Dag 6 – Verlossing is die helm op jou kop

Kyk na hierdie dagstukkie op Youtube (Opsioneel).

Verlossing is die helm op jou kop. Die helm was nie net bedoel om jou hoof te beskerm nie, dit het ook gedien as versiering. Die feit dat jy gered is, dat jy verlos is van die sonde, verlos is van die bose, is jou as Christen se versiering en beskerming. Met die helm van verlossing op jou kop kan jy nie verbrysel word deur die aanvalle van die Satan nie en sal jy op jou pos kan bly staan. Ons kan ons koppe in vertroue met die versiering van verlossing daarop, optel en ons hoef nie te twyfel nie. Ons is verlos. Satan het geen seggenskap meer oor jou nie. Deur Christus se soenverdienste aan die kruis, is jy verlos van sy greep, daar is betaal vir jou sonde, Christus het die oorwinning behaal en die kop van die slang vermorsel om ons te red.

Jy het oorgegaan van die koninkryk van die duisternis na die koninkryk van die lig, na die koninkryk wat vir ewig bly staan. Daarom kan ons ons koppe oplig met die helm van verlossing daarop, ons oë gerig op Christus wat weer op die wolke sal verskyn om die Satan en alle bose geeste in die lug in die ewige poel van vuur te gooi. Broer en suster, jy kan die stryd stry, want jy is meer as oorwinnaar deur Jesus Christus ons koning en Here. Jy kan jou kop oplig en selfs die magtigste vyand sonder vrees in die oë kyk. Jy is verlos.