Na die Woord – Dag 105

₁Word wakker, word wakker,

ruk jou reg, Sion.

Trek mooi klere aan,

Jerusalem, heilige stad!

Mense wat nie besny is nie

en mense wat onrein is, sal nie meer in jou kom nie.

₂Skud die stof van jou af en staan op, Jerusalem,

jy wat 'n gevangene is.

Maak los die toue om jou nek, Sion,

jy wat 'n gevangene is.

Ek het julle verkoop, maar nie vir geld nie;

julle sal losgekoop word, maar nie deur geld nie.

In die begin het my volk afgegaan na Egipte toe

en daar gewoon as vreemdelinge;

later het Assirië hulle verdruk.

₅En wat kry Ek nou hier in Babel? vra die Here.

My volk is sonder rede weggevoer,

hulle leiers huil, sê die Here.

My Naam word gedurig belaster.

₆Daardie dag sal my volk my Naam bely:

dat Ek die Here is,

dat dit Ek is wat sê: Hier is Ek!

₇Hoe wonderlik klink op die berge

die voetstappe van hom wat die goeie boodskap bring,

wat vrede aankondig, wat die goeie tyding bring,

wat redding aankondig,

wat vir Sion sê: “Jou God is Koning!”

₈Hoor, jou wagte roep hard,

hulle jubel almal saam,

want hulle sien dat die Here na Sion toe terugkom.

₉Jubel en juig, puinhope van Jerusalem,

want die Here het vir sy volk uitkoms gebring,

Hy het Jerusalem verlos.

₁₀Die Here het sy heiligheid, sy mag, geopenbaar voor die oë van al die nasies.

Tot aan die uithoeke van die aarde

sal hulle die redding sien wat ons God bewerk het.

₁₁Gee pad, gee pad, kom uit uit Babel!

Moenie aan iets raak wat onrein is nie.

Kom uit daar! Sorg dat julle rein is,

julle wat die tempelgereedskap dra.

₁₂Julle hoef nie haastig pad te gee nie,

julle hoef nie soos vlugtelinge te vertrek nie:

Die Here gaan voor julle uit,

die God van Israel kom agter julle aan.

₁₃My dienaar sal voorspoedig wees.

Hy sal hoog in aansien wees, hy sal baie eer ontvang.

₁₄Baie mense was ontsteld oor hom,

hy was so misvormd

dat hy nie meer soos 'n mens gelyk het nie,

nie meer die voorkoms van 'n mens gehad het nie.

₁₅Maar hy gaan baie nasies laat opspring van verbasing.

Konings sal sprakeloos wees oor hom,

want hulle sal iets sien wat nie aan hulle vertel is nie,

hulle sal iets te wete kom

wat hulle nog nooit gehoor het nie.

₁Wie sal ons glo as ons hiervan vertel?

Wie sal die mag van die Here hierin kan raaksien?

₂Die dienaar was soos 'n loot wat voor die Here uitspruit,

soos 'n plant wat wortel skiet in droë grond.

Hy het nie skoonheid of prag gehad

dat ons na hom sou kyk nie,

nie die voorkoms dat ons van hom sou hou nie.

₃Hy was verag en deur die mense verstoot,

'n man van lyding wat pyn geken het,

iemand vir wie die mense die gesig wegdraai.

Hy was verag, ons het hom nie gereken nie.

₄Tog het hy óns lyding op hom geneem,

óns siektes het hy gedra.

Maar ons het hom beskou as een wat gestraf word,

wat deur God geslaan en gepynig word.

₅Oor óns oortredings is hy deurboor,

oor óns sondes is hy verbrysel;

die straf wat vir ons vrede moes bring, was op hom,

deur sý wonde het daar vir ons genesing gekom.

₆Ons het almal gedwaal soos skape,

ons het elkeen sy eie pad geloop,

maar die Here het ons almal se sonde op hom laat afkom.

₇Hy is mishandel, maar hy het geduldig gebly,

hy het nie gekla nie.

Soos 'n lam wat na die slagplek toe gelei word

en soos 'n skaap wat stil is as hy geskeer word,

het hy nie gekla nie.

₈Terwyl hy gely het en gestraf is,

is hy weggeneem,

en wie van sy mense het dit ter harte geneem

dat hy afgesny is uit die land van die lewendes?

Hy is gestraf oor die sonde van my volk.

₉Hy het 'n graf gekry by goddeloses,

hy was by sondaars in sy dood

al het hy geen misdaad gepleeg nie

en al was hy nooit vals nie.

₁₀Dit was die wil van die Here om hom te verbrysel,

om hom die pyn te laat ly.

As hy sy lewe as skuldoffer gee,

sal hy 'n nageslag hê en nog lank lewe,

deur hom sal die wil van die Here sy doel bereik.

₁₁Ná sy bitter lyding sal hy weer die lig sien

en hy sal die Here ken.

My dienaar, die regverdige, sal baie mense regverdig maak:

hy sal die straf vir hulle sonde dra.

₁₂Daarom gee Ek hom 'n ereplek onder die grotes.

Hy sal saam met magtiges die oorwinning vier

omdat hy hom in die dood oorgegee het

en as misdadiger beskou is,

omdat hy die sondes van baie op hom geneem het

en vir oortreders gebid het.

₁Jubel, onvrugbare vrou,

jy wat geen kinders

in die wêreld gebring het nie,

jubel en juig,

jy wat geen geboortepyne geken het nie,

want jy, verstote vrou, gaan nou meer kinders hê

as een wat getroud is, sê die Here.

₂Maak groter die plek vir jou tent,

maak breër jou tentdoeke,

moenie suinig daarmee werk nie.

Maak langer die tentlyne

en slaan die tentpenne dieper in,

₃want jy sal na alle kante toe uitbrei;

jou nageslag sal nasies verdryf

en in die stede wat nou verwoes is, gaan woon.

₄Moenie bang wees nie,

jy sal nie weer in die skande kom nie,

moenie so verleë daar staan nie,

jy sal nie weer verneder word nie.

Jy sal die skande uit jou jong dae vergeet

en nie meer dink hoe jy verneder is

toe jy 'n weduwee was nie.

₅Hy wat jou gemaak het, is jou man,

sy Naam is die Here die Almagtige.

Die Heilige van Israel is jou Verlosser;

Hy word die God van die hele wêreld genoem.

₆Jy is 'n verstote en bitter bedroefde vrou,

maar die Here roep jou terug,

want hoe kan 'n man sy eie vrou vergeet? sê jou God.

₇Net 'n oomblik het Ek jou verstoot,

in my groot liefde vat Ek jou terug.

₈In 'n opwelling van toorn

wou Ek 'n kort tydjie niks met jou te doen hê nie,

maar Ek ontferm My oor jou

met 'n liefde wat nooit vergaan nie,

sê die Here, jou Verlosser.

₉Soos met die waters van Noag is dit vir My:

soos Ek met 'n eed bevestig het dat die waters van Noag

nie weer die aarde sal oorstroom nie,

so bevestig Ek met 'n eed

dat Ek nie langer toornig op jou sal wees en jou sal straf nie.

₁₀Berge kan padgee, heuwels kan wankel,

maar my liefde vir jou sal nooit verdwyn nie,

my vredeverbond met jou sal nooit wankel nie,

sê die Here, wat jou liefhet.

₁₁Jy, verdrukte, bedreigde stad

vir wie daar nie uitkoms was nie,

Ek sal jou klippe vasmessel met goeie klei,

Ek maak jou fondamente van saffiersteen.

₁₂Ek maak jou torings van robyne

en jou poorte van smarag,

jou hele stadsmuur van kosbare klip.

₁₃Al jou inwoners sal leerlinge van die Here wees,

en hulle sal altyd vrede geniet.

₁₄Geregtigheid sal in jou heers.

Jy hoef nie bang te wees vir verdrukking nie,

ook nie vir verskrikking nie,

want dit sal nie naby jou kom nie.

₁₅As iemand jou aanval, het Ek hom nie gestuur nie;

wie jou aanval, sal die onderspit teen jou delf.

₁₆Dit is Ek wat die ambagsman geskep het,

die ambagsman wat die vuur aanblaas

en allerhande wapens daarin smee.

Dit is Ek wat die verwoester geskep het om af te breek.

₁₇Geen wapen wat gesmee word om jou aan te val,

sal iets uitrig nie;

elkeen wat vals teen jou getuig,

sal gestraf word.

Dit is hoe Ek, die Here,

vir my dienaars sorg.

Ek laat geregtigheid aan hulle geskied, sê die Here.

₁Kom, almal wat dors is, kom na die water toe,

selfs ook dié wat nie geld het nie, kom,

koop en eet;

ja, kom, koop sonder geld en sonder om te betaal,

wyn en melk.

₂Waarom betaal julle vir iets wat nie brood is nie,

waarom werk julle vir iets wat nie kan versadig nie?

Luister aandagtig na My, sodat julle kan eet wat goed is

en versadig kan word met die beste wat daar is.

₃Gee aandag en kom na My toe,

luister, en julle sal lewe.

Ek wil met julle 'n ewige verbond sluit,

Ek wil my troue liefde aan julle betoon soos aan Dawid.

₄Ek het hom 'n getuie gemaak vir die volke,

'n regeerder en gebieder van volke.

₅Nou sal jy nasies ontbied wat jy nie geken het nie,

en nasies wat jou nie geken het nie,

sal na jou toe hardloop

ter wille van die Here jou God,

die Heilige van Israel,

omdat Hy jou in eer herstel het.

₆Vra na die wil van die Here terwyl Hy nog te vinde is,

roep Hom aan terwyl Hy nog naby is.

₇Die goddelose moet sy verkeerde pad laat staan,

die slegte mens sy slegte planne.

Hy moet hom tot die Here bekeer, dan sal Hy hom genadig wees;

hy moet hom tot ons God bekeer, Hy vergewe altyd weer.

₈My gedagtes is nie julle gedagtes nie,

en julle optrede nie soos Myne nie,

sê die Here;

₉soos die hemel hoër is as die aarde,

so is my optrede verhewe bo julle optrede

en my gedagtes bo julle gedagtes.

₁₀Die reën en die sneeu kom uit die hemel uit

en dit gaan nie daarheen terug nie maar deurweek die aarde

en laat die plante bot en vrugte dra,

sodat daar saad is om te saai en brood om te eet.

₁₁So sal die woord wat uit my mond kom, ook wees:

dit sal nie onverrigter sake na My toe terugkeer nie,

maar dit sal doen wat Ek gedoen wil hê

en tot stand bring waarvoor Ek dit gestuur het.

₁₂Julle sal met blydskap uit Babel wegtrek

en in vrede gelei word;

die berge en die heuwels sal voor julle uit jubel en juig

en al die bome in die veld sal hande klap.

₁₃In die plek van 'n doringbos sal daar 'n sipres opskiet,

in die plek van 'n dissel sal daar 'n mirteboom opskiet.

Dit sal tot eer van die Here wees,

'n blywende teken wat nooit vernietig sal word nie.