beveel om hulle ampsgenote, die sangers, te laat aantree met musiekinstrumente, harpe, liere en simbale, om die feesvreugde hard te laat weergalm. ₁₇Die Leviete het toe die volgende manne laat aantree: Heman seun van Joël; uit sy ampsgenote Asaf seun van Berekja; uit die Merarigroep hulle ampsgenoot Etan seun van Kusaja. ₁₈Hulle is bygestaan deur hulle ampsgenote van laer rang, die poortwagte Sagaria, Jaäsiël, Semiramot, Jegiël, Unni, Eliab, Benaja, Maäseja, Mattitja, Elifele, Mikneja, Obed-Edom en Jeïel. ₁₉Die sangers Heman, Asaf en Etan het die kopersimbale geslaan. ₂₀Sagaria, Jaäsiël, Semiramot, Jegiël, Unni, Eliab, Maäseja en Benaja het die harpe met die hoë toon bespeel. ₂₁Mattitja, Elifele, Mikneja, Obed-Edom, Jeïel en Asasja het die liere met die laer toon ter begeleiding bespeel. ₂₂Kenanja was leier van die Leviete wat die drawerk gedoen het. Hy het die werk gereël, want hy het geweet hoe. ₂₃Berekja en Elkana was poortwagte by die ark. ₂₄Die priesters Sebanja, Josafat, Netanel, Amasai, Sagaria, Benaja en Eliëser het die trompette geblaas voor die ark van God uit. Obed-Edom en Jegija was ook poortwagte by die ark.

₂₅Dawid, die leiers van Israel en die aanvoerders van duisend het die verbondsark van die Here in feestelike stemming uit die huis van Obed-Edom gaan inbring.

₂₆Hulle het sewe bulle en sewe ramme geoffer om God se hulp te vra vir die Leviete wat die verbondsark van die Here gedra het. ₂₇Dawid het 'n mantel van fyn linne aangehad, so ook al die Leviete wat die ark gedra het, die sangers, en Kenanja, wat in bevel was van die sangers. Dawid het ook nog 'n linneskouerkleed gedra. ₂₈So het die hele Israel die verbondsark van die Here ingebring met feeskrete, ramshoring- en trompetgeskal, simbaalslae en die musiek van harpe en liere. ₂₉Terwyl die verbondsark van die Here die Dawidstad ingekom het, het Saul se dogter Mikal deur die venster afgekyk. Sy het koning Dawid gesien terwyl hy spring en dans, en sy het hom in stilte verag.

₁Van Dawid.