Bybelleesrooster – Dag 137

₁'n Wyse vrou sorg vir haar huis;

'n vrou sonder wysheid breek alles af.

₂Wie opreg lewe, dien die Here;

wie krom paaie loop, het nie eerbied vir die Here nie.

₃Die verwaande woorde van die dwaas bring vir hom straf;

die woorde van wyse mense beskerm hulle.

₄As daar nie osse is nie, is die voerkrip leeg;

met net een goeie os bring jy 'n groot oes in.

₅'n Betroubare getuie lieg nie;

'n vals getuie vertel een leuen na die ander.

₆Al soek 'n ligsinnige mens wysheid, hy kry dit nie;

'n verstandige mens doen maklik kennis op.

₇Vermy 'n dwase mens;

jy sal nie by hom leer om verstandig te praat nie.

₈Die wysheid van 'n verstandige mens wys vir hom 'n duidelike koers aan;

die dwaasheid van 'n dwase mens maak alles vals.

₉Die skuldoffer wat deur dwase gebring word, maak hulle bespotlik;

mense wat opreg lewe, geniet die guns van God.

₁₀Net 'n mens self ken die bitterheid van sy eie gemoed,

en ook in sy vreugde kan niemand anders voluit deel nie.

₁₁Die goddelose en sy nageslag sterf uit;

die opregtes het 'n groot nageslag.

₁₂Daar is 'n lewenswyse wat vir 'n mens reg kan lyk,

maar die uiteinde daarvan is die dood.

₁₃'n Mens kan lag terwyl hy treur,

die uiteinde van vreugde kan kommer wees.

₁₄'n Onbetroubare mens kry sy verdiende loon;

'n goeie mens ontvang meer as sy beloning.

₁₅Wie ervaring kortkom, glo alles wat gesê word;

'n verstandige mens oorweeg elke tree wat hy gee.

₁₆Wie wysheid het, is versigtig en vermy die kwaad;

wie wysheid kortkom, is roekeloos en selfversekerd.

₁₇Wie kort van draad is, begaan dwaashede;

'n agterbakse mens maak hom gehaat.

₁₈Mense wat ervaring kortkom, sit met hulle eie dwaasheid;

verstandige mense word met kennis bekroon.

₁₉Slegte mense moet voor goeies buig,

goddeloses moet buig wanneer 'n regverdige by sy huis uitkom.

₂₀'n Arm mens word selfs deur sy buurman verstoot;

'n ryk man het baie vriende.

₂₁Wie sy naaste verag, doen sonde;

wie medelye het met die mens in nood, met hom gaan dit goed.

₂₂Wie altyd op kwaad uit is, is op die verkeerde pad;

wie goed doen, geniet liefde en trou.

₂₃Harde werk bring beloning;

om net te praat, bring gebrek.

₂₄Wyse mense word bekroon met rykdom;

die dwaasheid van dwase mense lei na meer dwaasheid.

₂₅'n Betroubare getuie red lewens;

die een wat leuens kwytraak, maak alles vals.

₂₆Wie die Here dien, het daarin 'n veilige toevlug,

en ook sy kinders vind daar skuiling.

₂₇Wie die Here dien, vind daarin 'n bron van lewe;

dit laat jou die strikke van die dood ontkom.

₂₈'n Koning met baie onderdane is hoog in aansien;

een met min onderdane gaan te gronde.

₂₉'n Geduldige mens is baie verstandig;

een wat kort van draad is, stel sy dwaasheid ten toon.

₃₀'n Kalm gemoed hou die liggaam gesond;

hartstog vreet 'n mens op.

₃₁Wie 'n arm mens verdruk, beledig sy Maker;

wie hom oor 'n arm mens ontferm, eer God.

₃₂Die goddelose kom tot 'n val deur sy boosheid;

die regverdige het 'n toevlug, ook in sy dood.

₃₃In 'n verstandige gemoed pas die wysheid goed in;

by dwaasheid is dit nie tuis nie.

₃₄Gehoorsaamheid aan die Here laat 'n volk sterk staan;

sonde bring skande oor 'n volk.

₃₅'n Verstandige amptenaar geniet die guns van die koning;

een wat skande maak, maak hom kwaad.

₁'n Sagte antwoord laat woede bedaar;

'n krenkende woord laat woede ontvlam.

₂Die woorde van wyse mense maak kennis iets begeerliks;

dwase mense sê net dwase dinge.

₃Die Here sien oral;

Hy hou slegte en goeie mense dop.

₄Kalmerende woorde bring lewe,

skynheilige woorde breek mense.

₅'n Dwaas verag wat sy vader hom leer;

wie hom laat teregwys, is verstandig.

₆In die huis van die regverdige is daar groot rykdom;

die inkomste van die goddelose is vir hom tot nadeel.

₇Wyse mense versprei kennis met wat hulle sê;

dwase het verdraaide opvattings.

₈Die Here het 'n afsku van die offers van goddeloses,

maar Hy aanvaar die gebede van opregtes.

₉Die Here het 'n afsku van die lewenswyse van goddeloses;

maar Hy het dié lief wat volgens sy wil lewe.

₁₀Wie die regte pad verlaat, sal swaar gestraf word;

wie teregwysing haat, sal sterf.

₁₁Vir die Here is die doderyk

en die onderaardse diepte nie verborge nie,

hoeveel minder die gedagtes van mense.

₁₂'n Ligsinnige mens hou nie daarvan

dat hy tereggewys word nie;

hy word nie 'n wyse mens nie.

₁₃Blydskap laat 'n mens se gesig straal;

smart maak 'n mens terneergedruk.

₁₄'n Verstandige mens is op soek na kennis;

'n dwaas voed homself met dwaasheid.

₁₅Dit gaan altyd sleg met 'n bedrukte mens;

die blymoedige mens se hele lewe is 'n fees.

₁₆Liewer min hê en die Here dien

as groot rykdom en bekommernis daaroor.

₁₇Liewer net 'n bietjie groente en liefde daarby

as 'n vetgemaakte os en haat daarby.

₁₈'n Humeurige mens soek skoor;

'n verdraagsame mens maak rusies uit die wêreld.

₁₉'n Luiaard se pad is met dorings besaai;

'n opregte mens het 'n gelyk pad.

₂₀'n Wyse seun maak sy ouers bly,

'n dwase mens minag hulle.

₂₁Iemand wat verstand kortkom,

vind vreugde in sy dwaasheid;

'n mens met insig leef reg.

₂₂Waar daar nie beraadslaging is nie, slaag planne nie;

dit slaag wanneer daar baie raadgewers is.

₂₃'n Mens vind vreugde daarin as hy die antwoord het;

wat is beter as die regte woord op die regte tyd?

₂₄'n Verstandige mens se pad loop boontoe, na die lewe toe;

hy ontkom die doderyk daar onder.

₂₅Die Here breek die hoogmoedige se huis af

en beskerm die grond van die weduwee.

₂₆Die Here het 'n afsku van bose planne;

aangename woorde is vir Hom aanneemlik.

₂₇Wie hom verryk ten koste van 'n ander,

maak dat sy gesin verstoot word;

wie omkoopgeskenke weier, sal lewe.

₂₈'n Regverdige mens dink voor hy antwoord;

goddelose mense sê net slegte dinge.

₂₉Die Here is ver van die goddeloses af,

maar Hy hoor die gebed van die regverdiges.

₃₀Stralende oë bring blydskap,

goeie tyding verkwik 'n mens.

₃₁Wie op 'n teregwysing ag slaan, sal lewe

en 'n tuiste vind tussen mense wat wysheid het.

₃₂Wie onderrig in die wind slaan, gee nie om vir homself nie;

wie op 'n teregwysing ag slaan, kry insig.

₃₃Om die Here te dien, is om onderrig te word in wysheid;

nederigheid kom voor eer.

₁'n Mens kan sy voornemens hê,

maar die laaste woord daaroor kom van die Here af.

₂In sy eie oë is alles wat 'n mens doen, reg,

maar die Here ondersoek die gesindheid.

₃Laat wat jy doen, aan die Here oor,

dan sal jou voornemens geluk.

₄Die Here het alles gemaak met 'n doel,

ook die goddelose vir die dag van straf.

₅Die Here het 'n afsku van 'n verwaande mens;

dit staan vas: so 'n mens sal nie ongestraf bly nie.

₆Liefde en trou bring versoening

waar daar verkeerd gehandel is;

kwaad word vermy deur die Here te dien.

₇As die Here tevrede is met 'n mens se lewe,

laat Hy selfs so 'n mens se vyande in vrede met hom lewe.

₈Liewer min hê en reg lewe

as baie inkomste hê deur onreg.

₉'n Mens beplan sy pad,

maar die Here bepaal hoe hy loop.

₁₀As die koning praat, is dit met Goddelike gesag;

as hy uitspraak lewer, maak hy nie fout nie.

₁₁Die norme vir die regspraak kom van die Here af;

Hy bepaal die maatstawwe.

₁₂Konings het 'n afsku van verkeerde dade,

want 'n troon word deur regverdigheid bestendig.

₁₃Eerlike mense geniet die koning se goedgesindheid;

hy hou van mense wat die waarheid praat.

₁₄Die woede van die koning dra die boodskap van die dood;

'n wyse mens bring dié woede tot bedaring.

₁₅As die koning vriendelik is, is jy seker van jou lewe;

sy goedgesindheid is soos 'n wolk wat lentereëns bring.

₁₆Probeer liewer wysheid bekom as goud,

liewer insig as silwer.

₁₇Opregte mense vermy die kwaad op hulle lewensweg;

wie nougeset lewe, hou homself in die lewe.

₁₈Op hoogmoed volg ondergang,

op selfverheffing volg die val.

₁₉Liewer eenvoud saam met nederiges

as om saam met hoogmoediges van roof te lewe.

₂₀Wie ag gee op die woorde van die Here, sal voorspoed geniet;

wie op die Here vertrou,

met hom gaan dit goed.

₂₁'n Mens wat met wysheid bedeel is, word verstandig genoem,

en as hy sy woorde reg kies, kan hy ook ander leer.

₂₂Insig is 'n bron van lewe vir wie dit het;

onderrig deur dwase bly dwaasheid.

₂₃'n Wyse mens praat verstandig

en kies sy woorde so dat hy ander kan leer.

₂₄Aangename woorde is heuning,

soet en geneeskragtig vir die mens.

₂₅Daar is 'n lewenswyse wat vir 'n mens reg kan lyk,

maar die uiteinde daarvan is die dood.

₂₆'n Werker se honger laat hom werk,

sy behoefte aan kos dryf hom.

₂₇'n Kwaadwillige mens bring net teenspoed;

wat hy sê, is soos 'n verterende vuur.

₂₈Iemand wat die waarheid verdraai, veroorsaak twis,

iemand wat skinder, bring verwydering tussen vriende.

₂₉Iemand wat niks ontsien nie, mislei sy naaste

en laat hom 'n verkeerde pad loop.

₃₀Wie met sy oog knik, wil die waarheid verdraai;

wie sy lippe saampers, is vasbeslote oor 'n boosheid.

₃₁Ouderdom is 'n sierlike kroon;

dit word bereik deur dié wat reg lewe.

₃₂'n Geduldige mens het meer waarde as 'n bedrewe vegter,

'n mens met selfbeheersing meer as iemand wat 'n stad inneem.

₃₃Mense kan loot,

maar die Here bepaal hoe dit uitkom.