Bible Society of South Africa
Leesplanne
Dagboek 2021
Dagboek 2021 – 20 Augustus

Dagboek 2021 – 20 Augustus

Wat doen ek met bekommernis?

Bybelteks(te)

MATTEUS 6

Die sorge van die lewe

25“Daarom sê Ek vir julle: Moet julle nie bekommer oor julle lewe, oor wat julle moet eet of drink nie, of oor julle liggaam, oor wat julle moet aantrek nie. Is die lewe nie belangriker as kos en die liggaam as klere nie? 26Kyk na die wilde voëls: hulle saai nie en hulle oes nie en hulle maak nie in skure bymekaar nie; julle hemelse Vader sorg vir hulle. Is julle nie baie meer werd as hulle nie? 27Trouens, wie van julle kan deur hom te bekommer sy lewe met een enkele uur verleng? 28En wat bekommer julle julle oor klere? Let op hoe groei die veldlelies: hulle swoeg nie en hulle maak nie klere nie. 29Maar Ek sê vir julle: Selfs Salomo in al sy prag was nie geklee soos een van hulle nie. 30As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?

31“Julle moet julle dus nie bekommer en vra: ‘Wat moet ons eet of wat moet ons drink of wat moet ons aantrek?’ nie. 32Dit is alles dinge waaroor die ongelowiges begaan is. Julle hemelse Vader weet tog dat julle dit alles nodig het. 33Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee.

34“Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.”

MATTEUS 6:25-34AFR83Maak oop in die Bybelleser

Bekommernis is heeltyd deel van ons lewens. Wel, vandag in hierdie kort Bybelstudie of boodskap wil ek vra: Wat doen jy met die bekommernis in jou lewe?

In Matteus 6: 25-34 herhaal Jesus drie keer hierdie opdrag: Moenie bekommerd wees nie. Dis die reël. Daar is ’n verwagting om nie bekommerd te wees nie. En dan gee Jesus drie redes waarom ons hierdie bekommernis-aksie in ons lewe kan stop.

Hy is die Meester. Hy is in beheer van alles. In hierdie selfde hoofstuk sien ons dat Jesus die dissipels leer van vertroue. Moenie skatte op die aarde bymekaarmaak nie, en ons kan nie twee Meesters, vir Mammon en vir God, aanbid nie. Ek dink bekommernis neem toe wanneer ook ons nie kan bely dat Hy in beheer is nie. Ons moet weer vertrou.

Ons leer ook Hy is die Vader. Kyk veral na vers 26. Kyk na die voëls in die lug. Hoe sorg Hy nie vir hulle nie. My vrou het die geneigdheid om die gordyne oop te trek en ’n voëltjie te soek. Dit het nog altyd vir haar die teenwoordigheid van God voorgestel. Die teks leer ons dat as God so sorg vir die voëltjies in die lug, hoeveel te meer sorg Hy nie vir ons nie?

Ons toekoms is veilig in sy hande. Ons gaan nie ’n dag byvoeg by ons lewens deur bekommerd te wees nie.

Moenie dat die teenwoordige lamgelê word deur die vrese vir môre nie. Ek dink die beginsel is: Moenie bekommerd wees nie! En die antwoord op die vraag hóé, is bly besig!

Hoe kan ons in hierdie tyd besig bly? Bid! In dieselfde hoofstuk gee Jesus vir ons ’n model vir wanneer ons bid. Hou aan bid. God is besig in jou lewe. Kom ons hou moed! Trek die gordyne oop en sien hoedat die voëls nie uitskree in hopeloosheid nie. Nee, hulle roep eerder uit in sang: Ons God is in beheer! En Hy hou ons in sy hand.

Dr Hein Delport, Swartkop

Bible Society of South Africav.4.26.9
VOLG ONS