Bible Society of South Africa
Leesplanne
Dagboek 2021
Dagboek 2021 – 2 April

Dagboek 2021 – 2 April

Spot met ’n magtelose

Bybelteks(te)

MATTEUS 27

Die soldate bespot Jesus

27Daarna vat die soldate van die goewerneur vir Jesus in die ampswoning in en bring die hele leërafdeling rondom Hom bymekaar. 28Hulle trek toe sy klere uit en gooi Hom 'n pers mantel om. 29Hulle vleg 'n doringkroon en sit dit op sy kop en gee Hom 'n stok in sy regterhand. Toe bespot hulle Hom deur voor Hom te buig en te sê: “Ons groet u, Koning van die Jode!” 30Hulle het op Hom gespoeg en die stok gevat en Hom oor die kop geslaan. 31Nadat hulle Hom klaar bespot het, het hulle die mantel uitgetrek en weer sy eie klere vir Hom aangetrek. Toe lei hulle Hom weg om Hom te kruisig.

Jesus word gekruisig

32Toe hulle uitgaan, kry hulle 'n man van Sirene met die naam Simon, en hulle het hom gekommandeer om Jesus se kruis te dra. 33Hulle kom toe by 'n plek wat Golgota genoem word; dit beteken Kopbeenplek. 34Daar het hulle Hom 'n mengsel van wyn en gal gegee om te drink, maar toe Hy dit proe, wou Hy dit nie drink nie.

35Hulle het Hom gekruisig en sy klere verdeel deur te loot. 36Daarna het hulle gaan sit en by Hom wag gehou.

37Bokant sy kop het hulle die aanklag teen Hom in skrif aangegee: “Dit is Jesus, die koning van die Jode.” 38Saam met Hom het hulle ook twee rowers gekruisig, een regs en die ander een links van Hom.

39Die mense wat daar verbygeloop het, het Jesus gelaster. Hulle het die kop geskud 40en gesê: “Jy wat die tempel afbreek en in drie dae opbou! Red jouself as jy die Seun van God is, en kom van die kruis af!”

41Net so het die priesterhoofde saam met die skrifgeleerdes en die familiehoofde ook gespot en gesê: 42“Ander het hy gered, maar homself kan hy nie red nie. Hy is mos die koning van Israel! Laat hy nou van die kruis afkom en ons sal in hom glo. 43Hy het op God vertrou; laat God hom nou red as Hy dan behae in hom het. Hy het immers gesê hy is die Seun van God!”

44Op dieselfde manier het die rowers wat saam met Hom gekruisig is, Hom ook beledig.

MATTEUS 27:27-44AFR83Maak oop in die Bybelleser

Op Goeie Vrydag fokus ons gewoonlik op Jesus se sterwe, want dit hou vir ons soveel betekenis in. Maar sy sterwe is voorafgegaan deur intense lyding, bowenal intense vernedering. Nadat Jesus deur die skare verwerp en deur die Romeinse goewerneur Pilatus ter dood veroordeel is, word Hy aan soldate oorgegee. Hulle slaan Hom met swepe en gebruik die geleentheid om met Hom te spot. Hulle trek vir Hom ’n pers mantel aan, stamp ’n kamtige kroon van doringtakke op sy kop, en stop ’n stok in sy hand. Hulle koggel Hom, spoeg en slaan Hom.

By die kruis slaan hulle ’n spottende bordjie bokant sy kop vas wat lees: Dit is Jesus, die koning van die Jode. Die verbygangers en die Joodse leiers sluit daarby aan: Hy is mos die koning van Israel! Laat hy nou van die kruis afkom en ons sal in hom glo. Ja, selfs die twee rowers saam met Hom spot Hom. Die wêreld spot nou al twee duisend jaar met Hom. Die Seun van die Almagtige? So magteloos? Nee wat, nie vir my nie! En die wêreld spot met die mense wat in Hom glo: Naïef! Vroom! Skynheilig!

Hoekom laat God mense van die begin van die skepping af toe om teen Hom te kies? Omdat Hy ons só geleentheid gee om vír Hom te kies. Hy maak Homself weerloos, omdat Hy ons steeds op ons lewenspad begelei en nooit die werk van sy hande laat vaar nie. Omdat Hy weet dat Hy uiteindelik óns opstandigheid in die opstanding van sy Seun oorkom het. Wanneer mense ons skeef aankyk of meerderwaardig afmaak omdat ons glo, moet dit ons nie ontmoedig nie. Wanneer mense vuur spoeg teen die Here of sy kerk, moet ons nie oordeel nie. Nog minder met ’n vloek antwoord.

Jesus het nie sy spotters geantwoord nie. God het hulle geantwoord… op Opstandingsondag. Net so antwoord God die spotters van ons dag mettertyd. Terwyl Hy die tussentyd as genadetyd gebruik totdat elke tong erken: Jesus Christus is Here! (Fil 2:11).

Dr Wouter van Wyk, Sinodaal

Bible Society of South Africav.4.26.9
VOLG ONS