Bybelleesrooster – Dag 264

₂₀“Al is my saak reg, my woorde sou my skuldig maak;

al is ek ook onskuldig, ek sou oor my woorde veroordeel word.

₂₁Ek ís onskuldig!

Ek gee nie meer om vir my lewe nie,

ek wil nie meer lewe nie.

₂₂Eintlik is dit om 't ewe, daarom dink ek:

of 'n mens skuldig is of onskuldig, God vernietig jou tog.

₂₃As 'n vloedramp skielik die dood bring,

lag God oor die wanhoop van die onskuldiges.

₂₄Hy gee die wêreld oor in die mag van die goddelose,

en Hy maak die regters partydig.

As dit nie Hy is wat dit doen nie, wie dan?

₂₅My dae skiet vinniger as 'n naelloper verby,

hulle vlieg verby sonder dat ek iets goeds beleef,

₂₆hulle gaan vinnig by my verby soos papirusbote,

soos 'n arend wat afskiet op sy prooi.

₂₇“As ek sou dink: ek wil ophou kla,

ek wil my houding verander en vrolik wees,

₂₈dan word ek bang dat ek nog swaarder sal kry,

omdat ek weet dat God my nie

onskuldig gaan bevind nie.

₂₉Aangesien ek tóg skuldig bevind sal word,

waarom sou ek my moeg maak?

₃₀Al sou ek my was met sneeu,

al sou ek my hande skoon was met seep,

₃₁God sou my weer in 'n modderpoel gooi,

sodat my klere my tot 'n aanstoot maak.

₃₂Hy is nie 'n mens soos ek

dat ek op sy vrae sou kon antwoord nie,

dat ons in 'n hofsaak teen mekaar betrokke sou kon raak nie.

₃₃As daar maar iemand was

wat in die saak tussen ons kon oordeel,

wat oor ons albei onpartydig kon regspreek,

₃₄as daar maar iemand was

wat God se straf van my kon wegneem,

sodat sy verskrikking my nie skielik oorval nie,

₃₅dan sou ek sonder vrees kon praat.

Maar soos sake nou met my staan, kan ek nie.”

₁“My hele lewe walg my,

daarom wil ek aan my klag vrye teuels gee

en in my bitterheid praat.

₂Ek wil vir God sê: Moet my tog nie skuldig verklaar nie,

maak aan my bekend waarom voer U hierdie stryd teen my.

₃Vind U dit goed om my te laat swaar kry,

om wat U gemaak het, met veragting te behandel,

maar die planne van die goddeloses met sukses te bekroon?

₄Kyk U met die oë van 'n mens?

Sien U dinge soos 'n mens hulle sien?

₅Gaan u dae verby soos dié van 'n mens,

u jare soos sý jare,

₆dat U rekenskap eis vir my oortredinge,

dat U verantwoording vra vir my sonde?

₇“U weet dat ek nie skuldig is nie,

maar niemand kan my uit u hand red nie.

₈U hande het my gevorm, my gemaak.

Gaan U my nou heeltemal vernietig?

₉Dink daaraan dat U my soos klei gevorm het.

Gaan U my nou weer stof laat word?

₁₀Het U my nie soos botter berei,

soos kaas gevorm nie?

₁₁U het vir my vel en vleis gegee,

U het my bene en senings aanmekaargeweef.

₁₂U het my die lewe gegee en my met liefde versorg,

met sorg het U oor my gewaak.

₁₃Maar wat deur U verberg is,

wat ek weet U in gedagte gehad het, is dit:

₁₄as ek sonde doen, sou U dit raaksien,

van my oortredinge sou U my nie vryspreek nie.

₁₅As ek skuldig is, wag daar ellende vir my,

as ek onskuldig is, is daar vir my geen vreugde nie,

want ek is oorlaai met smaad en ek beleef net ellende.

₁₆Sou ek moed skep, maak U soos 'n leeu jag op my

en staan U my weer voor in u onbegryplike mag.

₁₇U roep nuwe getuies in teen my,

u woede laai op teen my;

aanslag op aanslag tref my.

₁₈“Waarom het U my in die wêreld laat kom?

Ek moes liewer gesterf het voordat 'n oog my kon sien.

₁₉Dan sou ek gewees het asof ek nooit bestaan het nie

en is ek by geboorte al graf toe gedra.

₂₀My lewensdae is min genoeg,

laat my tog met rus dat ek darem 'n bietjie vreugde kan hê

₂₁voordat ek weggaan na die stikdonker land toe

en nooit terugkeer nie,

₂₂na die land van die donker nag met sy diep duisternis

waar niks georden is nie, waar die lig self donker is.”

₂“Moet al die baie woorde onbeantwoord bly?

Kan 'n mens homself met praat regverdig?

₃Moet mense stilbly vir jou praatjies?

Wil jy bly laster sonder dat iemand jou bestraf?

₄Jy sê vir God: ‘Wat ek dink, is reg,

ek is onskuldig voor U.’

₅As God maar wou begin praat

en jou wou weerspreek,

₆jou wou vertel hoe ingewikkeld die wysheid is,

en hoeveel dit vra om iets blywends tot stand te bring!

Dan sou jy weet dat God jou nog nie eers vir ál jou sondes straf nie.

₇“Kan jy begryp wie God werklik is?

Kan jy die Almagtige ten volle verstaan?

₈Dit is kennis wat hoër is as die hemele.

Hoe kan jý daarby uitkom?

Dit is kennis wat dieper is as die doderyk.

Hoe kan jy dit bereik?

₉Dit strek verder as die aarde,

wyer as die see.

₁₀“As God in die verbygaan iemand gevange neem

en voor die gereg bring, wie sal Hom keer?

₁₁God ken skynheilige mense,

Hy sien die sonde raak, sonder nader ondersoek.

₁₂'n Idioot kan nie verstand kry nie,

net so min as wat 'n wildedonkievul 'n mens is as hy gebore word.

₁₃Maar jy, as jy jou verstand reg wil gebruik

en jou hande in gebed na God toe uitsteek,

₁₄as jy jou sonde van jou af sou verwyder

en nie toelaat dat onreg in jou woon nie,

₁₅kan jy jou kop sonder skaamte oplig

en in die nood kom sonder om bang te wees,

₁₆kan jy jou swaarkry vergeet

en daaraan dink asof dit water is wat weggeloop het.

₁₇Jou lewe sal meer lig hê as die helder middag,

jou donker sal lig word soos die môre.

₁₈Jy sal gerus wees omdat daar vir jou vooruitsigte is,

jy sal jou lêplek regmaak en rustig slaap.

₁₉Jy sal gaan lê en vir niemand bang wees nie,

en baie mense sal jou guns soek.

₂₀Maar die oë van die goddeloses sal toegaan,

daar is geen uitkoms vir hulle nie:

al vooruitsig wat hulle het, is om die laaste asem uit te blaas.”

₂“Werklik, julle is die enigste mense wat iets weet!

Met julle sterf die wysheid uit!

₃Ek het ook verstand, net soos julle,

ek staan nie vir julle terug nie.

Wie weet nie al dié dinge nie?

₄“Ek is 'n grap vir my vriende,

en dít iemand wat tot God roep en van Hom antwoord kry.

'n Regverdige, 'n vrome wat 'n grap is!

₅Vir dié wat geen kommer ken nie,

pas ongeluk en smaad bymekaar,

by dié wat struikel, pas 'n skop.

₆In die huise van die rowers is daar rus,

en dié wat God se toorn verwek, is veilig,

dié wat meen dat hulle vir God in hulle mag het.

₇“Miskien moet jy die diere vra om jou te leer,

die voëls daarbo om jou te vertel,

₈of praat met die aarde dat dit jou leer

en met die visse in die see dat hulle dit vir jou sê.

₉Wie van hulle weet nie almal

dat die hand van die Here alles gemaak het nie?

₁₀Hy het al wat lewe, in sy mag,

die asem van elke mens.

₁₁Moet die oor nie woorde toets

soos die verhemelte kos proe nie?

₁₂“Wysheid kom in die gryse ouderdom

en insig na baie jare.

₁₃By God is wysheid en krag,

by Hom is raad en insig.

₁₄As Hy afbreek, kan niemand opbou nie,

as Hy gevange neem, kan niemand vrylaat nie.

₁₅As Hy die water terughou, verdroog alles,

as Hy dit laat losbreek, vernietig dit die aarde.

₁₆By Hom is daar mag en oorwinning,

wie bedrieg en wie bedrieg word, is albei Syne.

₁₇Hy laat raadgewers van konings kaalvoet loop

en maak van regeerders gekke.

₁₈Hy vernietig die gesag van konings

en laat hulle slaweklere dra.

₁₉Hy laat priesters kaalvoet loop

en laat dié wat die mag het, ondergaan.

₂₀Hy laat die betroubares swyg

en verydel die goeie raad van leiers.

₂₁Hy laat smaad afkom op die koppe van die vernames

en Hy neem die mag van sterkes weg.

₂₂Hy gee lig in donker dieptes,

Hy maak donker plekke lig.

₂₃Hy maak nasies groot en Hy vernietig hulle,

Hy laat nasies uitbrei en laat hulle tot niet gaan.

₂₄Hy ontneem wêreldleiers hulle verstand

en laat hulle ronddwaal in 'n wilde wêreld sonder pad.

₂₅Hulle tas in die donker rond sonder lig,

Hy laat hulle ronddwaal soos dronkmense.

₁Ek het dit alles met my eie oë gesien

en met my eie ore gehoor en ek het dit verstaan.

₂Wat julle weet, weet ek ook,

ek staan nie vir julle terug nie.

₃Maar ek wil eintlik met die Almagtige praat,

ek wil my saak aan God stel.

₄Julle stapel die een leuen op die ander,

julle is kwaksalwers, julle almal.

₅As julle maar liewer net wou stilbly,

sou dit vir julle tot wysheid gereken kon word.

₆“Luister na my kant van die saak,

neem my argumente in ag:

₇Wil julle vir God intree met onreg

en sy saak bepleit met leuens?

₈Wil julle vir Hom partydig wees?

Wil julle God se saak verdedig?

₉As Hy julle sou ondersoek,

sou dit vir julle goed verloop?

Sou julle Hom kon bedrieg soos julle mense bedrieg?

₁₀Hy sal julle swaar straf

as julle in die geheim partydig is.

₁₁Sy verhewe mag sal julle met skrik vervul,

skrik vir Hom sal julle oorval.

₁₂Julle beroep op die voorgeslag is wind,

julle verweer sê niks.”

₁₃“Bly liewer stil, ek wil praat,

en laat dan kom wat wil.

₁₄Waarom waag ek my lewe

en neem ek dit in my hand?

₁₅Al sou God my doodmaak, ek kan nie wag nie,

ek moet my saak vir Hom stel.

₁₆Dit kan selfs my redding wees,

want geen godlose durf voor Hom kom nie.

₁₇Luister goed na my woorde, neem ter harte wat ek te sê het:

₁₈Kyk, ek het my regsaak voorberei,

ek weet dat ek reg het.

₁₉As iemand 'n saak teen my het,

sou ek swyg en sterf.

₂₀U, my God, moet net twee dinge vir my doen,

dan sal ek nie vir U wegkruip nie:

₂₁neem u straf van my af weg

en moenie dat die skrik vir U my oorval nie.

₂₂“Roep my, en ek sal antwoord,

of anders, laat ék praat en antwoord Ú my:

₂₃Hoeveel misdade en sondes het ek begaan?

Wys my wat my oortredings en my sondes is!

₂₄Waarom vermy U my

en beskou U my as u vyand?

₂₅Wil U 'n verwaaide blaar skrikmaak,

'n droë stoppel agtervolg

₂₆dat U so 'n bitter lyding vir my beskik

en my laat boet vir die sondes van my jeug?

₂₇U bind 'n blok aan my voete,

U hou elke voetstap van my dop,

U merk my, waar ek ook al gaan.

₂₈“En dít 'n mens wat vergaan soos iets wat verrot,

soos 'n stuk klere wat deur motte gevreet is.”