Bible Society of South Africa
Leesplanne
Hy is altyd by jou
Hy is altyd by jou – Dag 18
Xanthe Galanis

Hy is altyd by jou – Dag 18

Eer in plaas van smart

Bybelteks(te)

JESAJA 61

Eer in plaas van smart

1Die Gees van die Here my God het oor my gekom;

die Here het my gesalf

om 'n blye boodskap te bring aan die mense in nood,

Hy het my gestuur om dié wat moedeloos is, op te beur,

om vir die gevangenes vrylating aan te kondig,

vryheid vir dié wat opgesluit is,

2om aan te kondig dat die tyd gekom het

waarop die Here genade betoon,

die dag waarop ons God sy vyande straf

maar almal wat treur, vertroos,

3die dag waarop Hy vir dié in Sion wat treur,

eer gee in plaas van smart,

vreugde in plaas van droefheid,

blydskap in plaas van hartseer.

Hulle sal genoem word: Bome van Redding.

Die Here het hulle geplant om sy roem te vermeerder.

JESAJA 61:1-3AFR83Maak oop in die Bybelleser

LUKAS 4

Jesus word uit Nasaret verdryf

16Hy het ook in Nasaret gekom, waar Hy grootgeword het, en soos sy gewoonte was, het Hy op die sabbatdag na die sinagoge toe gegaan. Toe Hy opstaan om uit die Skrif voor te lees, 17is die boek van die profeet Jesaja vir Hom aangegee, en Hy het dit oopgemaak en die plek gekry waar geskrywe staan:

18“Die Gees van die Here is op My

omdat Hy My gesalf het

om die evangelie aan armes te verkondig.

Hy het My gestuur om vrylating vir gevangenes uit te roep en herstel van gesig vir blindes, om onderdruktes in vryheid uit te stuur,

19om die genadejaar van die Here aan te kondig.”

20Nadat Hy die boek toegemaak en aan die amptenaar teruggegee het, het Hy gaan sit. Die oë van almal in die sinagoge was op Hom gerig. 21Toe begin Hy hulle toespreek: “Vandag is hierdie Skrifwoord wat julle nou net gehoor het, vervul.”

LUKAS 4:16-21AFR83Maak oop in die Bybelleser

Hoofstuk 61 is die tweede belangrike deel van die boek Jesaja en handel meer oor Juda se toekomstige bevryding uit Babel en hulle uiteindelike verheerliking as oor hulle onmiddellike omstandighede. In die vorige hoofstukke praat Jesaja baie oor hoe noodsaaklik dit is om sonde te verwerp. Nou, in die finale hoofstukke van hierdie boek, word beskrywings gegee van verlossing, insluitende die bevryding van onderdrukking, die verlossing deur God, die volharding van die Heilige Gees, en die ewige verheerliking van Jerusalem.

In Jesaja 61 lees ons dat die Messias wat met sy eerste koms verlossing gebring het, met sy tweede koms die verloste Israel sal vertroos. Jesus het Jesaja 61:1-2 voorgelees en in sy eie bediening toegepas toe Hy in die sinagoge van Nasaret gepreek het (Lukas 4:16-21). Hierdie gedeelte in Jesaja is in Jesus Christus vervul; Hy het gekom om te genees en te help, Hy het die siekes genees en die wat ly vertroos en die eiegeregtiges veroordeel.

Volgens antieke Israelitiese gebruike het mense getreur deur hulleself met as en stof te besprinkel en ʼn swart roukleed aan te trek. Die skeur van hierdie roukleed was ʼn algemene teken van smart en angs onder die Hebreërs. Olie het die teenoorgestelde beteken – om met olie gesalf te word was ʼn teken van vreugde en feesviering. Dit is die emosies wat Jesaja probeer ontlok wanneer hy in hierdie hoofstuk na olie verwys.

Die Here verander ons as en stof in olie van blydskap. Deur die Messias, Jesus Christus, word ons wat ons sondes bely verander en deur sy versoeningsdood word ons voor God geregverdig. Dit is ʼn transformasie wat nie bloot verander wat met ons gebeur wanneer ons sterf nie, maar wat God met ons doen in bekering, in heiligmaking, en in ons daaglikse lewe. Hy neem iets waardeloos en gee aan ons eer in plaas van smart.

Bible Society of South Africav.4.24.4
VOLG ONS