Hy is altyd by jou – Dag 14
![](https://cms.ibep-prod.com/app/uploads/sites/14/2023/04/Come_to_me_Gen_HERO.jpg)
![](https://cms.ibep-prod.com/app/uploads/sites/14/2023/04/Come_to_me_Gen_HERO.jpg)
Lieflike voete!
Bybelteks(te)
JESAJA 52
ROMEINE 10
Nee, hierdie is nie ʼn advertensie vir ʼn pedikuur nie! Inteendeel, ek dink die voete van die boodskapper waarvan Jesaja hier praat was alles behalwe mooi glad en sag. Jesaja beskryf hier ʼn beleërde stad wat angstig wag vir die boodskapper om hulle van die uitkoms van die geveg te kom vertel. Is dit goeie nuus? Het hulle gewen? Sal hulle vry wees? Is hulle verslaan? Dan begin hulle voetstappe hoor. Die boodskapper kom nader en die mense wat hom dophou besef dat hy nie net hardloop nie maar ook dans. Die goeie tyding wat die boodskapper bring versprei deur die stad en sy voete word as “lieflik” beskryf.
Die feit dat Kores Babel verslaan het, is goeie nuus vir die Joodse ballinge want dit beteken dat hulle vrygelaat gaan word. Die goeie nuus vir vandag is dat Christus gekom het om ons van sonde en die dood te bevry. Paulus haal ʼn gedeelte van Jesaja 52:7 aan in Romeine 10:13-15 wanneer hy die rol wil beklemtoon van gelowiges om die evangelie te verkondig: “Want: Elkeen wat die Naam van die Here aanroep, sal gered word. Hoe kan hulle Hom dan aanroep in wie hulle nie geglo het nie? En hoe kan hulle in Hom glo van wie hulle nie gehoor het nie? En hoe kan hulle hoor sonder een wat preek? En hoe kan hulle preek as hulle nie gestuur word nie? Soos geskrywe is: Hoe lieflik is die voete van die wat die evangelie van vrede verkondig, van die wat die evangelie van die goeie verkondig!”
Ons as Christene is geroep om lieflike voete te hê – om die evangelie te verkondig dat ons vrygemaak is. Dit is nie ʼn glansryke taak nie en ons gaan waarskynlik blase kry, maar dit is ons verantwoordelikheid om die goeie nuus met almal te deel.