Saligspreking

Die nege seëninge waarmee die bergrede begin, word dikwels “saligsprekinge” genoem. Saligsprekinge word nie net in die bergrede aangetref nie. Dit kom ook in die Ou Testament voor.

“Dit gaan goed met die mens wat nie die raad van goddeloses volg nie” (Psalm 1:1) is ʼn voorbeeld van ʼn Ou Testamentiese saligspreking. In ʼn saligspreking word iemand vreugde en geluk toegewens. Hierdie geluk kan vir die hede of die toekoms wees. In Daniël 12:12 gaan dit oor toekomstige geluk (lyding in hierdie tyd is niks in vergelyking met die geluk wat dit in die toekoms gaan oplewer nie). In die meeste saligsprekinge vloei huidige en toekomstige geluk egter ineen.