Bible Society of South Africa
Leesplanne
Dagboek 2021
Dagboek 2021 – 4 Desember

Dagboek 2021 – 4 Desember

Eendag as ek groot is...

Bybelteks(te)

LUKAS 2

Simeon en Anna by die tempel

25Daar het destyds 'n man met die naam Simeon in Jerusalem gewoon. Hy was getrou aan die wet en vroom, en het uitgesien na die koms van die Verlosser van Israel. Die Heilige Gees was op Simeon 26en het aan hom bekend gemaak dat hy nie sou sterwe voordat hy die Gesalfde van die Here gesien het nie. 27Deur die Gees gelei, het hy opgegaan na die tempel toe. Toe die ouers die Kindjie Jesus bring om vir Hom die gebruiklike bepaling van die wet na te kom, 28het Simeon Hom in sy arms geneem en God geprys en gesê:

29“Here, laat u dienaar nou

in vrede gaan volgens u woord,

30omdat my oë u verlossing gesien het

31wat U gereed gemaak het

voor die oë van al die volke:

32'n lig tot verligting van die nasies

en tot eer van u volk Israel.”

33Sy vader en moeder was verwonderd oor die dinge wat van Hom gesê is.

34Simeon het hulle geseën en vir Maria, sy moeder, gesê: “Kyk, hierdie Kindjie is bestem tot 'n val en 'n opstanding van baie in Israel en tot 'n teken wat weerspreek sal word. 35So sal die gesindheid van baie mense aan die lig kom. En wat jou betref, 'n swaard sal deur jou siel gaan.”

36Daar was ook 'n profetes, Anna, 'n dogter van Fanuel uit die stam Aser. Sy was al baie oud. As jong vrou was sy sewe jaar getroud, en na haar man se dood 37het sy weduwee gebly. Sy was nou al vier en tagtig jaar oud. Sy het nie van die tempel af weggebly nie en het God dag en nag gedien deur te vas en te bid. 38Juis op daardie oomblik het sy nader gekom en God gedank en oor die Kindjie gepraat met almal wat na die verlossing van Jerusalem uitgesien het.

39Toe Josef-hulle alles nagekom het wat die wet van die Here voorskryf, het hulle na Galilea toe teruggegaan, na hulle eie dorp, Nasaret. 40Die Kindjie het gegroei en sterk geword, en Hy was vol wysheid, en die genade van God was op Hom.

LUKAS 2:25-40AFR83Maak oop in die Bybelleser

Ons hoor dikwels hoe mense sê: Eendag as ek groot is… En ons almal het daardie drome! Daardie iets waarna ons uitsien, amper met verlange na smag. Vir Simeon was die droom, die groot lewensideaal om na te streef, om die Messias te sien. Om die Christus van God te aanskou voor hy sterf. As hy maar net een keer kan kyk in die gesig wat God se lig daarin dra, sou hy met ’n geruste hart kon sterf. Dit is wat hy wou doen as hy eendag groot is…

En dit het ook so gebeur. Simeon het dadelik begin om God te prys vir hierdie wonder om die Verlosser van die mensdom te mag vashou, maar bowenal vir die wonder van God met ons! Die Kind wat in Betlehem gebore is, sou uiteindelik groot word en vrede bring. Vrede en oordeel. Oordeel vir diegene wat nie bereid is om sy vredesboodskap te aanvaar nie en Hom verwerp. Maar vrede juis vir diegene wat bereid is om in ’n herstelde verhouding met Hom te staan.

Wanneer ons in hierdie tyd van die jaar op Christus se koms wag, staan ons eintlik halfpad krip toe en halfpad kruis toe. Ons is as’t ware tussenin: in daardie oomblik van die alreeds en die nog nie. Die Lig het gekom, maar moet nog tot die diepste duisternis binne en buite ons deurbreek. Ons sien die lig op die horison en ons wag geduldig op sy koms!

Om waarlik op Christus se koms te wag, is om ons ook voor te berei om Hom in ons lewens te verwag. Om ons stukkende lewens ook voor Hom bloot te lê. Dit is dan dat ons nederig voor daardie krip kniel en ons Koning aanbid, maar dit is met dieselfde nederige harte waarmee ons agter Hom moet aanloop wanneer Hy nie meer net ’n Kindjie is nie.

Ds Quinten Schimper, Krugersdorp/Krugersdorp-Wes

Bible Society of South Africav.4.26.9
VOLG ONS