Dagboek 2021 – 23 Maart

Dinsdag was ’n besige dag wat oor drie hoofstukke van die Markus-evangelie strek (11: 27 – 13: 37). Ongeveer twee derdes van die gedeelte bestaan uit konflik met die tempelowerhede en hul verbintenisse. Hoofstuk 13 waarsku oor die vernietiging van die tempel en handel oor die koms van die Seun van die mens, alles gebeure wat in die toekoms sou plaasvind.

Vir ons wat twee duisend jaar later leef, is dit moeilik om die situasie in Jerusalem voluit te beleef. Die Jode en hul tradisie was so gevestig oor jare heen. Hulle het vir die toekoms geleef en het gewag vir die Messias wat sou kom om met groot vertoon en mag die vyande van Israel te oorweldig en die koninkryk van Dawid weer te vestig. Derhalwe is dit begryplik dat die leierpriesters, skrifkenners en familiehoofde ongemaklik is en wil weet hoe dit moontlik is dat Hy dit kan doen en met gesag kan optree en ’n eeue lange tradisie kan aantas. Jesus troef hulle deur te verwys na die doop van Johannes met die vraag: Was dit van die hemel of was dit van mense (vers 30)? Indien hulle sou antwoord dat dit van mense was, sou die skare oproerig raak, en as dit van God was, moes hulle geglo het, wat hulle nie gedoen het nie.

Die toekoms is klaarblyklik kommerwekkend, want Jesus verwys na die indrukwekkende klippe en geboue van die tempelterrein met die voorspelling dat niks behoue sal bly nie omdat alles afgebreek sal word. Die Markus-evangelie skets iets van die toekoms wat oënskynlik met groot spanning en disharmonie gepaard sal gaan. Maar, wie volhard tot die einde toe, sal verlos word.

Terug by Jesus en die tempel, sy tradisie en alles wat daarmee saamgehang het. Hulle het Jesus nie verstaan nie. Die tempel kon Jesus nie hou nie, Hy is groter as hulle en alles wat daarmee saamhang, want Hy is die Here wat deur lyding en kruisiging, en oënskynlik deur die dood, die ruimtes van die tempel sou oorskry, volledig en effektief. Die vraag bly ook hedendaags: Jesus, wie is Jesus vir jou?

Dr Barry van Wyk, Emeritus/Waterberg/Zoutpansberg