Bible Society of South Africa
Leesplanne
Dagboek 2021
Dagboek 2021 – 12 September

Dagboek 2021 – 12 September

Wie is hierdie mense se God?

Bybelteks(te)

JEREMIA 41

1Ismael seun van Netanja, seun van Elisama, was uit die koninklike geslag en was een van die hoofamptenare van koning Sedekia. Hy en tien man het in die sewende maand na Gedalja seun van Agikam toe gekom in Mispa, en terwyl hulle daar saam geëet het, 2het Ismael seun van Netanja en die tien man wat by hom was, opgespring en vir Gedalja seun van Agikam, seun van Safan, doodgemaak. Gedalja was die man wat deur die koning van Babel in bevel van die land geplaas is. 3Ismael het ook al die Judeërs wat by Gedalja in Mispa was en die Galdese soldate wat daar was, doodgemaak.

Nog moorde deur Ismael

4Die dag ná die moord op Gedalja, toe niemand nog daarvan wis nie, 5kom daar tagtig mans uit Sigem, Silo en Samaria aan. Hulle baarde was afgeskeer, hulle klere geskeur en hulle was vol wonde wat hulle hulleself toegedien het. Hulle het graanoffers en wierook by hulle gehad wat hulle na die huis van die Here toe wou bring. 6Ismael seun van Netanja het hulle huil-huil uit Mispa tegemoet gegaan, en toe hy by hulle kom, sê hy vir hulle: “Kom saam na Gedalja seun van Agikam toe!”

7Maar toe hulle binne in die stad is, het Ismael seun van Netanja, hy en die manne wat by hom was, sewentig van die mans doodgemaak en in 'n put gegooi. 8Die ander tien mans het vir Ismael gesê: “Moet ons nie doodmaak nie, ons het koring en gars en olie en heuning wat in die veld weggesteek is!”

Hy het hulle toe laat staan en hulle nie saam met hulle vriende doodgemaak nie. 9Die put waarin Ismael die lyke gegooi het van die mans wat hy doodgemaak het, was dié een wat deur koning Asa gegrawe is toe hy deur koning Baesa van Israel beleër is. Ismael seun van Netanja het die put vol lyke gemaak.

JEREMIA 41:1-9AFR83Maak oop in die Bybelleser

Wie is die 80 mans wat hul offers na die huis van die Here bring? Levitikus 19:27-28 sê uitdruklik: Julle mag nie heidense rougebruike navolg deur die hare voor die ore en die wangbaard te knip of deur snye en tatoeëermerke op julle liggame te maak nie. Ek is die Here Hierdie 80 mans met afgeskeerde baarde en self-toegediende wonde kan sekerlik nie van plan wees om offers na die huis van die Here wat dít sê, te neem nie. Hul gebruike dui eerder aan dat hulle aanbidders van Baäl of Astarte is.

Om die baard te skeer of tatoeëermerke te kry, is nie inherent sondig nie, maar in die antieke wêreld wys sulke gebruike heen na die God of gode wat deur die persoon aanbid word. Daarom verbied die wet van Moses daardie en soortgelyke dinge. Die God van Abraham mag as gevolg van sy mense se gebruike met die natuurgode van die heidene verwar word nie.

Vandag sal ʼn baard en/of tatoeëermerk, of die afwesigheid daarvan, nie as ’n godsdienstige gebruik herken word nie. Tog is daar gebruike wat na die God van die Christene heenwys of nie. God was byvoorbeeld die voete van sy ondergeskiktes, en daarom wys nederigheid en diensbaarheid na Hom heen. Mense wat kelners uittrap oor ’n vuil tafel of ’n kassiere berispe omdat daar winkeltrollies oral rondstaan, kan sekerlik nie volgelinge van daardie God wees nie. Hul gebruike dui eerder daarop dat hulle ’n hoogmoedige god aanbid wat slegs diens verwag.

Mense wat in nederigheid self die tafel afvee of die trollies wegstoot, kan herken word as mense wat hul offers na die huis van God bring en wat nederig onder sy mense dien. Ons besoeke aan die huis van die Here sê minder oor ons God, as die gebruike wat ons op die pad na daardie huis beoefen.

Ds Gerrit-Daan van der Merwe, Strand

Bible Society of South Africav.4.26.9
VOLG ONS