Bybelleesrooster – Dag 115

Luister tog na my, Here, verhoor my gebed,

want ek is hulpeloos en arm.

₂Beskerm my, want ek is u troue dienaar,

red my, want U is my God, op U vertrou ek.

₃Wees my genadig, Here,

ek roep die hele dag deur na U.

₄Maak my bly, Here,

ek hunker na U.

₅U is goed, Here, U vergewe altyd weer,

U is getrou teenoor dié wat na U roep om hulp.

₆Luister na my gebed, Here,

gee tog ag op my smeekgebed.

₇Op die dag van my nood roep ek na U,

U sal my gebed verhoor.

₈Daar is geen god soos U nie, Here,

niks kan met u werk vergelyk word nie.

₉U het al die nasies gemaak;

hulle sal voor U kom buig, Here,

en aan u Naam die eer gee,

₁₀want U is groot en doen magtige dade,

U alleen is God.

₁₁Leer my u pad, Here,

ek wil wandel in u waarheid;

leer my U met toewyding dien.

₁₂Met my hele hart sal ek U prys, Here my God,

u Naam altyd eer,

₁₃want u liefde vir my was groot:

uit die dieptes van die dood het U my gered.

₁₄Dit is hovaardige mense wat my aanval, o God,

'n bende geweldenaars wat my wil doodmaak,

mense wat met U nie rekening hou nie.

₁₅U, Here, is 'n barmhartige en genadige God,

lankmoedig, vol liefde en trou.

₁₆Sien my, u dienaar van my geboorte af, in genade aan,

gee U my tog krag en red my.

₁₇Maak my 'n voorbeeld van u goedheid,

sodat dié wat my haat, verleë sal moet toesien

dat U, Here, my help en vir my uitkoms gee.

Die fondament van Sion is die heilige berg.

₂Die Here het vir Sion lief

meer as enige ander plek in Jakob.

₃Daar word groot dinge van jou gesê, stad van God: Sela

₄“Ek reken onder dié wat my ken ook die mense van Egipte en Babel,

selfs dié van Filistea, Tirus en Kus.

Hulle het almal kinders van Sion geword.”

₅Daarom word van Sion gesê:

“Daar is hulle man vir man gebore;

die Allerhoogste hou Sion in stand.”

₆As die Here die name van die volke aanteken, sal Hy by elkeen skrywe:

“Hierdie een is ook 'n kind van Sion.” Sela

₇Met sang en dans sal almal Sion prys.

₂Here my God wat my altyd help,

ek roep elke dag om hulp,

elke nag bid ek tot U.

₃Laat my gebed nie tevergeefs wees nie,

hoor my geroep.

₄Die swaarkry het vir my te veel geword:

ek vat al aan die doderyk,

₅ek staan al met die een voet in die graf,

ek het geen krag meer nie.

₆Dit is asof ek al tussen die dooies is,

tussen dié wat gesneuwel het en in hulle grafte lê,

dié aan wie U nie meer dink nie

en van wie U u hand teruggetrek het.

₇U het my onder in die put laat beland,

in diepe duisternis.

₈U gramskap rus swaar op my,

U laat al u golwe oor my breek. Sela

₉U laat my bekendes ver van my af staan

en maak my vir hulle iets afskuweliks;

ek sit vasgevang en kan nie uitkom nie.

₁₀My oë is al dof van ellende;

die hele dag deur roep ek na U, Here,

en steek ek my hande in gebed na U uit.

₁₁Sal U met dooies 'n wonder laat gebeur?

Kan gestorwenes opstaan en U loof? Sela

₁₂Word daar in die graf vertel van u troue liefde?

Word daar in die plek waar almal vergaan, van u trou vertel?

₁₃Sal u wondermag ondervind word in die duisternis van die dood,

u redding in die land van vergetelheid?

₁₄Ek roep na U om hulp, Here,

vroeg in die môre al bid ek tot U.

₁₅Waarom verstoot U my, Here,

waarom trek U U van my af terug?

₁₆Ek ly swaar, ek kwyn al weg van my jeug af.

Dit is 'n swaar las waarmee U my teister.

Ek weet geen raad meer nie.

₁₇U toorn rus op my,

U tref my met skrik en vernietig my.

₁₈Dit bedreig my heeldag soos vloedwater,

dit sak op my toe van alle kante af.

₁₉U laat my vriende en my bure ver van my af staan,

die duisternis van die dood is my geselskap.

₂Ek sal altyd sing van die Here se liefdesdade,

sy trou verkondig aan komende geslagte.

₃Ek sê: “U liefde en u trou wankel nooit,

dit hou vir altyd stand in hemel en op aarde.”

₄U het gesê: “Ek het 'n verbond gesluit met my uitverkorene,

Ek het 'n eed gesweer vir my dienaar Dawid:

₅Ek sal vir jou 'n nageslag verseker vir altyd en jou troon in elke geslag laat standhou.” Sela

₆Die hemel loof u wondermag, Here,

die hemelinge loof u trou.

₇Wie in die hemel kan met die Here vergelyk word?

Wie onder die hemelwesens is soos die Here?

₈Hy is God, vir Hom het die hemelse vergadering 'n heilige ontsag.

Hy is magtig, gevrees onder almal rondom Hom.

₉Here, almagtige God, wie is soos U?

U krag is groot, Here, u trou is oral!

₁₀U heers oor die onstuimige see:

as sy golwe opstaan, laat U hulle bedaar.

₁₁U het die monster Rahab verbrysel, hy is verslaan.

Deur u groot mag het U u vyande uitmekaargejaag.

₁₂Aan U behoort die hemel, aan U behoort ook die aarde,

die wêreld en alles daarin. U het alles gemaak.

₁₃Die noorde en die suide, U het dit geskep;

Tabor en Hermonberg roem u Naam.

₁₄U het 'n magtige arm,

sterk is u hand, kragtig u regterhand.

₁₅U troon is gebou op geregtigheid en reg,

liefde en trou staan in u diens.

₁₆Dit gaan goed met die volk

wat kan jubel tot u eer,

wat in u lig lewe, Here.

₁₇Hulle besing u Naam die hele dag,

hulle prys u reddingsdade;

₁₈U is die krag waarin hulle roem.

Dit is ons sterkte: dat ons u guns geniet.

₁₉Ons koning behoort aan die Here,

ja, ons beskermer behoort aan die Heilige van Israel.

₂₀U het 'n openbaring gegee,

oor u troue dienaar het U gesê:

“Ek het aan 'n held my bystand geskenk,

aan 'n dapper jong man uit die volk 'n ereplek gegee.

₂₁Ek het Dawid as my dienaar uitgesoek,

hom met my heilige olie tot koning gesalf.

₂₂My mag sal hom ondersteun,

my krag sal hom sterk maak.

₂₃Vyande sal hom geen leed aandoen nie,

gewetenlose mense sal hom nie verdruk nie.

₂₄Ek sal sy teëstanders voor hom verpletter

en dié wat hom haat, verslaan.

₂₅My trou en liefde sal by hom wees:

deur My sal hy oorwin.

₂₆Ek sal sy heerskappy uitbrei tot oor die see,

sy gesag tot oorkant die riviere.

₂₇Hy sal My aanroep met die woorde: ‘U is my Vader,

my God, die rots wat my redding is.’

₂₈Ek stel hom eerste,

die magtigste koning op aarde.

₂₉Vir altyd handhaaf Ek my trou teenoor hom;

my verbond met hom staan vas.

₃₀Ek sal vir hom altyd nakomelinge verseker

sodat sy troon vas sal staan so lank daar 'n hemel is.

₃₁As sy nakomelinge nie handel volgens my woord nie

en nie lewe volgens my bepalings nie,

₃₂as hulle my voorskrifte verontagsaam

en my gebooie nie nakom nie,

₃₃sal Ek hulle oor hulle oortreding straf

en hulle oor hulle sonde met swaar slae tref.

₃₄Maar my liefde sal Ek van hom nie terughou nie,

my trou nie verbreek nie.

₃₅Ek sal my verbond nie versaak nie,

nie een van my beloftes terugtrek nie.

₃₆Ek, die Heilige, het 'n eed afgelê,

en my woord aan Dawid sal Ek nie verbreek nie:

₃₇daar sal altyd nakomelinge van hom wees,

sodat sy troon so blywend soos die son sal wees.

₃₈Soos die maan sal dit altyd daar wees.

Solank die hemel daar is, sal dit vas bly staan.” Sela

₃₉Maar nou het U in u toorn

tog u gesalfde verstoot en verwerp.

₄₀U het die verbond met u dienaar nie in ag geneem nie,

sy kroon tot in die grond vertrap.

₄₁U het al sy stadsmure afgebreek,

sy vestings in puin gelê.

₄₂Almal wat daarlangs kom, beroof hom;

die buurvolke behandel hom met minagting.

₄₃U het sy teëstanders laat seëvier,

al sy vyande laat juig.

₄₄U het hom voor die vyand laat vlug,

hy kon nie staande bly in die oorlog nie.

₄₅Aan sy koninklike luister het U 'n end gemaak,

sy troon teen die grond gegooi.

₄₆U het sy jeugdige krag gebreek

en hom diep verneder. Sela

₄₇Sal U dan vir altyd u hulp weerhou, Here?

Sal die vuur van u gramskap dan bly brand?

₄₈Dink tog daaraan hoe kort die lewe is,

hoe min daar in die lewe is

vir al die mense wat deur U geskep is.

₄₉Watter mens leef daar wat die dood nie sal sien nie,

wat homself kan red uit die mag van die doderyk? Sela

₅₀Waar is u liefde van vroeër, Here,

wat U in u trou plegtig aan Dawid belowe het?

₅₁Dink, Here, aan die smaad wat my aangedoen is,

aan alles wat ek moes verduur van baie volke.

₅₂Die mense van wie hierdie smaad kom, is u vyande, Here,

dit is u gesalfde vir wie hulle smaad waar hy ook gaan.

₅₃Aan die Here kom die lof toe vir altyd. Amen, ja, amen.