Bible Society of South Africa
Leesplanne
Dagboek 2021
Dagboek 2021 – 20 Junie

Dagboek 2021 – 20 Junie

Verterende liefde

Bybelteks(te)

JOHANNES 2

Die reiniging van die tempel

13Die paasfees van die Jode was naby, en Jesus het daarvoor na Jerusalem toe gegaan. 14Op die tempelplein het Hy die verkopers van beeste, skape en duiwe gekry en die geldwisselaars wat daar sit. 15Toe het Hy met toutjies 'n sweep gemaak en almal uit die tempel uitgejaag, ook die skape en die beeste. Die geld van die geldwisselaars het Hy op die grond gegooi en hulle tafels omgekeer. 16Vir die mense wat die duiwe verkoop het, het Hy gesê: “Vat hierdie goed hier weg! Moenie die huis van my Vader 'n besigheidsplek maak nie.”

17Toe het sy dissipels daaraan gedink dat daar geskrywe staan: “Die liefde vir u huis verteer my.”

18Maar die Jode het Hom aangespreek en vir Hom gesê: “Met watter wonderteken kan u vir ons bewys dat u hierdie dinge mag doen?”

19Jesus het hulle geantwoord: “Breek hierdie tempel af en in drie dae sal Ek hom oprig.”

20Die Jode sê toe: “Ses en veertig jaar lank is daar aan hierdie tempel gebou, en u sal hom in drie dae oprig?”

21Met “hierdie tempel” het Hy egter sy liggaam bedoel. 22Later, nadat Hy uit die dood opgewek is, het sy dissipels daaraan gedink dat Hy dit gesê het, en hulle het die Skrif en die woorde van Jesus geglo.

Jesus ken die mens

23Terwyl Jesus vir die viering van die paasfees in Jerusalem was, het daar baie mense tot geloof in Hom gekom toe hulle die wondertekens sien wat Hy doen. 24Maar Hy het Hom nie op hulle verlaat nie, omdat Hy geweet het hoe hulle almal is. 25Hy het nie nodig gehad dat iemand Hom iets van 'n mens vertel nie, want Hy het self geweet hoe mense is.

JOHANNES 2:13-25AFR83Maak oop in die Bybelleser

As Jesus die tempelplein binnestap, vind Hy ’n geroesemoes van pelgrims wat geld ruil en kibbel oor die koers; offerdiere wat opgeveil word en onderhandelings oor die prys; skape wat blêr, beeste wat bulk, duiwe wat fladder en koer in die hokke. Hy kyk na die tempelgebou self – die geweldige marmerpilare; die kapitele met uitbeeldings van die heilige kandelaar met sy sewe arms; baniere met aanhalings in Hebreeuse letters; tempelwagte wat oral rondstaan om orde te handhaaf.

Wat sien Jesus? Hy sien die inkongruensie – dáár die manjifieke, statige tempel, die huis van God, simbool van God se teenwoordigheid by en heerskappy oor die volk. Hier rondom Hom ’n raserige handeldrywery – gierige oë, gulsige hande. Kan dit wat hier afspeel, enigiets te doen hê met dit waarvan die tempel ’n simbool is? Daar moet iets groot fout wees as mense deur sulke transaksies moet gaan om by God uit te kom.

Jesus voel ’n heilige ontsteltenis. Hy verjaag die handelaars en geldwisselaars met hul skape, beeste en duiwe. Hy keer die tafels om en gooi die geld op die grond. En Hy skreeu: Moenie die huis van my Vader ’n besigheidsplek maak nie.

Om God te eer en te dien, is nie ’n transaksie nie. Dit is ’n geestelike ontmoeting waar die mens voor God buig in dankbare erkenning vir sy liefde en genade. Dit is lofprysing. Dit is stil word voor die aangesig van die Almagtige. En dit vra eerbied vir die simbole wat heenwys na God – sy tempel, sy Woord, sy lied. Die dissipels dink onwillekeurig aan die woorde van Dawid in Psalm 69: 10 – die liefde vir u huis verteer my. Jesus se drastiese optrede spruit uit sy liefde vir sy Vader.

Hoe dink ons oor God en sy simbole soos die Bybel, die kerk, barmhartigheidswerk? Kan jy soos Dawid sê die liefde vir u huis verteer my? Kan jy Jesus se verontwaardiging aanvoel as Hy die oppervlakkigheid daar by die tempel raaksien? Deel jy dit? Mag daardie liefde vir God en sy simbole in elkeen van ons sigbaar word.

Dr Piet van Staden, Emeritus/Stellenbosch/Worcester

Bible Society of South Africav.4.26.9
VOLG ONS