Bybelleesrooster – Dag 234

₁Maar luister nou, my dienaar Jakob,

Israel wat Ek uitverkies het:

₂So sê die Here wat jou gemaak het,

Hy wat jou gevorm het in die moederskoot

en jou nou nog help:

Moenie bang wees nie, my dienaar Jakob,

Jesurun wat Ek uitverkies het.

₃Ek sal volop water gee op die dorsland,

strome op die droë grond.

Ek sal my Gees uitgiet op jou kinders,

my seën op jou nakomelinge.

₄Hulle sal uitspruit soos gras in die veld,

soos wilgerbome langs waterlope.

₅Die een sal sê: “Ek behoort aan die Here,”

en homself 'n nakomeling van Jakob noem;

die ander sal op sy hand skryf: Die Here S'n

en homself 'n lid van die volk Israel noem.

₆So sê die Here, die Koning van Israel,

sy Verlosser, die Here die Almagtige:

Ek is die eerste en Ek is die laaste,

buiten My is daar geen God nie.

₇Wie soos Ek is, laat hom dit sê,

laat hom sy saak stel en dit aan My voorlê;

laat hom 'n verklaring gee van wat gebeur het

vandat Ek my volk lank gelede gemaak het

en ook van wat sal gebeur;

laat hy vertel van die dinge wat kom.

₈Moenie skrik nie, moenie bang wees nie!

Het Ek dit nie van lankal af aan julle verkondig,

dit vir julle gesê nie?

Julle is my getuies: is daar 'n God buiten My?

Daar is geen ander Rots nie;

Ek weet van geeneen nie.

₉Dié wat afgodsbeelde maak, is self almal niks;

die dierbare gode van hulle kan nie help nie.

Dié wat vir hulle moet getuig, kan nie sien nie,

kan nie verstaan nie;

dié wat sulke gode het, word teleurgestel.

₁₀Wie maak nou 'n god, giet 'n beeld

wat nie kan help nie!

₁₁Almal wat so 'n god aanhang, word teleurgestel:

dit is gode wat deur mense gemaak is.

Wanneer dié wat hulle aanhang, bymekaarkom vir 'n beslissing,

staan hulle verbyster en verleë.

₁₂Die ystersmid vat 'n stuk gereedskap

en werskaf in die gloeiende kole.

Met hamers vorm hy die beeld,

met sy gespierde arm maak hy die beeld:

die smid eet nie en word swak,

hy drink nie water nie en raak uitgeput.

₁₃Die ambagsman wat hout gebruik, meet met sy maatlyn

en merk die beeld se buitelyne af.

Hy bewerk hom met beitels

en trek sy mate met 'n passer af.

Hy maak hom in die vorm van 'n mens,

'n pragtige mens wat in 'n huis moet woon.

₁₄Die ambagsman kap vir hom seders af,

of hy kies sipresse of eike

en laat hulle groot word in die bos,

of hy plant 'n lourierboom,

en die reën laat dit groot word.

₁₅Dit dien as vuurmaakhout vir die mens;

iemand vat daarvan en maak hom warm,

of hy maak 'n vuur om brood te bak,

of hy maak 'n god en aanbid dit,

hy maak 'n beeld en buig daarvoor.

₁₆'n Deel van die hout verbrand hy:

hy maak kos daarmee gaar,

hy braai vleis en eet tot hy genoeg het;

hy maak hom ook warm en sê: “Dis lekker!

Ek is warm, ek geniet die vuur!”

₁₇Van die hout wat oorbly, maak hy 'n god, 'n beeld,

hy buig voor hom en aanbid hom,

hy bid tot hom en sê: “Red my, want jy is my god!”

₁₈Sulke mense weet nie wat hulle doen nie,

hulle het nie insig nie,

hulle oë is toegepleister, hulle sien nie,

niks dring tot hulle verstand deur nie.

₁₉Hulle kom nie tot besinning nie,

hulle het te min kennis en verstand om te sê:

“'n Gedeelte van die hout het ek verbrand,

ek het op die kole kos gaar gemaak,

ek het vleis gebraai en geëet,

en moet ek nou van wat oor is 'n afskuwelike afgod maak,

moet ek voor 'n stuk hout buig?”

₂₀Iemand wat hom met as besig hou,

laat hom mislei deur sy eie verdraaide opvattings.

Hy kan homself nie red nie,

hy vra homself nie af:

“Is dit nie 'n leuen waarmee ek my besig hou nie?”

₂₁Dink hieraan, Jakob,

dink hieraan, Israel, want jy is my dienaar;

Ek het jou gemaak, jy is my dienaar.

Ek sal jou nie verlaat nie, Israel.

₂₂Ek het jou oortredinge, jou sondes, uitgewis,

hulle het verdwyn soos wolke, soos miswolke.

Kom terug na My toe,

want Ek het jou verlos.

₂₃Juig, hemel, oor wat die Here gedoen het,

jubel, dieptes van die aarde,

wees bly en juig, berge en bosse,

want die Here het vir Jakob, vir Israel, verlos,

die Here het sy mag laat blyk.

₂₄So sê die Here jou Verlosser

wat jou in die moederskoot gevorm het:

Ek is die Here, Ek het alles geskep,

Ek alleen het die hemel oopgespan,

Ek het die aarde gevorm; daar was niemand by nie.

₂₅Ek stel die toekomsvoorspellers aan die kaak,

Ek maak die waarsêers belaglik.

Ek weerlê dié geleerde mense,

Ek ontmasker hulle kennis as dwaasheid.

₂₆Ek bevestig die woorde van my dienaar,

Ek bring wat my boodskappers aangekondig het, tot vervulling.

Ek sê van Jerusalem: Hy moet weer bewoon word,

en van die stede van Juda: Hulle moet weer opgebou word,

en Ek self bou Jerusalem se ruïnes weer op.

₂₇Ek sê vir die diep waters van Babel: Droog op!

Ek sal jou riviere laat opdroog.

₂₈Ek sê vir Kores: Ek het jou as herder aangestel,

jy moet my wil uitvoer,

jy moet van Jerusalem sê:

“Hy moet weer opgebou word

en die tempel moet herstel word.”

₁So sê die Here aan sy gesalfde, aan Kores,

vir wie Hy as heerser aangestel het,

aan wie Hy nasies onderwerp

en voor wie Hy konings hulle wapens laat neerlê,

voor wie Hy deure oopmaak

en poorte nie gesluit laat bly nie:

₂Ek self sal voor jou uit gaan

en hoogtes gelykmaak.

Ek sal bronspoorte oopbreek

en sluitbalke van yster stukkend kap.

₃Ek sal vir jou die skatte gee wat in die donker gebêre word,

die rykdomme wat weggesluit is,

sodat jy kan weet dat Ek die Here is,

dat Ek jou op jou naam geroep het,

Ek, die God van Israel.

₄Ter wille van my dienaar Jakob,

van Israel wat Ek uitverkies het,

het Ek jou op jou naam geroep,

gee Ek jou 'n eretitel hoewel jy My nie ken nie.

₅Ek is die Here, daar is geen ander nie,

buiten My is daar geen God nie.

Ek rus jou toe vir jou taak al ken jy My nie.

₆Ek doen dit sodat elkeen van die ooste af

tot in die weste kan weet

dat daar buiten My geen God is nie;

Ek is die Here, daar is geen ander nie.

₇Ek maak die lig en skep die donker;

Ek gee voorspoed en skep rampspoed.

Ek is die Here, Ek doen al hierdie dinge.

₈Laat die reën uitsak, hemel,

laat redding reën, wolke,

breek oop, aarde, laat voorspoed ontkiem,

laat trou uitspruit.

Ek is die Here, Ek skep hierdie dinge.

₉Ellende wag vir hom wat die Een verwyt wat hom gevorm het,

'n potskerf tussen potskerwe van klei.

Durf die klei vir die een wat dit vorm, sê: “Wat maak jy?”

Durf wat jy gemaak het, van jou sê:

“Hy kan nie sy hande gebruik nie!”

₁₀Ellende wag vir hom wat vir sy pa sê:

“Waarom verwek u 'n kind?”

of vir sy ma: “Waarom bring u 'n kind in die wêreld?”

₁₁So sê die Here, die Heilige van Israel,

die Skepper van Israel:

Durf julle van My rekenskap vra oor wat gaan gebeur?

Durf julle aan My voorskryf oor my kinders

en oor die werk van my hande?

₁₂Ek het die aarde gemaak;

die mensdom wat daarop is, het Ek geskep.

Ek het met my hande die hemel oopgespan

en Ek het aan al die hemelliggame hulle opdragte gegee.

₁₃Ek het vir Kores te voorskyn laat tree om reg te laat geskied;

Ek verwyder elke hindernis op sy pad.

Hy sal my stad weer opbou

en my ballinge terugstuur

sonder dat hy betaling of 'n geskenk daarvoor ontvang,

sê die Here die Almagtige.

₁₄So sê die Here:

Die opbrings van Egipte en die winste van Kus

sal na jou toe oorgaan en sal joune wees,

ook die mense van Seba, die groot mense.

Hulle sal agter jou loop en jou volg in kettings,

hulle sal diep voor jou buig en teenoor jou bely:

“Waarlik, God is by jou,

en daar is geen ander nie,

daar is nie nog 'n God nie.”

₁₅U is die God wat U verborge hou,

die God van Israel, die Redder!

₁₆Dié wat afgode maak, staan almal verleë,

teleurgestel in hulle verwagting,

hulle kom bedroë daarvan af.

₁₇Maar Israel word deur die Here gered

met 'n blywende redding.

Hulle sal nie verleë staan nie en nooit teleurgestel word nie.

₁₈So sê die Here, Hy wat die hemel geskep het,

Hy wat alleen God is,

Hy wat die aarde gevorm, gemaak het,

dit gereed gemaak, geskep het,

dit gevorm het, nie om leeg te wees nie,

maar om bewoon te word:

Ek is die Here; daar is geen ander nie.

₁₉Ek het nie in die geheim gepraat

iewers in 'n donker land nie.

Ek het nie aan die nakomelinge van Jakob gesê om My in 'n onbewoonbare land te dien nie.

Wat Ek, die Here, sê, bring redding,

my woorde gee lewe.

₂₀Kom almal bymekaar, kom nader vir die beslissing,

vlugtelinge uit die nasies.

Dié wat afgodsbeelde dra wat van hout gemaak is,

en tot 'n god bid wat nie kan red nie,

het geen insig nie.

₂₁Stel julle saak en bring julle bewyse,

beraadslaag gerus met mekaar daaroor.

Wie het wat nou gebeur, lankal aangekondig?

Wie het al vantevore gesê dit sal gebeur?

Is dit nie Ek, die Here, nie?

Daar is buiten My geen God nie;

net Ek is 'n God wat regverdig is en red.

₂₂Kom na My toe dat julle gered kan word,

almal op die aarde,

want Ek is God, daar is geen ander nie.

₂₃Ek lê 'n eed af in my eie Naam,

wat Ek sê, is betroubaar,

dit is 'n woord wat nie onvervul sal bly nie:

voor My sal elke knie buig,

in my Naam sal elke tong 'n eed aflê.

₂₄Hulle sal sê:

“Net van die Here kom daar redding en krag.”

Almal wat teen Hom te kere gegaan het,

sal beskaamd daarvan afkom

wanneer hulle voor Hom moet verskyn.

₂₅Maar al die nakomelinge van Israel sal gered word

omdat hulle aan die Here behoort,

en hulle sal in Hom roem.