Esau

Esau is die seun van Isak en Rebekka en die tweelingbroer van Jakob. Hoewel hy die oudste broer is, ontvang hy nie die seën vir die eersgeborene nie. Esau is die stamvader van die Edomiete, met wie die Israeliete gereeld konflik gehad het.

Esau word ook “Edom” genoem. Albei name beteken “rooi”. Hierdie betekenis word op twee maniere in die verhale oor Esau verduidelik. Hy het rooi hare en toe hy gebore is, was hy heeltemal met hare bedek (Genesis 25:25). Daar word ook ʼn verband gelê met die rooi lensiesop wat hy by Jakob gekry het in ruil vir sy eersgeboortereg (Genesis 25:30).