Bybelleesrooster – Dag 114

Heidene het u land binnegedring, o God,

hulle het u heilige tempel ontwy

en Jerusalem in puin gelê.

₂Hulle het die lyke van u dienaars

aan die voëls gegee om te vreet,

die vleis van u troue dienaars aan die wilde diere.

₃Hulle het die bloed van u dienaars

rondom Jerusalem laat vloei soos water.

Niemand het hulle begrawe nie.

₄Ons het 'n bespotting vir ons buurvolke geword,

ons word gespot en uitgejou deur almal rondom ons.

₅Hoe lank sal dit nog aanhou, Here?

Sal u toorn dan vir altyd duur,

u woede soos 'n vuur bly brand?

₆Laat u gramskap die heidene tref: hulle dien U nie;

laat dit die koninkryke tref wat u Naam nie aanroep nie.

₇Dit is hulle wat vir Jakob tot niet gemaak

en sy woonplek verwoes het.

₈Moet tog nie die ongeregtighede van vorige geslagte

op ons laat neerkom nie,

ontferm U tog gou oor ons,

want ons kragte is gedaan.

₉Help ons, o God, ons Redder,

ter wille van die eer van u Naam,

red ons, vergewe ons ons sondes

tot die eer van u Naam.

₁₀Waarom moet die heidene sê:

“Waar is hulle God nou?”

Laat ons aanskou hoe u straf die heidene tref

oor die bloed van u dienaars wat vergiet is.

₁₁Slaan tog ag op die gesug van die gevangenes.

Red deur u groot mag dié wat met die dood bedreig word.

₁₂Betaal ons bure dubbel en dwars terug, Here,

vir die bespotting wat U van hulle moes verduur.

₁₃Ons, u volk en u kudde, sal U altyd loof,

van geslag tot geslag sal ons van u roemryke dade vertel.

₂Luister tog, Herder van Israel,

U wat die nageslag van Josef soos 'n kudde lei;

U wat oor die gerubs troon, verskyn tog aan ons!

₃Openbaar u mag aan die stamme Efraim, Benjamin en Manasse,

kom help ons tog!

₄Laat dit weer met ons goed gaan, o God,

verskyn tog tot ons redding!

₅Here, almagtige God,

hoe lank nog sal U afsydig staan

teenoor die gebed van u volk?

₆U het aan ons trane vir kos gegee

en ons 'n beker vol verdriet laat drink.

₇U laat ons bure teen ons veg,

en ons vyande lag oor ons.

₈Almagtige God, laat dit weer met ons goed gaan,

verskyn tog tot ons redding!

₉U het 'n wingerdstok in Egipte uitgehaal

en dit hier kom plant nadat U die nasies uitgedrywe het.

₁₀U het vir hom plek reggemaak,

sy wortels het gegroei en hy het die land ingeneem.

₁₁Sy skaduwee het die berge oordek,

sy ranke die magtige seders.

₁₂Hy het sy ranke uitgestoot tot by die see,

sy lote tot by die Eufraat.

₁₃Waarom het U die mure om hom afgebreek?

Al die verbygangers stroop hom,

₁₄die wildevark uit die bos verwoes hom,

gediertes uit die veld vreet hom op.

₁₅Almagtige God, kyk tog uit die hemel af

en ontferm U weer oor hierdie wingerdstok,

neem hom weer onder u sorg.

₁₆Hou in stand wat U met u eie hand geplant het,

die wingerdstok wat U vir Uself gekweek het!

₁₇Laat dié wat hom soos onkruid verbrand het,

deur u oordeel te gronde gaan.

₁₈Hou u hand oor die mense wat deur U uitgekies is,

oor die volk wat U vir U grootgemaak het.

₁₉Dan sal ons nie weer van U af wegdraai nie.

Hou ons aan die lewe, dan sal ons u Naam aanroep!

₂₀Here, almagtige God, laat dit weer met ons goed gaan,

verskyn tog tot ons redding!

₂Jubel tot eer van God ons sterkte,

juig tot eer van die God van Jakob!

₃Sing, en slaan die tamboeryn,

laat hoor die lieflike klanke van die lier en die harp.

₄Blaas die ramshoring op nuwemaan,

met volmaan, op ons feesdag, ₅want dit is 'n instelling vir Israel,

'n verordening van die God van Jakob.

₆Hy het dit vir die nageslag van Josef as 'n dure plig opgelê

toe hulle uit Egipte weggetrek het.

Wat hulle toe nog nie geweet het nie, het hulle gehoor:

₇“Ek het die swaar drag van julle skouers afgehaal,

julle kon die mandjies neersit.

₈In julle nood het julle geroep en Ek het julle gered;

Ek het julle uit 'n donderwolk geantwoord,

julle by die waters van Meriba op die proef gestel. Sela

₉Luister, my volk, Ek gee julle 'n opdrag.

Israel, luister na My:

₁₀‘Daar mag vir julle geen ander god wees nie,

julle mag voor geen vreemde god neerbuig nie.

₁₁Ek is die Here julle God

wat julle uit Egipte laat wegtrek het.

Wat julle nodig het, sal Ek in oorvloed gee.’

₁₂“Maar my volk het nie na My geluister nie,

Israel wou niks met My te doen hê nie.

₁₃Daarom het Ek hulle laat begaan in hulle koppigheid

en hulle het hulle eie sin en wil gevolg.

₁₄Ag, as my volk maar na My wou luister,

as Israel maar my wil wou doen,

₁₅hoe gou sou Ek hulle vyande nie op die knieë bring

en hulle teëstanders met my eie hand verslaan nie.”

₁₆Dié wat voorgee dat hulle die Here dien, maar Hom haat,

hulle straf sal vir altyd duur.

₁₇Maar vir julle sal Hy voed met die beste koring,

julle versadig met heuning uit 'n rots.

In die hemelse vergadering, tussen die hemelwesens,

staan God op om uitspraak te lewer:

₂“Hoe lank gaan julle nog onregverdige beslissings vel,

nog partydig wees vir die goddelose? Sela

₃Julle moet reg laat geskied aan die mens in nood en aan die weeskind,

'n regverdige uitspraak vir die hulpelose en die behoeftige lewer,

₄julle moet die mens in nood en die arme bevry,

hulle uit die mag van die goddelose red;

₅maar julle weet niks,

julle verstaan niks,

julle gaan eenvoudig in duisternis voort,

en so word die fondamente van die wêreld geskud.

₆Ek het wel gesê:

Julle is almal gode, almal met mag beklee.

₇Maar nou, julle sal elkeen sterwe soos 'n mens

en aan julle einde kom soos enige maghebber.”

₈Kom tog, o God! Lewer uitspraak oor die wêreld,

want al die nasies behoort aan U.

₂Moet tog nie afsydig staan nie, o God,

moet tog nie stilbly en niks doen nie!

₃Kyk hoe gaan u vyande teen U te kere,

hoe verset u teëstanders hulle teen U.

₄Teen u volk smee hulle komplotte in die geheim,

hulle sweer saam teen dié wat onder u beskerming staan.

₅Hulle sê: “Kom ons roei hulle uit

dat hulle nie meer 'n volk is nie,

dat niemand meer die naam Israel sal onthou nie.”

₆Hulle het eensgesind saamgespan

en 'n verbond teen U gesluit:

₇Edom en die Ismaeliete,

Moab en die Hagareërs,

₈Gebal, Ammon en Amalek,

Filistea en die inwoners van Tirus.

₉Selfs Assirië het by hulle aangesluit;

hulle help almal die kinders van Lot. Sela

₁₀Maak met hulle soos met die Midianiete,

soos met Sisera,

soos met Jabin by Kisonspruit.

₁₁Hulle is by En-Dor vernietig

en hulle lyke het daar op die grond gelê en vergaan.

₁₂Maak met hulle leiers soos met Oreb en Seëb,

met elkeen van hulle aanvoerders soos met Seba en Salmunna,

₁₃wat gesê het:

“Kom ons vat die weivelde van God vir ons.”

₁₄My God, maak tolbosse van hulle,

stoppels in die wind,

₁₅'n bos wat in vuur verteer word,

berge wat in vlamme afbrand;

₁₆jaag hulle met u stormwind,

slaan hulle uitmekaar met u orkaan.

₁₇Laat hulle met skande daarvan afkom!

Dan sal hulle weet wie U is, Here!

₁₈Bring hulle tot skande,

maak die lewe vir hulle een lang verskrikking,

verneder hulle en wis hulle uit;

₁₉laat hulle besef dat alleen U die Naam “Here” het,

U, die Allerhoogste oor die hele aarde.

₂Hoe lief het ek u woning, Here, Almagtige!

₃Ek versmag van verlange na die tempel van die Here;

met alles wat ek is, wil ek jubel oor die lewende God.

₄Selfs 'n mossie het 'n nes

en 'n swaeltjie 'n plek vir haar kleintjies

daar by u altare, Here, Almagtige,

my Koning en my God!

₅Dit gaan goed met mense vir wie u huis 'n tuiste is:

hulle hou nie op om U te prys nie. Sela

₆Dit gaan goed met mense wat hulle krag in U vind

en graag na u tempel toe gaan.

₇Vir hulle gaan daar fonteine oop

wanneer hulle deur 'n dorre laagte trek

en die vroeë reëns sy seëninge bring.

₈Keer op keer ontvang hulle nuwe krag

totdat hulle voor God in Sion verskyn.

₉Here, almagtige God, hoor my gebed,

luister tog, God van Jakob! Sela

₁₀Sien tog om na die koning, ons beskermer, o God;

hou u gesalfde onder u sorg.

₁₁Waarlik, één dag in u tempel is beter as duisend daarbuite.

Ek staan liewer by die drumpel van die huis van my God

as om te woon in huise sonder God.

₁₂Die Here God is ons krag en ons beskerming,

die Here gee genade en eer,

Hy weerhou die goeie nie van dié wat reg lewe nie.

₁₃Here, Almagtige,

dit gaan goed met die mens wat op U vertrou!

₂U was goed vir u land, Here,

U het aan die nageslag van Jakob 'n nuwe toekoms gegee;

₃U het u volk sy sonde nie toegereken nie,

hom al sy skuld kwytgeskeld. Sela

₄U het u woede laat bedaar,

u gloeiende toorn laat afkoel.

₅Ontferm U weer oor ons, o God, ons Verlosser,

moet tog nie langer op ons toornig wees nie!

₆Sal U dan altyd vir ons kwaad bly?

Sal U dan u toorn van geslag tot geslag laat voortduur?

₇Wil U nie weer die lewe vir ons nuut maak

sodat u volk hulle vreugde in U kan vind nie?

₈Laat ons u troue liefde belewe,

skenk ons u reddende hulp, Here.

₉Ek wil luister na wat God die Here sê,

want sy woord bring vrede vir sy volk,

vir dié wat Hom getrou dien.

Hulle moet net nie weer afdwaal nie.

₁₀Waarlik, uitkoms is naby vir dié wat Hom dien:

Hy sal sy reddende mag in ons land openbaar.

₁₁Liefde en trou sal mekaar ontmoet,

geregtigheid en vrede sal mekaar omhels;

₁₂trou sal uit die aarde uit opspruit,

geregtigheid sal uit die hemel uit afkom.

₁₃Die Here sal voorspoed skenk

en ons land sal sy oes gee.

₁₄Die geregtigheid sal Hom vooruitgaan

en 'n pad maak vir sy koms.