Jou 24/7 Metgesel – Dag 11
Die Heilige Gees kweek vrugte in ons
Bybelteks(te)
Om vrug te dra impliseer dat jy as gelowige vir God – in wie jy glo en wie in jou bly – deur jou leefwyse sal verheerlik. Anders gestel: Sy teenwoordigheid in jou lewe behoort jou dryfveer te wees om ʼn voorbeeld vir ander te wees wanneer hulle na jou leefstyl kyk.
In 1 Timoteus 4:12 word daar enkele dinge genoem wat deur jou lewe weerspieël behoort te word: “… wees jy vir die gelowiges ʼn voorbeeld in woord en gedrag, in liefde, geloof en reinheid.”
Die gelowige se woorde moet in die eerste plek vir Hom aanneemlik wees (Psalm 19:15) en wanneer ons met mense praat, behoort dit wat uit ons monde kom opbouend te wees “sodat dit julle hoorders ten goede kan kom” (Efesiërs 4:29). Vuil taal behoort dus nie deel van ons woordeskat te wees nie.
Die Heilige Gees wat in ons woon kweek vrugte wat in ons gedrag of in ons leefwyse sigbaar word. Galasiërs 5:16-22 skep ʼn baie duidelike beeld oor watter gedrag nie by ʼn gelowige tuishoort nie, omdat dit nie tot eer van die Een in ons is nie. As ek en jy dus die praktyke van die sondige natuur wat genoem word in ons lewens herken, moet ons verstaan dat ons nie leef vanuit die Gees wat in ons woon nie, maar dat ons gedrag bepaal word deur die begeertes van ons sondige natuur. Slegs wanneer ons leefwyse deur die Heilige Gees bepaal word kan dit lynreg met reinheid staan – daardie kwaliteit wat beskryf word as rein van besoedeling en wat nie besmet is nie.
Die liefde en geloof wat ons as voorbeeld vir mense moet gee kan beskryf word as daardie allesoorheersende liefde vir en geloof in Hom wat in ons lewens en deur ons leefwyse sigbaar word vir die mense rondom ons.
Die skrywer rig ook ʼn waarskuwing aan ons en Timoteus: “Let goed op jou lewe en jou leer, volhard daarin …” Ons moet ook onsself, ons lewens en dit wat ons aan ander leer gereeld onder die vergrootglas plaas, “… want deur dit te doen, sal jy jouself red sowel as dié wat na jou luister” (1 Timoteus 4:16).
ʼn Leefstyl wat God verheerlik ís moontlik, maar net as ons totaal afhanklik is van die Een wat binne-in ons leef.
