Bybelleesrooster – Dag 116

Here, U was vir ons 'n toevlug

van geslag tot geslag.

₂Voordat die berge gebore is,

voordat U die wêreld voortgebring het,

ja, van ewigheid tot ewigheid is U God!

₃U laat die mens sterwe:

U sê net: “Word weer stof!”

₄Duisend jaar is vir U soos gister as dit verby is,

soos een enkele wagbeurt in die nag.

₅U maak 'n einde aan 'n mens,

hy gaan die doodslaap in.

Hy is soos gras wat in die môre afgesny word:

₆in die môre is dit nog groen, maar dit word afgesny

en teen die aand is dit verlep en dit verdroog.

₇Ons vergaan onder u toorn,

ons gaan te gronde onder u gramskap.

₈U sien ons oortredinge raak,

U bring die sondes wat ons wou wegsteek, aan die lig.

₉Onder u toorn vlieg ons dae

en skiet ons jare verby soos 'n gedagte.

₁₀Ons lewe maar sewentig jaar,

of, as ons baie sterk is, tagtig,

en dié is vol swaarkry en leed.

Dit is gou verby,

ons vlieg na ons einde toe.

₁₁Wie ken die krag van u toorn beter as u dienaars?

Wie ken u gramskap beter?

₁₂Leer ons ons dae so gebruik

dat ons wysheid bekom.

₁₃Hoe lank nog, Here, voordat U ons te hulp kom?

Ontferm U tog oor ons.

₁₄Skenk ons elke dag u liefde in oorvloed,

dat ons ons lewe lank mag juig en bly wees.

₁₅Soveel dae as dié waarin U ons verdruk het,

soveel jare as dié waarin ons gely het,

gee ons soveel jare van blydskap.

₁₆Laat u werk vir ons duidelik word

en u grootheid vir ons kinders.

₁₇Laat ons die goedheid van die Here ons God belewe:

hou die werk van ons hande in stand,

ja, die werk van ons hande, hou dit in stand.

₁Hy wat by die Allerhoogste skuiling vind

en die beskerming van die Almagtige geniet,

₂hy sê vir die Here:

“U is my toevlug en my veilige vesting,

my God op wie ek vertrou.”

₃Dit is Hy wat jou uit die voëlvanger se wip hou

en jou bewaar van dodelike siekte.

₄Hy beskut jou onder sy vleuels

en is vir jou 'n veilige skuilplek.

Sy trou beskerm jou aan alle kante.

₅Jy hoef nie bang te wees vir gevaar in die nag

of vir aanvalle oordag,

₆vir pes wat in die donker toeslaan

of vir siekte wat helder oordag verwoesting saai nie.

₇Al val daar duisende langs jou,

tienduisende by jou,

vir jou sal niks tref nie.

₈Met jou eie oë sal jy sien

hoe die goddelose gestraf word.

₉Omdat jy die Here as skuilplek geneem het,

die Allerhoogste as jou beskermer,

₁₀sal geen onheil jou tref

en geen plaag naby jou woonplek kom nie.

₁₁Hy sal sy engele opdrag gee

om jou te beskerm waar jy ook al gaan.

₁₂Op hulle hande sal hulle jou dra,

sodat jy nie jou voet teen 'n klip sal stamp nie.

₁₃Jy sal oor leeus en adders loop,

leeus en slange sal jy doodtrap.

₁₄“Omdat hy My liefhet, sal Ek hom red,”

sê die Here,

“omdat hy My ken, sal Ek hom beskerm.

₁₅Wanneer hy My aanroep, sal Ek sy gebed verhoor;

in sy nood sal Ek by hom wees,

Ek sal hom red en hom in sy eer herstel.

₁₆'n Baie lang lewe sal Ek hom gee

en oor my hulp sal hy hom verbly.”

₂Dit is goed om die Here te loof,

om u Naam te besing, Allerhoogste,

₃om elke môre van u liefde te getuig,

en elke aand van u trou,

₄om dit te doen met snaarinstrumente,

met harp en lier.

₅U groot dade, Here, het my baie bly gemaak,

ek wil juig oor wat U gedoen het.

₆Groots is alles wat U doen, Here,

ondeurgrondelik u gedagtes.

₇Wie dit nie besef nie, is 'n dom mens,

wie dit nie insien nie, is sonder verstand.

₈Al is die goddelose voorspoedig,

al floreer almal wat onreg doen,

hulle sal vir goed uitgewis word.

₉U regeer vir ewig, Here,

₁₀en dit staan vas:

u vyande sal uitgedelg word, Here,

almal wat onreg doen, sal vernietig word.

₁₁Maar vir my gee U krag soos dié van 'n buffel,

U laat my 'n oorwinningsfees vier.

₁₂Ek kyk op my teëstanders neer,

ek luister sonder vrees na die mense

wat niks ontsien nie,

wat in opstand teen my is.

₁₃Die regverdiges sal sterk wees soos palmbome,

soos hoë seders op die Libanon.

₁₄Hulle vind hulle krag in die huis van die Here

en groei op in die tempel van ons God.

₁₅Selfs in hulle ouderdom sal hulle nog toeneem in krag.

Hulle sal fris en lewenskragtig wees.

₁₆So sal blyk dat die Here regverdig is,

dat daar by Hom geen onreg is nie.

Hy is my rots.

₁Die Here is Koning,

Hy beklee Hom met majesteit.

Die Here beklee Hom, Hy omgord Hom met krag.

Die wêreld staan vas, dit wankel nie,

₂en vas staan u troon van ouds af:

U is van altyd af daar.

₃Riviere het gedruis, Here,

riviere het gedruis,

riviere het gedreun,

₄maar hoog bo die geraas van baie waters,

hoog bo die golwe van die see,

troon die Here in sy koninklike mag.

₅U verordeninge staan baie vas.

Heiligheid versier u huis, Here,

tot in lengte van dae.

₁Here, God wat onreg straf,

U wat onreg straf, verskyn tog!

₂Kom, Regter van die aarde,

reken af met die mense wat hulle teen U verhef.

₃Hoe lank, Here,

hoe lank sal die goddeloses hulle nog verlustig

in die leed van ander mense?

₄Hulle kook oor van vermetelheid;

almal wat onreg doen, spog daarmee.

₅Hulle vertrap u volk, Here,

hulle verdruk die volk wat aan U behoort;

₆hulle vermoor weduwees en vreemdelinge,

hulle maak weeskinders dood

₇en dink die Here sien dit nie,

die God van Jakob merk dit nie.

₈Gebruik tog julle verstand, julle wat so dom optree onder die volk.

Julle dwase, wanneer wil julle dan verstandig word?

₉Sou Hy wat vir ons ore gemaak het, self nie kan hoor nie?

Sou Hy wat vir ons oë gemaak het, nie kan sien nie?

₁₀Sou Hy wat die nasies opvoed, nie ook straf nie?

Sou Hy wat die mensdom onderrig, self niks weet nie?

₁₁Die Here ken die gedagtes van die mens,

Hy weet dit beteken niks.

₁₂Dit gaan goed met die mens

wat deur U opgevoed word, Here,

vir wie U onderrig in u woord

₁₃en vir wie U rus gee na tye van teëspoed.

Maar vir die goddelose word die graf reeds gegrawe.

₁₄Die Here verstoot nie sy volk nie,

die volk wat aan Hom behoort, laat Hy nie in die steek nie.

₁₅Die regspraak sal weer regverdig wees,

alle opregtes sal hulle daaraan kan hou.

₁₆Wie staan by my teen dié wat my leed aandoen?

Wie help my teen mense wat my veronreg?

₁₇As die Here my nie gehelp het nie,

was die stilte van die graf seker al my tuiste!

₁₈Toe ek gedink het my voete gly,

het u troue liefde my regop gehou, Here.

₁₉Toe ek met baie onrus in my binneste sit,

het u vertroosting my tot rus gebring.

₂₀U duld geen korrupsie in die regspraak nie,

geen mens wat, teen u gebod in, ellende veroorsaak nie.

₂₁Hulle span saam teen die regverdige,

hulle veroordeel onskuldige mense tot die dood.

₂₂Maar vir my is die Here 'n veilige vesting,

my God is die rots waar ek kan skuil.

₂₃Hy sal hulle laat boet vir hulle dade,

Hy sal hulle verdelg oor hulle boosheid.

Die Here ons God sal hulle verdelg.

₁Kom, laat ons jubel tot eer van die Here,

laat ons juig oor die rots by wie ons redding vind,

₂laat ons na Hom toe gaan met lof,

laat ons Hom toejuig met lofsange,

₃want die Here is die magtige God,

die groot koning oor al die gode.

₄Die dieptes van die aarde behoort aan Hom,

die kruine van die berge is Syne.

₅Die see is Syne, Hy het dit gemaak;

sy hande het die land gevorm.

₆Kom ons val in eerbetoon voor Hom neer,

kom ons buig,

kom ons kniel voor die Here ons Skepper!

₇Hy is ons God en ons is sy volk,

sy kudde, sy skape, deur sy hand versorg.

As julle vandag maar na Hom wou luister:

₈“Moenie hardkoppig wees soos destyds by Meriba,

soos die dag by Massa in die woestyn nie,

₉waar julle voorvaders My uitgetart

en my geduld beproef het,

hoewel hulle gesien het wat Ek gedoen het.

₁₀Veertig jaar lank het Ek 'n weersin in daardie geslag gehad,

Ek het gesê: ‘Hulle is 'n moedswillige volk,

hulle wil my paaie nie ken nie.’

₁₁Daarom het Ek in my toorn 'n eed afgelê

dat hulle nooit sou uitkom

by die rusplek wat Ek hulle wou gee nie.”

₁Sing 'n nuwe lied tot eer van die Here,

sing tot eer van die Here, almal op aarde!

₂Sing tot eer van die Here, prys sy Naam,

verkondig elke dag sy reddingsdade!

₃Vertel die nasies van sy mag,

al die volke van sy magtige dade.

₄Die Here is groot, al die lof kom Hom toe,

ontsagwekkend is Hy bo alle gode.

₅Al die gode van die volke is niks:

dit is die Here wat die hemele gemaak het.

₆Majesteit en luister straal van Hom uit,

krag en glans vul sy heiligdom.

₇Prys die Here, alle volke,

prys die Here om sy eer en mag!

₈Prys die Here om die eer van sy Naam!

Kom na sy voorhowe toe, bring vir Hom offers!

₉Buig voor die Here by sy heilige verskyning;

betoon eerbied aan Hom, almal op aarde.

₁₀Verkondig onder die nasies: “Die Here regeer;

die wêreld staan vas, dit wankel nie;

die Here sal die volke regverdig oordeel.”

₁₁Die hemele moet bly wees en die aarde moet juig,

die see en alles daarin moet druis,

₁₂die veld en alles daarop moet jubel,

al die bome in die bos moet hulle verheug

₁₃voor die Here, want Hy kom,

Hy kom om oor die aarde te heers.

Hy sal oor die wêreld heers met regverdigheid,

oor die volke met billikheid.