Bybelleesrooster – Dag 135

₁Dit is Wysheid self wat roep,

dit is Insig wat haar stem laat hoor.

₂Op die hoogtes langs die pad,

by die kruispaaie, gaan sy staan,

₃langs die stadspoorte, by die ingange,

skree sy dit uit:

₄“Ek roep na julle, mense, ek roep na alle mense:

₅Dié wat ervaring kortkom, kan verstandig word,

dié wat dwaas optree, kan insig kry.

₆Luister, want wat ek sê, is die moeite werd,

elke woord van my is opreg.

₇Ek praat net die waarheid,

ek het 'n afsku van wat verkeerd is.

₈Elke woord uit my mond kan die toets deurstaan,

nie een het 'n verkeerde of vals bedoeling nie.

₉Mense wat insig het, weet dat ek reguit praat,

wie die kennis het, weet wat ek sê, is reg.

₁₀Aanvaar wat ek julle leer, dit is meer werd as silwer;

kennis is meer werd as die fynste goud.

₁₁Ek, Wysheid, is kosbaarder as edelstene;

wat jy ook al as baie werd beskou,

teen my weeg dit nie op nie.

₁₂“Ek, Wysheid, het die verstand,

ek het die kennis en die skranderheid.

₁₃Om die Here te dien, is om te haat wat verkeerd is.

Daarom haat ek hoogmoed en hovaardigheid,

'n verkeerde lewe en slinkse woorde.

₁₄Wie my het, het raad en behaal sukses,

ek verleen insig, ek is die een wat die mag gee.

₁₅Met my hulp regeer konings goed

en laat maghebbers reg geskied;

₁₆met my hulp heers die mense wat mag het,

die leiers, elkeen wat reg regeer.

₁₇Ek het dié lief wat my liefhet;

dié wat my soek, vind my.

₁₈Wie my het, het rykdom en eer,

het duursame en blywende besittings.

₁₉Wat ek vir jou lewer,

is beter as goud, selfs fyn goud;

wat ek inbring,

is meer werd as die suiwerste silwer.

₂₀Waar ek gaan, is daar geregtigheid,

my pad is dié van die reg.

₂₁Ek maak dié wat my liefhet, ryk,

ek maak hulle skure vol.

₂₂“Die Here het my geskep, Hy het met my begin;

ek is die eerste wat Hy gemaak het, lank, lank gelede.

₂₃Ek is lankal daar, van die begin af,

voor die aarde daar was.

₂₄Ek het gekom toe die groot waters nog nie daar was nie,

toe daar nog nie fonteine vol water was nie.

₂₅Voor die berge hulle plek gekry het,

voor die rante het ek al gekom,

₂₆voor die Here die aarde met sy vlaktes gemaak het,

voor Hy selfs die eerste grond gemaak het.

₂₇Ek was daar toe Hy die hemelgewelf opgerig het,

toe Hy die horison oor die see afgemerk het,

₂₈toe Hy die wolke daarbo gesit het,

die fonteine onder die diep water laat uitborrel het.

₂₉Ek was daar toe Hy vir die see sy grens vasgestel het,

die waters aan sy wil onderwerp het,

toe Hy die fondamente van die aarde afgesteek het.

₃₀Ek het my kennis by Hom gekry,

ek was elke dag sy vreugde;

die hele tyd het ek dit by Hom geniet.

₃₁Ek het my verlustig in die wêreld wat Hy gemaak het,

die mense was vir my 'n vreugde.

₃₂“Daarom, kinders, luister na my,

dit sal goed gaan met dié wat op my pad bly.

₃₃Luister na wat ek julle leer,

moet dit nie verontagsaam nie,

dan sal julle ook wysheid hê.

₃₄Dit sal goed gaan met die mens wat na my luister,

die mens wat elke dag na my huis toe kom

en op my drumpel staan en wag.

₃₅Wie my vind, vind die lewe self

en geniet die guns van die Here.

₃₆Maar wie my nie wil vind nie, doen homself skade aan;

wie my haat, hou van die dood.”

₁Wysheid het vir haar 'n huis gebou met sewe klippilare.

₂Sy het geslag en wyn reggesit,

sy het haar tafel gedek

₃en haar bediendes na die stad toe gestuur

om van die hoogste plek af te roep:

₄“Kom hiernatoe, almal wat nog moet leer!”

En vir dié wat kennis kortkom, het sy gesê:

₅“Kom eet by my,

kom drink van die wyn wat ek reggesit het!

₆Neem afskeid van die onkunde, dat julle kan lewe,

kom op die pad van die insig!”

₇Wie iemand so opvoed dat hy 'n ligsinnige mens word,

moet die verwyt daarvoor dra;

wie iemand so leer dat hy 'n goddelose word,

doen dit tot sy eie skande.

₈Moenie 'n ligsinnige mens probeer opvoed nie,

hy sal jou daarvoor haat.

Voed 'n wyse op, en hy sal lief wees vir jou.

₉Gee jou aandag aan 'n wyse mens, en hy kry meer wysheid,

leer 'n regverdige, en sy kennis vermeerder.

₁₀Wysheid begin met die dien van die Here;

wie die Heilige ken, het werklik insig.

₁₁As jy wysheid het, sal jy lank lewe,

jou lewensjare sal vermeerder word.

₁₂As jy wysheid het, het jy self die voordeel daarvan;

as jy 'n ligsinnige mens is, dra jy alleen die las.

₁₃Dwaasheid is soos 'n vrou wat luidrugtig bly klets,

stadig van begrip en sonder kennis van sake.

₁₄Sy sit by haar voordeur,

haar stoel staan op die hoogste plek in die stad,

₁₅en sy roep na dié wat verbykom,

elkeen besig om sy gang te gaan:

₁₆“Draai af hiernatoe, almal wat nog onervare is!”

Sy sê vir dié wat kennis kortkom:

₁₇“Gesteelde water is soet,

kos wat stilletjies geëet word, is lekker!”

₁₈Dié wat na haar luister,

besef nie dat die dood self daar wag nie,

dat dié wat hulle deur haar laat nooi het,

klaar diep in die doderyk is nie.

'n Wyse seun maak sy vader en moeder bly;

'n dwase seun maak hulle hartseer.

₂Goed wat deur onreg bekom is, bring geen voordeel nie;

om te lewe volgens die wil van God,

red 'n mens van die dood.

₃Die Here laat die mens wat reg doen, nie honger ly nie,

die Here laat

die begeerte van dié wat verkeerd doen, nie bevredig word nie.

₄'n Mens wat nie sy hande uit sy mou steek nie, word arm;

dit is vlyt wat ryk maak.

₅Die verstandige mens samel sy oes in as dit ryp is;

'n mens wat die oestyd deur slaap, verdien veragting.

₆Die regverdige word geseën.

Daar steek geweld agter die mooi woorde van die goddeloses.

₇Die nagedagtenis van dié wat reg doen, leef voort;

die naam van dié wat verkeerd doen, word gou vergeet.

₈Die mens met verstand aanvaar bevele.

Wie aanhou onsin praat, kom tot 'n val.

₉Wie opreg leef, leef sonder vrees;

wie krom paaie loop, word uitgevind.

₁₀Wie sy oë sluit vir die waarheid, veroorsaak smart;

en wie aanhou onsin praat, kom self tot 'n val.

₁₁Die woorde van die regverdige bring lewe en geluk;

agter die mooi woorde van die goddeloses steek daar geweld.

₁₂Haat verwek twis;

liefde bedek alles wat aanstoot gee.

₁₃Daar is wysheid in die woorde van een wat insig het;

slae is vir dié wat nie hulle verstand gebruik nie.

₁₄Wyse mense loop nie te koop met hulle kennis nie;

as 'n dwaas sy mond oopmaak, is sy ondergang naby.

₁₅Die rykdom is die ryke se veilige vesting;

die armoede is die arme se ondergang.

₁₆Die regverdige ontvang die lewe as beloning;

die goddelose oes net straf.

₁₇Wie hom laat leer, ken die pad na die lewe;

wie teregwysing verwerp, dwaal van dié pad af.

₁₈Agter die woorde van 'n huigelaar sit daar haat;

wie skinderstories versprei, is 'n dwaas.

₁₉Met baie praat bly die sonde nie uit nie;

wie sy woorde tel, is verstandig.

₂₀Die woorde van die regverdige is die fynste silwer werd;

die gedagtes van die goddelose is min werd.

₂₁Met wat die regverdige sê, sorg hy vir baie;

'n dwaas gebruik nie sy verstand nie

en bring die dood oor homself.

₂₂Dit is die seën van die Here wat rykdom bring;

jou geswoeg laat dit nie meer word nie.

₂₃Die dwaas geniet dit om hom skandalig te gedra,

maar die mens met insig geniet die wysheid.

₂₄Wat die goddelose vrees, kom hom oor;

wat die regverdige begeer, gee God hom.

₂₅As die stormwind kom, is die goddelose daarmee heen,

maar die regverdige bly altyd staan.

₂₆Soos asyn teen die tande, soos rook in die oë,

so is 'n lui mens vir iemand wat hom 'n opdrag gee.

₂₇Wie die Here dien, lewe lank;

wie sonder Hom lewe, se lewensjare is min.

₂₈Vir die regverdiges lê daar vreugde voor;

die goddeloses het geen toekoms nie.

₂₉Om te leef soos die Here dit wil,

is die krag van die opregte;

vir dié wat onreg doen, wag daar ondergang.

₃₀Die regverdige wankel nooit,

die goddeloses sal nie die land bly bewoon nie.

₃₁Daar kom wysheid uit die mond van die regverdige,

'n tong wat kwaad stig, sal uitgesny word.

₃₂Die regverdige weet om die gepaste ding te sê;

die goddeloses stig kwaad met wat hulle sê.