Dagboek 2021 – 9 April
Jesus maak alles nuut
Bybelteks(te)
DIE OPENBARING 21
Die nuwe hemel en die nuwe aarde
Keiser Augustus is deur die Romeinse Ryk nie net as die seun van ’n god gesien nie, maar ook as die een wat ’n nuwe, goeie era laat aanbreek het in die Romeinse Ryk. Hierdie era was bekend as die vrede van Rome. Nêrens anders is dit meer duidelik nie as in die lof wat deur Paulus Fabius Maximus in 4 nC toegedig is aan keiser Augustus.
Maximus het gemeen dat die geboortedag van Augustus oral in die Ryk verkondig moet word as “evangelie” (goeie nuus) vir die mense. Verder moes hierdie geboortedag gesien word as die begin van die nuwe jaar. Sy motivering was soos volg: Die skepping was besig om in chaos te verval, alles was besig om ongedaan gemaak te word en sou tot nuut gegaan het. Maar toe kom Augustus en herstel die ganse skepping. Die gevolg was dat ’n “nuwe skepping” tot stand gekom het en die mense geleef het volgens die waardes van hierdie nuwe Ryk in diens van Augustus.
Johannes gee egter vir ons ’n ander beeld. Hy vertel van ’n ander gebeurtenis wat ’n nuwe hemel en nuwe aarde tot stand gebring het (Op 21:1). Hierdie gebeurtenis was egter nie een van groot militêre oorwinning nie, maar toe God onder die mense kom woon het (letterlik: toe God God se tent onder die mense kom opslaan het – Op 21:3; Joh 1:14). Die gevolg hiervan was dat die wêreld se koninkryke, eer en lof nie meer aan Augustus behoort het nie, maar dat dit alles God alleen toekom (Op 11:15; 19:6).
As gelowiges deel ons ook in hierdie nuwe hemel en aarde van God. Ons behoort ons lewens so in te rig dat dit die waardes van hierdie ryk tentoonstel en altyd so uitvoer dat dit tot eer van God sal wees. Waardes van omgee en liefde vir mekaar, en dit alles tot eer van ons God en Heer, want Hy wat op die troon sit, het gesê: Kyk, Ek maak alles nuut (Op 21:5).
Gesang 601
Ds Robert van Niekerk, Noordelike Pretoria
