Bybelleesrooster – Dag 136

₁Die Here het 'n afsku van 'n skaal wat nie reg weeg nie;

net die regte gewig dra sy goedkeuring weg.

₂Selfverheffing bring vernedering;

wie nederig is, het wysheid.

₃Die opregtheid van eerlike mense bepaal hulle koers;

die valsheid van onbetroubares bring hulle ondergang.

₄Rykdom baat nie wanneer die Here straf nie;

om te lewe volgens sy wil, red van die dood.

₅Die gehoorsaamheid van die opregte maak sy pad gelyk;

wie verkeerd doen, kom daardeur tot 'n val.

₆Die betroubaarheid van eerlike mense red hulle;

onbetroubare mense word deur hulle hebsug gevang.

₇Wanneer 'n slegte mens sterf, verdwyn alle hoop,

selfs die verwagting wat op mag gebou is.

₈Die regverdige word uit sy nood bevry,

en dié nood tref die goddelose.

₉'n Godlose mens laat 'n ander te gronde gaan met wat hy sê;

mense wat aan God gehoorsaam is,

word deur hulle kennis gered.

₁₀'n Stad juig oor die voorspoed van regverdiges

en jubel wanneer die goddeloses te gronde gaan.

₁₁'n Stad kry 'n goeie naam

wanneer opregte mense dit prys,

maar dit word afgebreek

deur wat goddelose mense daarvan sê.

₁₂'n Onverstandige mens praat met minagting van 'n ander;

'n verstandige mens swyg.

₁₃Iemand wat loop en skinder, lap geheime uit;

'n betroubare mens bewaar 'n geheim.

₁₄Sonder oorwoë leiding val 'n volk;

die redding lê in baie raadgewers.

₁₅Dit gaan sleg met hom wat vir iemand borg staan;

die man wat weier om borg te staan, is veilig.

₁₆'n Deugsame vrou is gesteld op haar goeie naam;

mense wat niks ontsien nie, is gesteld op rykdom.

₁₇'n Mens wat iets vir 'n ander oor het, baat self daarby;

'n hartelose mens word deur sy eie toedoen verstoot.

₁₈Die wins wat 'n slegte mens maak, hou nie;

wie volhou om reg te doen, kry blywende beloning.

₁₉Die lewe lê voor vir wie by die reg bly,

die dood wag vir wie aanhou kwaad doen.

₂₀Die Here verafsku mense wat nie opreg is nie;

Hy hou van mense wat onberispelik lewe.

₂₁Dit staan vas: 'n slegte mens sal nie loskom nie,

maar selfs die nageslag van die regverdiges sal vrygespreek word.

₂₂Die skoonheid van 'n vrou sonder oordeel

is soos 'n goue ring aan 'n vark se snoet.

₂₃Die regverdiges begeer die goeie;

vir die goddeloses wag daar net straf.

₂₄Daar is mense wat vrylik uitdeel en tog steeds meer het,

daar is ander wat suinig is en tog arm word.

₂₅Wie 'n ander voorspoed gun, sal self oorvloed hê.

Wie die dors van ander les, sal self genoeg kry as hy dors is.

₂₆Mense vervloek iemand wat weier om koring te verkoop

en hulle seën iemand wat gewillig is om te verkoop.

₂₇Wie die goeie nastreef, kan goedkeuring verwag;

wie op die kwaad uit is, kry dit.

₂₈Wie op sy rykdom staatmaak, kom tot 'n val;

wie reg doen, floreer soos groen blare aan 'n boom.

₂₉Wie sy huishouding verwaarloos,

sal naderhand net wind oor hê;

'n onverstandige mens word die slaaf

van dié een wat wysheid het.

₃₀Wie die wil van die Here doen, is 'n bron van lewe;

die mens wat wysheid het, red lewens.

₃₁Die regverdige kry hier op aarde wat hom toekom;

net so seker die goddelose en die sondaar.

₁Wie hom laat leer, wil graag kennis ontvang;

wie hom nie laat teregwys nie, is 'n dom mens.

₂Die Here hou van 'n goeie mens,

maar Hy veroordeel 'n slinkse mens.

₃Niemand wat 'n verkeerde lewe lei, hou stand nie;

wie die wil van die Here doen, staan stewig.

₄'n Knap vrou gee haar man hoë aansien;

een wat haar man in die skande steek,

is vir hom soos vretende kanker.

₅Die mening van regverdiges kan die toets van die reg deurstaan;

die slim raad van goddeloses is onbetroubaar.

₆Goddeloses stel met wat hulle sê, dodelike hinderlae vir ander;

opregte mense red ander met wat hulle sê.

₇Goddeloses val en dit is klaar met hulle;

die nageslag van die regverdiges bestaan voort.

₈'n Mens word geprys vir sy insig

en uitgelag as hy nie verstandig dink nie.

₉Liewer gering geag word en tog 'n slaaf besit

as jou vernaam aanstel en nie kos hê om te eet nie.

₁₀Die regverdige sorg goed vir sy diere,

maar die goddeloses is wreed.

₁₁Wie sy grond bewerk, het volop om te eet;

wie hom besig hou met nuttelose dinge, het nie verstand nie.

₁₂Die goddelose soek sy veiligheid in verkeerde dade;

die regverdiges staan vanself vas.

₁₃'n Slegte mens stel vir homself

'n strik met sy opruiende woorde;

wie reg doen, ontkom uit die nood.

₁₄'n Mens kan voorspoedig word

deur altyd die regte woorde te gebruik,

of hy kan die vrug geniet van wat hy met sy hande doen.

₁₅In die dwaas se oë is sy eie pad die regte;

wie wysheid het, luister na raad.

₁₆'n Dwaas wys dadelik dat hy beledig voel;

'n verstandige mens laat nie blyk dat hy gekrenk is nie.

₁₇Wie die waarheid aan die lig bring,

lewer betroubare getuienis;

'n getuie wat lieg, maak alles vals.

₁₈Praat sonder om te dink kan soos dolksteke wees;

wyse mense bring genesing met wat hulle sê.

₁₉Die waarheid hou vir altyd,

die leuen net 'n oomblik.

₂₀Dié wat op kwaad uit is, doen dit omdat hulle vals is;

dié wat beraadslaag vir vrede en voorspoed,

doen dit met vreugde.

₂₁Geen leed sal die regverdige tref nie;

goddeloses beleef ramp op ramp.

₂₂Die Here het 'n afsku van leuenaars;

Hy hou van betroubare mense.

₂₃'n Verstandige mens loop nie te koop met sy kennis nie;

dwase basuin hulle dwaasheid uit.

₂₄Hardwerkende mense kom in magsposisies;

lui mense word dwangarbeiders.

₂₅Bekommernis druk 'n mens neer;

'n vriendelike woord vrolik hom op.

₂₆Die regverdige laat sy pad vir hom wys deur 'n vriend;

die goddeloses verdwaal op die pad wat hulle self kies.

₂₇Die luiaard gaan vang nie eens wild om te braai nie;

'n hardwerkende mens versamel kosbare besittings.

₂₈Gehoorsaamheid aan God lei tot die lewe,

dit is 'n pad wat nie na die dood lei nie.

₁'n Wyse seun laat hom leer deur sy vader,

'n ligsinnige slaan nie eens op dreigemente ag nie.

₂'n Mens kan voorspoedig word

deur altyd die regte woorde te gebruik;

onbetroubare mense is net uit op geweld.

₃Wie sy mond in bedwang hou, behou sy lewe;

wie sy mond nie kan hou nie, gaan sy ondergang tegemoet.

₄Die luiaard se honger word nie gestil nie;

hardwerkende mense het meer as genoeg om te eet.

₅Die regverdige haat leuens;

die goddelose maak hom gehaat en veragtelik.

₆Die opregte bly behoue

deur sy gehoorsaamheid aan die Here;

ongehoorsaamheid laat die sondaar te gronde gaan.

₇Party mense hou hulle ryk maar het niks nie;

party doen hulle arm voor maar besit baie.

₈Met sy rykdom moet 'n ryk man hom soms loskoop;

'n arm man kom nie in so 'n gevaar nie.

₉Die lewe van die regverdiges is vol vreugde;

die lewenslig van die goddeloses word uitgedoof.

₁₀Selfverheffing lei altyd tot twis;

dié wat goeie raad aanneem, het wysheid.

₁₁Rykdom wat sommerso gekom het, verminder maklik;

wie bietjie vir bietjie bymekaarmaak, word ryk.

₁₂'n Verwagting wat nie uitkom nie, maak 'n mens mismoedig;

'n begeerte wat vervul word, bring nuwe lewe.

₁₃Wie hom nie aan die woorde van die Here steur nie,

sal die gevolge dra;

wie eerbied het vir sy gebooie, sal die goeie vrugte pluk.

₁₄Wat wyse mense jou leer, is 'n bron van lewe;

dit laat jou die strikke van die dood vermy.

₁₅Iemand wat goeie insig het, geniet goedgesindheid;

die pad van onbetroubare mense lei tot vernietiging.

₁₆Alles wat 'n verstandige mens doen, word met kennis gedoen;

wie nie wysheid het nie, begaan een dwaasheid na die ander.

₁₇'n Onbetroubare boodskapper kom in die moeilikheid;

'n gesant op wie jy kan staatmaak, stel sake weer reg.

₁₈Armoede en vernedering wag vir iemand

wat hom nie wil laat leer nie,

wie 'n teregwysing ter harte neem, word geëer.

₁₉'n Begeerte wat vervul is, bring vreugde.

Dwase het 'n afkeer daarvan om kwaad te vermy.

₂₀Wie met wyse mense omgaan, kry self wysheid;

wie hom met dwase ophou, word self sleg.

₂₁Teenspoed volg die sondaars op hulle pad;

die regverdige word met voorspoed vergoed.

₂₂'n Goeie mens laat 'n erfenis na ook vir sy kleinkinders;

die besittings van die sondaar

kom in die hande van die regverdige.

₂₃Grond wat die eerste keer geploeg is,

lewer genoeg kos vir die armes,

maar waar daar nie wet en orde is nie,

word die kos van hulle af weggevat.

₂₄Wie sy seun nie straf nie, het hom nie lief nie;

as hy hom liefhet, sal hy hom straf wanneer dit nodig is.

₂₅Die regverdige het meer as genoeg om te eet;

goddelose mense bly honger.