Baba

Daar is nie baie bekend oor die versorging van babas in bybelse tye nie.

In Esegiël 16:4 word ʼn aantal dinge, wat waarskynlik baie algemeen was ná die geboorte van ʼn baba, genoem: die naelstring is gesny, die kind is gebad en met sout ingevryf en in doeke toegedraai.

Waarom babas met sout ingevryf is, is onbekend. Dit was dalk om die kind teen bose geeste te beskerm, of dalk was dit net ʼn ander manier om ʼn kind skoon te maak.

Volgens Levitikus 12 was ʼn vrou vir ʼn tydperk van 40 dae onrein ná die geboorte van ʼn seuntjie. Ná die geboorte van ʼn dogtertjie, was sy onrein vir 80 dae. Geen rede word verskaf vir die verskil nie. Op die agtste dag ná die geboorte is seuntjies besny. Daar word nie in die Bybel melding gemaak van die besnydenis van dogtertjies nie.

In 2 Makkabeërs 7:27 vertel ʼn ma aan haar seun dat sy hom vir nege maande in haar moederskoot gedra het en hom vir drie jaar geborsvoed het. 

Hierdie inligting kan ook in ander Bybelboeke gevind word, byvoorbeeld in 1 Samuel 1:24, waar ons verneem dat Hanna haar seun, Samuel, na die tempel in Silo bring net ná hy gespeen is, wat rondom sy derde verjaardag moes gewees het.

In die tydperk tussen die sesde eeu v.C. en die eerste eeu n.C. het kindersterftes op 30 persent (van alle kinders tot en met die ouderdom van 18 jaar) gestaan. Die totale lewensverwagting was tussen 30 en 45 jaar. Begraafplase is in Nubië, in die suide van Egipte, gevind waar nie minder nie as 45 persent van die grafte wat daar gevind is, vir persone onder die ouderdom van 12 jaar oud was.