Leef gelukkig … vandag – dag 14

Gedurende die winter help ʼn jas om ons teen die koue te beskerm. Maar besef jy dat ons elke dag van die jaar een van twee jasse dra? Die een jas is lelik, swaar, donker en wollerig. Die ander een is lig en stylvol. Die Woord van God noem hierdie twee jasse “bekommernis” en “prys”.

Wanneer ons nalaat om vroegoggend die Heilige Gees in ons lewens in te nooi en te kies om met ʼn positiewe gesindheid ons lewe te benader, kies die vyand namens ons die swaar, donker en wollerige jas. Met dié jas van bekommernis fokus ons op die negatiewe elemente rondom ons. Ons sien die stygende werkloosheidsyfer of elektrisiteitspryse, die krisisse by die huis of werk of die hoë misdaad- en geweldsyfer. Hierdie dinge veroorsaak dat bekommernis, bedruktheid en vrees ons lewens oorneem terwyl ons lewensvreugde geblus word.

Die alternatief is om vroegdag die Heilige Gees in ons lewens in te nooi en Hom te vra om ons met ʼn positiewe gesindheid na situasies rondom ons te laat kyk. Met hierdie jas van prys is ons steeds bewus van die uitdagings en probleme in ons lewens, maar is ons meer bewus van God se grootheid en krag en sy vermoë om alles ten goede te laat meewerk vir diegene wat Hom liefhet.

Watter jas dra jy vandag? Een wat jou aftrek en jou lewe versuur of een wat die mense rondom jou inspireer omdat hulle jou positiewe gesindheid begeer? As bekommernis vandag jou lewe oorheers, kan jy gerus aan hierdie beloftes van God vashou.

Werp vandag jou bekommernisse op God. Weet dat Hy jou deur elke donker situasie sal dra. Begin om jou geloof in Hom te plaas terwyl jy jou begeertes deur gebed en smeking en met danksegging aan Hom bekend maak. Doen jy dit, mag jy dalk beleef hoe jou swaar, donker, wollerige jas eensklaps op die grond val terwyl jy trots met ʼn ligte, stylvolle jas die toekoms instap! God weet reeds wat jy benodig en Hy sal dit op die regte tyd voorsien! Sterkte.