Bible Society of South Africa
Leesplanne
Dagboek 2021
Dagboek 2021 – 6 Oktober

Dagboek 2021 – 6 Oktober

Krag in swakheid

Bybelteks(te)

2 KORINTIËRS 12

Gesigte en openbarings

1Om te roem, het wel geen sin nie, maar terwyl dit dan nou moet, kom ek by gesigte en openbarings wat die Here gegee het. 2Ek ken 'n man wat aan Christus behoort. Veertien jaar gelede is hy weggeruk tot in die derde hemel. Of dit met die liggaam was of sonder die liggaam, weet ek nie, net God weet dit. 3-4Ek weet ook dat hierdie man weggeruk is na die paradys toe. Of dit met die liggaam was of sonder die liggaam, weet ek nie, net God weet dit. Daar het hy woorde gehoor wat 'n mens nie kan of mag uitspreek nie. 5Oor hierdie man sal ek roem, maar nie oor myself nie, behalwe oor my swakhede. 6Al sou ek wil roem, sal ek tog nie dwaas wees nie, omdat ek die waarheid sal praat. Maar ek weerhou my daarvan omdat ek nie wil hê dat iemand aan my meer moet toeskryf as wat hy my sien doen of my hoor sê nie, 7selfs nie vanweë die verhewenheid van die openbarings nie. Daarom, sodat ek nie hoogmoedig sou wees nie, is daar vir my 'n doring in die vlees gegee, 'n boodskapper van Satan om my met vuiste te slaan. 8Drie maal het ek die Here gebid dat dit van my af weggeneem moet word. 9Sy antwoord was: “My genade is vir jou genoeg. My krag kom juis tot volle werking wanneer jy swak is.” Daarom sal ek baie liewer oor my swakhede roem, sodat die krag van Christus my beskutting kan wees. 10Daarom is ek bly oor swakhede, beledigings, ontberings, vervolging en moeilikhede ter wille van Christus, want as ek swak is, is ek sterk.

2 KORINTIËRS 12:1-10AFR83Maak oop in die Bybelleser

Hoe weet ’n mens dat God se krag in jou werksaam is? Ons het al getuienisse gehoor van mense met buitengewone ervarings van God wat alle gebede verhoor en voorspoed moontlik maak as die geloof net reg is. Paulus gee in hierdie gedeelte antwoord op mense wat hulle beroem het op God se krag in hulle op grond van allerlei buitengewone belewenisse. Volgens Paulus het hy dit self beleef om weggeruk te wees tot in die hoogste hemel, tot by God; maar as dit oor werklike krag gaan, wil hy dit nie noem nie. Eintlik is hy so ongemaklik daaroor, dat hy van homself in die derde persoon praat. Hy was bang vir geestelike hoogmoed. Vir hom was die hoogtepunt van God se krag in sy lewe toe hy ernstig gebid het dat iets wat hom in sy werk gehinder het, weggevat moes word. Hy praat van ’n doring in die vlees, ’n boodskapper van Satan wat hom met vuiste slaan. Doring kan ook verwys na ’n paal, die kruis wat marteling bring tot die dood. Wat dit was, is onbekend, maar dit was die hoogtepunt van God se krag waarvan hy kon getuig, byna mee kon spog!

God se antwoord was nie ’n wonderlike ingryping om daardie las weg te neem nie, maar dat sy genade genoeg is omdat krag tot volle werking kom in swakheid. Genoeg was dit sodat Paulus ’n tevrede mens kon wees, byna trots, ten spyte van swakhede en baie ander struikelblokke. Dit kon so wees want hy het immers geweet van die oënskynlike swakheid van Jesus aan die paal van die dood waardeur die verstommendste krag ooit deurgebreek het, naamlik die krag wat Hom uit die dood laat opstaan het.

Wat weet jy? Daardie selfde krag is vir jou beskikbaar. Jy kan as ’n swak mens saam met Christus opstaan, nuut word en ’n nuwe status kry as kind van God. Dit is genade wat genoeg is om ook van jou ’n tevrede en opgewonde mens te maak.

Dr Piet (PJ) van Staden, Emeritus

Bible Society of South Africav.4.26.9
VOLG ONS