God se beloftes – Dag 5

Soms gebeur daar dinge in ons lewens wat ons nie verstaan nie en dit kan tot ʼn geloofskrisis lei.

Dit is dan wat ons die woorde, soos vir ons opgeteken in Jesaja, moet onthou: “My gedagtes is nie julle gedagtes nie, en julle optrede nie soos Myne nie, sê die Here” (Jesaja 55:8).

Ons gedagtes is nie soos God sʼn nie en Hy verduidelik ook nie altyd sy optrede vir ons nie, maar van Genesis tot by Openbaring word elkeen van sy beloftes aan ʼn opdrag gekoppel.

In ons teksvers gee die Here deur die woorde van die profeet Sagaria vir sy volk ʼn belofte. Sagaria het van 520 tot 518 v.C. geprofeteer toe baie Jode na Jerusalem teruggekeer het om die stad en die tempel te herbou. Behalwe vir sy profesieë weet ons nie baie van hom nie. Jesus vertel wel vir ons dat hy in die tempel vermoor is (Matteus 23:35).

Ons weet egter dat die bannelinge met hulle terugkeer voete begin sleep het met die herbou van die tempel (Haggai 1). Sagaria waarsku hulle om die Here eerste te stel en aan Hom gehoorsaam te wees. Dit is raad wat ons ook kan volg want dit bevat ʼn wonderlike belofte van die Here met ʼn versekering: “Bekeer julle tot My … dan sal Ek weer by julle wees …”

Daar is Christene wat voel dat die Here hulle in die steek gelaat het en Hom dan verwerp wanneer slegte dinge met hulle of hulle geliefdes gebeur. Ander raak weer louwarm in hulle geloof en verloor die toewyding wat hulle voorheen gehad het. Sommige Christene gee toe aan versoeking, weet dat hulle verkeerd gedoen het en glo dan dat die Here hulle nooit sal vergeef nie.

Dit is waar dat die Here elkeen van ons eendag sal oordeel, maar die tyd is nie nou nie. Dit maak nie saak wat jou geestelike toestand is nie, niemand op aarde is uitgesluit van God se genade nie. Daar is nog tyd om na Hom toe terug te keer. As ons ware berou toon en ons bekeer, het ons die belofte dat Hy by ons sal wees. Ons dien ʼn genadige, liefdevolle God!