Bible Society of South Africa
Leesplanne
Dagboek 2021
Dagboek 2021 – 26 Augustus

Dagboek 2021 – 26 Augustus

Tussen twee pole…

Bybelteks(te)

GENESIS 32

22Die nag het hy opgestaan en sy twee vrouens en sy twee persoonlike slavinne en sy elf kinders gevat en deur Jabbokdrif gegaan. 23Nadat hy hulle deur die rivier gevat het, het hy ook alles wat hy besit, laat deurgaan. 24Jakob het alleen daar agtergebly, en 'n man het tot dagbreek met hom gestoei. 25Toe die man agterkom dat hy nie vir Jakob kan wen nie, het die man, terwyl hy met hom stoei, vir Jakob teen die heup geslaan sodat dit uit die potjie gespring het. 26Die man het vir Jakob gesê: “Los my, want die dag breek.”

Jakob het geantwoord: “Ek sal jou net los as jy my seën.”

27Toe vra die man: “Wat is jou naam?” en hy antwoord: “Jakob.”

28Die man het gesê: “Jy sal nie meer Jakob genoem word nie, maar Israel, want jy het teen God en teen mense 'n stryd gevoer en jy het dit end-uit volgehou.”

29Toe sê Jakob: “Sê my tog jou naam,” en die man vra: “Waarom vra jy my naam?”

Hy het vir Jakob net daar geseën, 30en Jakob het die plek Pniël genoem, “want,” het hy gesê, “ek het God van aangesig tot aangesig gesien en tog het ek nie omgekom nie.”

31Net toe Jakob by Pniël verbygaan, het die son opgekom. Jakob het mank gebly aan sy heup, 32en daarom eet die Israeliete tot nou toe nie die senuweebondel wat aan die heup vaskom nie, want die man het vir Jakob teen sy heup geslaan, op die heupsenuwee.

GENESIS 32:22-32AFR83Maak oop in die Bybelleser

Ek kan regtig nie kla oor my skoonma nie. Sy is die vredeliewendste en sagste mens wat ek ken. Sy laat my altyd dink aan dié teks in die bergrede (Matt 5: 9): Geseënd is die vredemakers, want hulle sal kinders van God genoem word. Sy hou nie daarvan as ek haar so noem nie, en vra ek Hoekom nie? sal sy antwoord: Want ek kan party dae so kwaad word vir Pa. En as ek vra Wat doen Ma dan, want ek het Ma nog nooit kwaad gesien nie? kom die antwoord: Dan gaan staan ek in die kombuis en ek vat ’n nat waslap en draai en draai hom todat hy droog is. Die beeld het my baie aan Jakob laat dink.

Jakob is nie die een wat so kwaad word nie, maar hy is in die teks die nat waslap wat gedraai en gedraai word deur sy omstandighede. En so asof dit nie genoeg is nie, kom God te midde van dit alles en baklei letterlik met Jakob, stoei met hom so asof hy nie genoeg probleme het om oor bekommerd te wees nie.

Jakob is tussen twee spanningspole in die teks. Aan die een kant was dit sy oom Laban,en aan die ander kant was dit sy broer, Esau. Hy is werklik by die punt waar hy niks meer kan doen nie. Hoe lyk hy? Soos ’n opgewende waslap – vol spanning. God breek in dié oomblik Jakob se laaste weerstand om hom ’n ander identiteit te gee. Jakob noem die plek Pniël – voor die aangesig van God. Wat gebeur hier? God breek die harde neut van Jakob se identiteit.

Baie kere kom ons spanning nie van God af nie. Tog, wanneer dit vir ons voel asof die spanning tussen die pole groter en groter word, en ons al hoe meer soos die uitgedroogde waslap begin voel, is dit nodig dat ons vir ’n oomblik luister wat God vir ons wil leer oor onsself. Dat Hy sterk word deur ons swakheid.

Dr Hein Delport, Swartkop

Bible Society of South Africav.4.26.9
VOLG ONS