God van liefde, hoop, genade en vrede – Dag 10

“Toe verskyn die Engel van die Here aan hom in ʼn vlam binne-in ʼn doringbos. Terwyl hy kyk, sien hy dat die doringbos aanhou brand, maar nie uitbrand nie.” (Eksodus 3:2)

God is die Een wat deur die eeue heen Homself aan die mens openbaar of bekendstel. Die sondeval het gemaak dat die skepsel sy natuurlike behoefte om sy Skepper te soek verloor het. Die sondeval het selfs veroorsaak dat die mens nie meer ingestel is om altyd God se stem duidelik te herken nie.

Daar is baie voorbeelde in die Bybel.

Uit die brandende doringbos roep God na Moses en stel Homself bekend: “Ek is die God van jou voorvaders, die God van Abraham, die God van Isak, die God van Jakob.” (Eksodus 3:6)

In 1 Konings 19:12-13 lees ons: “En na die vuur was daar ʼn fluistering in die windstilte (…) Tóé hoor hy ʼn stem wat vir hom sê: ‘Wat maak jy hier, Elia?’ ”

Op pad om die Christene in Damaskus te vervolg, laat God ʼn helder lig op Saulus val en praat Hy met hom: “Ek is Jesus (…) Dit is vir My wat jy vervolg.” (Handelinge 9:5)

God is die Een wat Homself steeds elke dag aan sy kinders openbaar; soms het dit op ʼn dramatiese wyse ʼn groot impak op jou lewe en ander tye deur die klein en alledaagse.

Hoor ek en jy Hom? Herken ons sy stem?