Hy is altyd by jou – Dag 7

Koning Agas sterf en Hiskia, ʼn koning van Juda wat die Here liefhet, is nou op die troon. Daar is egter ʼn probleem: Julle sal onthou dat Agas ʼn ooreenkoms met die Assiriërs aangegaan het. Die Assiriërs het egter besluit hulle wil nie net Agas se omkoopgeld hê nie, hulle wil sy hele land hê! Hiskia het nou te doen met die magtige Assiriese leër. Die hoofadjudant van die koning van Assirië het ʼn vergadering belê om oor die oorname van Jerusalem te onderhandel. Die hoofadjudant staan op en begin die inwoners van Jerusalem in Hebreeus toespreek, net om seker te maak dat hulle verstaan. In wese sê hy vir hulle dat nie Hiskia of God hulle kan red nie en dat hulle eerder moet oorgee. Hy belowe selfs om hulle goed te behandel as hulle dit doen.

Dit is nie leë dreigement nie. Die Assiriërs het tot op daardie stadium al die stede wat hulle aangeval het verower. Hiskia het elke geveg verloor. Daar is geen twyfel dat die Assiriërs oor die nodige militêre mag beskik om Jerusalem, soos baie ander stede, te verwoes nie. Dit is die feite.

Maar daar is een belangrike feit wat hierdie hoofadjudant ignoreer – hy praat met die volk van God en God is in beheer oor wat met hulle gebeur.

Wanneer ons besluite neem moet ons ook onthou dat ons ons lewens aan God oorgegee het. Al is sommige feite nie vir ons duidelik nie, is alles vir Hom duidelik. As ons werklik verstandig wil wees, moet ons versigtig na die stem van die Here luister, en nie net na wat mense rondom ons sê nie.