Dagboek 2021 – 7 Desember

Oral hoor ons die Kersfeesklokke lui, ons sien die wêreld gereedmaak om fees te vier, want die Verlosser is op pad! Ons Heiland is gebore in ’n stal so koud en kil. Ons wag op sy koms. Ons wag dat Immanuel moet kom om ons te verlos! Watter vreugdeboodskap!

’n Belofte wat meer as sewe eeue voor Christus se koms reeds aan koning Agas gegee is. Maar koning Agas wou nie hierdie belofte van God se teenwoordigheid aanneem nie. Uit die geskiedenis is dit duidelik dat Agas nie ’n Godvresende man was nie. En God sien dit en tree in. God het beloof dat daar ’n Koning uit die geslag van Dawid altyd op die troon sou wees. Dat die Een wat hierdie volk sou verlos, ook uit die geslag van Dawid sou voortspruit. Agas moes net vir ’n teken vra ter bevestiging daarvan! Tog het Agas geweier. Israel se soewereine God sou self vir Agas en die huis van Dawid ’n teken gee dat Hy met sy mense was, selfs al het die koning versuim om vir ’n teken te vra.

Die punt is egter dat die geboorte van die Kind die bevestiging vir Agas was dat God by hom sou wees (Immanuel) en dat God Agas se leërmag sou versterk. Op hierdie punt gaan dit nie soseer oor wie die Kind is of was nie, maar eerder God se bedoeling met die profesie en die belofte van God se teenwoordigheid by sy volk. Dat God in die mens se gebeure ingryp en die mens daar verlos. Dit gaan nie soseer oor die Messias, soos die profeet Jesaja dit voorspel het nie, eerder oor die feit van God se teenwoordigheid.

Dit is immers die boodskap van Advent: dat God ingryp in die mens se omstandighede en teenwoordig bly ondanks ons pogings om afstand te skep. Want God is getrou. Hy is Immanuel.

Ds Quinten Schimper, Krugersdorp/Krugersdorp-Wes