Bible Society of South Africa
Leesplanne
Dagboek 2021
Dagboek 2021 – 23 April

Dagboek 2021 – 23 April

Vredemakers

Bybelteks(te)

JOHANNES 20

Jesus verskyn aan sy dissipels

19Daardie Sondagaand was die dissipels bymekaar. Alhoewel die deure gesluit was omdat hulle bang was vir die Jode, het Jesus gekom en tussen hulle gaan staan en vir hulle gesê: “Vrede vir julle!”

20Nadat Hy dit gesê het, wys Hy sy hande en sy sy vir hulle. Die dissipels was baie bly toe hulle die Here sien.

21“Vrede vir julle!” sê Hy weer vir hulle. “Soos die Vader My gestuur het, stuur Ek julle ook.”

22Nadat Hy dit gesê het, blaas Hy oor hulle en sê: “Ontvang die Heilige Gees! 23As julle vir mense hulle sondes vergewe, word dit hulle deur God vergewe; as julle dit nie vergewe nie, word dit nie deur God vergewe nie.”

24Tomas, wat ook Didimus genoem is, een van die twaalf, was nie by die dissipels toe Jesus gekom het nie. 25Die ander dissipels sê toe vir hom: “Ons het die Here gesien!”

Maar hy sê vir hulle: “As ek nie die merke van die spykers in sy hande sien en my vinger in die merke van die spykers steek en my hand in sy sy steek nie, sal ek nooit glo nie.”

Jesus en Tomas

26Ag dae later was Jesus se dissipels weer bymekaar, en Tomas was by hulle. Hoewel die deure gesluit was, het Jesus gekom en tussen hulle gaan staan en gesê: “Vrede vir julle!”

27Daarna sê Hy vir Tomas: “Bring jou vinger hier en kyk na my hande; en bring jou hand en steek hom in my sy; en moenie langer ongelowig wees nie, maar wees gelowig.”

28En Tomas sê vir Hom: “My Here en my God!”

29Toe sê Jesus vir hom: “Glo jy nou omdat jy My sien? Gelukkig is dié wat nie gesien het nie en tog glo.”

30Jesus het nog baie ander wondertekens, wat nie in hierdie boek beskrywe is nie, voor sy dissipels gedoen. 31Maar hierdie wondertekens is beskrywe sodat julle kan glo dat Jesus die Christus is, die Seun van God, en sodat julle deur te glo, in sy Naam die lewe kan hê.

JOHANNES 20:19-31AFR83Maak oop in die Bybelleser

MATTEUS 5

9Geseënd is die vredemakers, want hulle sal kinders van God genoem word.

MATTEUS 5:9AFR83Maak oop in die Bybelleser

Lees ’n mens die Evangelies, is dit opvallend hoedat die begrip vrede soos ’n goue draad daardeur loop. Jesus se eerste preek gaan daaroor, sy hele bediening gaan oor vrede, so ook sy eerste woorde na sy opstanding. Kyk ons egter na die wêreld om Hom, is vrede nêrens te bespeur nie. Vat byvoorbeeld die kruisgebeure. Jesus sterf ’n gewelddadige dood. En later ook sy dissipels. Hy groet hulle met: Vrede vir julle. Volgens oorlewering sterf elkeen van hulle egter ’n marteldood in die een of ander vorm.

Kyk ’n mens na die wêreld waarin ons lewe, sien ons ook maar min van vrede. Wat jy sien, is stryd, konflik en oorlog. Onvrede het, hoe jammer ook al, kenmerkend van ons land geword. In plaas van vrede, is daar onrus, opstande en geweld. En so dikwels is onvrede ook kenmerkend van ons eie verhoudings, ons huwelike, gesinne, families, en hoe hartseer ook al dikwels ook van die kerk.

Waar is die vrede waarvan Jesus praat? Johannes 14: 27 gee vir ons die sleutel. Jesus sê die vrede wat Hy bring, verskil van die aardse vrede wat die Jode verwag het en wat die mens dikwels idealiseer. Die vrede wat Jesus bring, is vrede tussen God en mens. Sonde het disharmonie, onvrede gebring tussen God en mens en tussen mense. Op Golgota bring God versoening tussen Hom en ons. Ons kry daaraan deel sonder dat ons dit verdien. Dit is God se genadegeskenk. Op grond daarvan is daar is nou vrede tussen God en ons en kan daar vrede in ons gemoed wees. Daarom kan dit nie anders nie, ons moet nou daardie vrede leef deur vredemakers te wees.

Om God se vrede te leef, begin by jou! Jy moet nou daardie vrede leef, in jou eie huis – trouens, in elke verhouding waarin jy betrokke is. En dis belangrik, want Jesus het gesê: Waar gelowiges as vredemakers leef, sal God en ook die wêreld hul kinders van die hemelse Vader noem, en so word God verheerlik.

Dr Christo van der Merwe, Emeritus

Bible Society of South Africav.4.26.9
VOLG ONS