Dagboek 2021 – 8 Desember

Adventtyd is ook die tyd om na te dink oor wat ons glo. Ons glo nie so maklik nie. Ons wil eers weet: Is daar nie ander verklarings nie? Geloof handel oor sy koms na die aarde, maar ook sy klaarmaak hier op aarde, oor babadoeke, maar ook doeke in die graf.

Een afleiding was dat iemand Jesus kom steel het. Maar die doeke is ’n belangrike vonds. Party doeke is sommer rondgestrooi, ander is netjies opgerol. Dis nie hoe diewe werk nie. Nee, diewe het nie vir Jesus gesteel nie.

Is opstanding ’n moontlikheid? Lasarus het opgestaan. Ja, maar Lasarus hou sy doeke aan, Jesus nie. Jesus het die doeke nie meer nodig nie. Jesus het die doeke ontgroei, Hy is nou te groot vir sy doeke. Die Jesus wat opstaan, keer nie na die lewe toe terug net soos Hy voorheen was nie. As die dissipels opgewonde was toe Jesus gesê het Hy praat nou met hulle reguit oor hoe die koninkryk van God werk, gaan ons, as ons vir Jesus nóú gewaar, die ware jakob teëkom. Dit is toe ook so, want toe Maria agterkom dis Hy en aan Hom wou vat, sê Hy: Moenie! Nie nou al nie.

Liefde help ons glo. Johannes was vir Jesus baie lief, en liefde help jou om die een wat jy liefhet, beter te verstaan. Johannes weet dadelik Jesus leef! Paulus het vir Jesus min liefde gehad. Vir Paulus moes God as’t ware met ’n knuppel oor die kop moker om hóm sterretjies te laat sien. Party van ons sien net doeke rondlê en ons glo. Ander van ons het nou nog kopseer, maar ons glo.

Ons glo ons het hier met die lewende God te make. Jesus Christus was dood, en Hy lewe. Jesus het opgestaan.

Hou oop jou oë: Jy gaan Jesus se doeke oral sien rondlê, sommige sommer gestrooi soos die klere in jou tiener se kamer, ander netjies opgevou en gebêre. Wees lief vir Jesus (en jou tiener ook!)! Net die doeke is genoeg om te weet: Jesus leef, en Jesus is die Here.

Ds.Hennie la Grange, Kampersrus