Bible Society of South Africa
Leesplanne
Dagboek 2021
Dagboek 2021 – 14 April

Dagboek 2021 – 14 April

Glo of gefop?

Bybelteks(te)

LUKAS 1

'n Woord aan Teofilus

1Hooggeagte Teofilus!

Daar is baie wat onderneem het om 'n verhaal te skrywe van die dinge wat onder ons gebeur het. 2Hulle het dit opgeteken soos dit aan ons oorgelewer is deur die mense wat van die begin af ooggetuies en dienaars van die Woord was. 3Daarom het ek dit ook goedgedink om self alles stap vir stap van voor af te ondersoek en die verhaal noukeurig in die regte volgorde vir u neer te skryf. 4So kan u te wete kom dat die dinge waaroor u onderrig is, heeltemal betroubaar is.

LUKAS 1:1-4AFR83Maak oop in die Bybelleser

HANDELINGE 1

Die belofte van die Heilige Gees

1My eerste boek, Teofilus, het ek geskrywe oor alles wat Jesus gedoen en geleer het, van die begin af 2tot op die dag van sy hemelvaart. Voordat Hy in die hemel opgeneem is, het Hy deur die Heilige Gees bevele gegee aan die manne wat Hy as apostels uitgekies het. 3Ná sy dood het Hy aan hulle met baie onbetwisbare bewyse ook getoon dat Hy lewe. In die loop van veertig dae het Hy by verskeie geleenthede aan hulle verskyn en met hulle oor die dinge van die koninkryk van God gepraat.

HANDELINGE 1:1-3AFR83Maak oop in die Bybelleser

Lukas is ’n “joernalis”, en hy het ’n agenda: Teofilus moet sy feite kan vertrou; ooggetuies en Godsmense is sy bron; en Lukas glo self. Jy wat dit lees, so hoop Lukas, sal ook glo Jesus is die Here, en God liefkry.

Lukas skryf geen biografie van Jesus nie: Lukas vertel hoedat God mense in Jesus geleer glo het. Lukas versamel vertellings en herinneringe, skryf woord vir woord oor wat in ander boeke staan (niemand het kopiereg op God nie), rangskik sy feite anders en lewer daarop sy eie kommentaar. Lukas is nie objektief nie: Hy sê hoekom hý glo, en hy vertel die storie van gelowiges. Die tegniese term vir só ’n geskrif is evangelie. Dit sê: Glo in Jesus Christus: Hy is God. Is hierdie evangelie die geloof werd?

Geloof is ’n gawe wat God jou gee wat jy soms wens God het liefs nie. Dis taai. Dat Jesus die Here is, uit die dood uit opgestaan het en lewe, is ’n ongerieflike, moeilike waarheid om te sluk. Media waarmee jy saamstem, is van alle media dié gevaarlikste. Want dan is jy nie meer bedag op hoe jy mislei word nie. En ek is ook nie sonder agenda nie. Ek het júis ’n agenda: Dis ook mý doel dat jy moet glo. Ek is self al te veel gefop om soetkoek te eet. Ek het ’n gesonde agterdog, oor alles. Daarom verstaan ek: Jy ook! Jy kan van kerk tot kerk gaan tot jy die dominee kry wat preek net wat jy wil hoor. Maar dis vir die waarheid dat jy op soek moet gaan, nie musiek vir jou ore nie.

Media- en godsdiensvryheid ís kosbaar, maar nie omdat joernaliste of jobstroosters die waarheid praat nie. Jesus, sy apostels, die Doper en die profete, is almal dood oor die waarheid wat hulle gepraat het: Jesus het opgestaan. Dis die toets; wat jy van Jesus Christus sê en die prys wat jy bereid is om daarvoor betaal.

Ds Hennie la Grange, Kampersrus

Bible Society of South Africav.4.26.9
VOLG ONS