Bible Society of South Africa
Leesplanne
Dagboek 2021
Dagboek 2021 – 2 Oktober

Dagboek 2021 – 2 Oktober

Die nuwe glans

Bybelteks(te)

2 KORINTIËRS 3

7Die wet wat in letters op klip gegraveer is, het in heerlikheid gekom. Hierdie heerlikheid, wat tog gou sou verdwyn, het op die gesig van Moses so geskitter dat die Israeliete nie na hom kon bly kyk nie. As die bediening wat tot die dood lei, met soveel heerlikheid gekom het, 8hoeveel groter sal die heerlikheid van die bediening wat deur die Gees geskied, dan nie wees nie? 9Die bediening waardeur die mense veroordeel word, het met heerlikheid gekom, maar die bediening waardeur die mense vrygespreek word, oortref dit verreweg in heerlikheid. 10Ons kan sê dat die heerlikheid van vroeër nie te vergelyk is met die alles oortreffende heerlikheid van nou nie. 11As wat aan die verbygaan was, van heerlikheid gestraal het, veel meer nog sal die blywende van heerlikheid skitter.

12Omdat ons hoop hierop gevestig is, tree ons met groot vrymoedigheid op. 13Ons is nie soos Moses wat sy gesig met 'n sluier toegemaak het nie. Dit moes hy doen om te verhinder dat die volk van Israel sou sien dat die ligglans aan die verdwyn was. 14Hulle verstand was ook toe, en vandag nog bly hulle verstand met dieselfde sluier toegemaak as hulle die Ou Testament lees, maar die sluier word deur Christus weggeneem vir iemand wat in Hom glo. 15Maar vandag nog, elke keer as die wet van Moses voorgelees word, is daar 'n sluier oor hulle verstand. 16Van Moses sê die Skrif egter: “Elke keer as hy hom na die Here wend, word die sluier weggeneem.” 17“Die Here” beteken hier “die Gees”, en waar die Gees van die Here is, is daar vryheid. 18Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is.

2 KORINTIËRS 3:7-18AFR83Maak oop in die Bybelleser

Wanneer God kontak maak met mense, gebeur die onbegryplike. So was dit met die ontmoeting met Moses op die berg toe hy die wet ontvang het. Toe hy teruggekom het by die volk, het sy gesig geskitter met ’n verblindende glans, wat die teken was dat hy die heerlikheid van God weerspieël het, dat hy kontak met ‘n ander wêreld gehad het. Hy het sy gesig met ’n sluier bedek (Eks 34:33). Die sluier het verhinder dat die volk die heerlikheid van God direk kon sien. Volgens Paulus het dit ook ten doel gehad om weg te steek dat die glans met verloop van tyd minder geword en naderhand verdwyn het. Daardie bedekking was dus die aanduiding dat die verbond met Moses tydelik was, voorlopig, ’n belofte van die ware, finale ontmoeting met God wat later sou kom.

Met die nuwe verbond wanneer daar deur die Gees van God op die harte van mense geskryf word, is dit anders: Daar bestaan nie meer ’n sluier nie. Die glans van God se heerlikheid hoef nie meer verbloem te word nie; dit is daar vir almal om te sien en dit verdwyn nie. Immers waar die goeie nuus van vryspraak in mense se harte tuisgekom het, kom verstommende verandering en word die heerlikheid van die Here weerspieël. Gewone mense word al meer aan die beeld van Christus gelyk.

Is daar dalk nog by jou ’n sluier wat behels dat jy die Bybel lees en nie die glans van God se goedheid so raaksien dat dit jou bly verander nie? Is daar dalk ’n sluier wat veroorsaak dat jy nie die heerlikheid van God in jou lewe weerspieël nie? Kan van jou gesê word dat jy die beeld van Christus vertoon, deurdat jy sy geduld, sy vermoë om te vergewe en nie te veroordeel nie, wys? Jy is ook deel van die nuwe verbond waarvan die glans nie verdwyn nie en wat van jou ook ’n brief van Christus maak wat leesbaar is vir almal om jou.

Dr Piet (PJ) van Staden, Emeritus

Bible Society of South Africav.4.26.9
VOLG ONS